JONAS 2
2
Ang Pangamuyo ni Jonas sa Pagpasalamat bangud sang Kaluwasan
1Niyan nagpangamuyo si Jonas sa Ginoo nga iya Dios gikan sa tiyan sang isda, 2nga nagasiling,
“Nagpanawag ako sa Ginoo, bangud sang akon kapipit-an,
kag nagsabat sia sa akon;
nagtuaw ako gikan sa tiyan sang Sheol,
kag ginpamatian mo ang akon tingug.
3Kay gintagbong mo ako sa kadadalman,
sa alibutud sang dagat,
kag ang baha yara sa palibut nakon;
ang tanan mong hanol kag ang imo kabaluran
nag-agi sa ibabaw nakon.
4Niyan nagsiling ako, ‘Ginasikway ako gikan sa atubangan sang imo mga mata;
paano bala nga pagtolok nakon liwat sa imo balaan nga templo?’
5Ang mga tubig naglikup sa akon tubtub gid sa kalag,
ginlibutan ako sang kadadalman;
ang mga lumot nagputus sa akon olo
6sa kadadalman sang mga bukid.
Nagpanaug ako sa duta
nga ang iya mga pintal nagtakup sa akon sing dayon;
apang ginpagowa mo ang akon kabuhi gikan sa Boho,
O Ginoo nga akon Dios.
7Sang napunaw ang akon kalag sa akon,
nadumduman ko ang Ginoo;
kag ang akon pangamuyo nagsulud sa imo,
sa imo balaan nga templo.
8Ang mga nagasapak sang butig nga mga kadayawan
nagabiya sang ila kaugalingon nga kalooy.
9Apang ako magahalad sa imo
sa tingug sang pagpasalamat;
bayaran ko ang ginsaad ko.
Ang kaluwasan nagagikan sa Ginoo!” 10Kag nagpamolong ang Ginoo sa isda, kag ginsuka niya si Jonas sa mamala nga duta.
Currently Selected:
JONAS 2: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society