JOB 34
34
Si Elihu Nagapakamatarung sa Dios
1Niyan si Elihu nagsiling:
2“Pamati sa akon mga polong, kamo nga mga tawo nga maalam,
dungug sa akon, kamo nga may ihibalo;
3kay ang idulungug nagatilaw sang mga polong
subong nga ang ngalagngag nagatilaw sang pagkaon.
4Pilion naton nga sa aton ang matarung;
kilalahon naton sa tunga naton ang maayo.
5Kay si Job nagsiling, ‘Matarung ako,
kag ang Dios nagkuha sang akon kinamatarung;
6wala sing sapayan sang akon kinamatarung ginaisip ako nga butigon;
ang akon pilas indi mapaayo, bisan nga ako wala sing paglalis.’
7Sin-o bala ang tawo nga kaangay kay Job,
nga nagainum sang yubit kaangay sang tubig,
8nga nagapakig-upud sa mga manughikot sang kalautan
kag nagalakat upud sa mga tawo nga malauton?
9Kay nagsiling sia, ‘Wala sing pulus sa tawo
nga magpahamuut sia sa Dios.’
10“Busa pamati kamo sa akon, kamo nga mga tawo nga may paghangup,
malayo sa Dios nga maghimo sia sing pagkamalaut,
kag sa Makaako nga maghimo sia sing kalautan.
11Kay ang buhat sang tawo ihatag niya sa iya,#Sal. 62:12.
kag magapasapu sa tagsa ka tawo sono sa iya mga dalanon.
12Sa pagkamatuud, ang Dios indi maghimo sing pagkamalaut,
kag ang Makaako indi magpatiko sang katarungan.
13Sin-o bala ang nagtulin sa iya sa ibabaw sang duta
kag sin-o bala ang nagtugyan sa iya sang bug-os nga kalibutan?
14Kon ginatuhoy niya ang iya tagiposoon sa iya kaugalingon,
kon ginatipon niya sa iya kaugalingon ang iya espiritu kag ang iya ginhawa,
15ang tanan nga unud mawala sing tingub,
kag ang tawo magabalik liwat sa yab-ok.
16“Kon karon ikaw may paghangup, pamatii ini;
pamatii ang tingug sang akon mga polong.
17Magagahum bala bisan ang isa nga nagadumut sang katarungan?
Tagudilian mo bala ang matarung kag gamhanan,
18nga nagasiling sa hari, ‘Mahigko ka,’
ukon sa mga dungganon, ‘Malaut kamo’;
19nga wala nagapili sang mga tawo nga mga principe,
ukon nagapasulabi sang manggaranon sa imol,
kay sila tanan binuhatan sang iya mga kamut?
20Sa malip-ot nga tion mapatay sila;
sa tunga ang gab-i ang mga tawo ginapakurug kag nagataliwan,
kag ang gamhanan ginakuha sa wala sing kamut.
21“Kay ang iya mga mata yara sa mga dalanon sang tawo,
kag makita niya ang tanan niya nga tikang.
22Wala sing kadudulman ukon pitipit nga kadulum
diin makapanago ang mga manughikot sang kalautan.
23Kay wala sia sing kinahanglan sa pagpatugsiling sa tawo
nga mag-atubang sia sa Dios sa hukmanan.
24Ginalaglag niya ang gamhanan nga mga tawo sa mga paagi nga indi masayran,
kag ginabutang ang iban sa tal-us nila.
25Busa sia nakasayud sang mga binuhatan nila,
ginabaliskad niya sila sa kagab-ihon, sa bagay nga ginalaglag sila.
26Ginabunal niya sila subong sang malaut nga mga tawo
sa dayag nga itololok sang iban,
27bangud nga naglipas sila gikan sa pagsonod sa iya,
kag dili buut magsapak sa bisan ano sang iya mga dalanon,
28sa bagay nga ginpalambut nila sa iya ang pagtuaw sang imol,
kag nabatian niya ang pagtuaw sang napiotan—
29kon maghatag sia sing kalinong, sin-o bala niyan ang makatagudili?
Kag kon lipdan niya ang iya nawung, sin-o bala niyan ang makakita sa iya,
alangay kon ini himoon sa pungsud, ukon sa tawo?—
30agud nga ang tawo nga wala sing Dios indi maggahum,
agud nga wala sing may magsiod sa katawohan.
31Kay may bisan sin-o bala nga nagsiling sa Dios,
‘Nag-antus ako sing silot; indi na ako magpakasala;
32tudloi ako sang indi ko makita;
kon nakahimo ako sing kalautan, indi na ako maghimo sini’?
33Manginsono bala sa imo buut ang iya balus,
nga nagadumili ka sini?
Kay dapat ka magpili, kag indi ako;
busa ipamolong ang imo nahibaloan.
34Ang mga tawo nga may paghangup magasiling sa akon,
kag ang tagsa ka maalam nga tawo nga nagapamati sa akon:
35‘Si Job nagapamolong nga wala sing ihibalo,
ang iya mga polong wala sing kaalam.’
36Kabay pa kuntani nga si Job tilawan tubtub sa katapusan,
bangud nga ang iya pagsabat kaangay sa mga tawo nga malaut.
37Kay sa iya sala nagadugang sia sing pagbato;
nagapamalakpak sia sang iya mga kamut sa tunga namon,
kag nagapadamu sang iya mga polong batok sa Dios.”
Currently Selected:
JOB 34: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
