JOB 16
16
Si Job Nagayamo sang mga Paghisayo sang Dios
1Niyan si Job nagsabat:
2“Nakabati ako sing madamu sang amo nga mga butang;
kailo nga mga manuglipay kamo tanan.
3May katapusan bala ang mga polong nga hinangin?
Ukon ano bala ang nagatandug sa imo nga nagasabat ka?
4Ako man makapamolong subong sang ginahimo ninyo,
kon ang inyo kalag yari sa duug sang akon kalag;
ako makasugponsugpon sing mga polong batok sa inyo,
kag makalungolungo sang akon olo sa inyo.
5Makapalig-on ako sa inyo sang akon baba,
kag ang paglipay sang akon mga bibig magapaumpaw sang inyo kalisud.
6“Bisan nagapamolong ako, ang akon kasakit wala maumpawi,
kag bisan magpaumud ako, ano bala ang nagpahaganhagan sa akon?
7Apang karon ginpalapyo ako sang Dios;
Ginpamingaw mo ang bug-os nga guban nakon.
8Kag ginkaptan mo ako sing malig-on, nga saksi batok sa akon;
kag ang akon kaniwangon nagatindug batok sa akon,
nagapamatuud ini sa akon nawung.
9Ginkusnit niya ako sa iya kasingkal, kag ginhingabut ako;
nagpabagrut sia sang iya mga ngipon batok sa akon;
ang akon kasumpung nagpatalum sa akon sang iya mga mata.
10Nagnganga sila sa akon sang ila baba,
gintampa nila ako sing makahuluya sa pisngi,
nag-ulugyon sila batok sa akon.
11Ang Dios nagatugyan sa akon sa didiosnon,
kag nagapilak sa akon sa mga kamut sang mga malauton.
12Matawhay ako, kag ginpihak niya ako;
hoo, ginkaptan niya ako sa liog kag ginlampus niya ako nga nagbuluagas;
ginbutang man niya ako nga iligoon,
13ang iya mga manugpana nagalikup sa akon.
Ginapihak niya ang akon mga batobato, kag wala sing kalooy;
ang akon apdo napaagay niya sa duta.
14Ginaguba niya ako sa bulho kag bulho;
nagadalagan sia sa akon kaangay sang higante.
15Ako nagtahi sing panapton nga sako sa akon panit,
kag ginbutang ang akon sungay sa yab-ok.
16Ang akon nawung nagapalamula sa paghibi,
kag sa akon mga ilalakub yara ang landong sang kamatayon;
17bisan nga wala sing panlugus sa akon mga kamut,
kag putli ang akon pangamuyo.
18“O duta, dili pagtaboni ang akon dugo,
kag dili paghatagi sing palahuwayan ang akon pagtuaw.
19Bisan karon, yari karon, ang akon saksi yara sa langit,
kag sia nga nagapamatuud sa akon yara sa hitaas.
20Ang akon mga abyan nagayubit sa akon;
ang akon mga mata nagaula sing mga luha sa Dios,
21agud nga apinan niya ang kinamatarung sang tawo sa Dios,
kag sa anak sang tawo sa iya isigkatawo.
22Kay kon mag-abut ang pila ka tuig
magalakat ako sa dalanon sa diin indi na ako magbalik.
Currently Selected:
JOB 16: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
