JEREMIAS 44
44
Si Jeremias Nagatagna sa mga Judio sa Egipto
1Ang polong nga nag-abut kay Jeremias nahanungud sa tanan nga Judio nga nagpuyo sa duta sang Egipto, nga nagpuyo sa Migdol, sa Tafnes, sa Memphis, kag sa duta sang Patros, 2“Amo ini ang ginasiling sang Ginoo sang mga kasoldadosan, ang Dios sang Israel: Nakita ninyo ang bug-os nga malaut nga gindala ko sa Jerusalem kag sa tanan nga kabanwaanan sang Juda. Yari karon, sini nga adlaw mamingaw sila, kag wala sing tawo nga nagapuyo sa ila, 3bangud sang ila pagkamalaut nga ginhimo nila, sa pagpaakig sa akon, nga nagkadto sila sa pagsonog sing incienso kag sa pag-alagad sa iban nga mga dios nga wala nila makilala, bisan sila, ukon kamo, ukon sang inyo mga ginikanan. 4Wala sing sapayan ginpadala ko sa inyo ang tanan ko nga alagad nga mga manalagna, nga nagabangon sing aga pa kag nagapadala sa ila, nga nagasiling, ‘Oh, dili kamo maghimo sini nga makangilil-ad nga butang nga ginadumtan ko!’ 5Apang wala sila magpamati ukon maghuyug sang ila idulungug, sa pagtalikod sa ila pagkamalaut sa indi pagsonog sing incienso sa iban nga mga dios. 6Busa ang akon kasingkal kag ang akon kaakig gin-ula kag nagdabdab sa kabanwaanan sang Juda, kag sa mga dalan sang Jerusalem; kag nalaglag sila kag mamingaw, subong sang sa sini nga adlaw. 7Busa karon amo ini ang ginasiling sang Ginoo, ang Dios sang mga kasoldadosan, ang Dios sang Israel: Ngaa bala nagahimo kamo sini nga daku nga malaut batok sa inyo kaugalingon nga mga kalag, sa pag-utud gikan sa inyo sang lalaki kag sang babayi, sang bata kag nagasoso, gikan sa tunga sang Juda, nga wala sing mabilin sa inyo? 8Ngaa bala ginapaakig ako ninyo sa mga binuhatan sang inyo mga kamut, nga nagasonog sing incienso sa iban nga mga dios sa duta sang Egipto diin nagkadto kamo sa pagpanlugayaw, agud nga mautud kamo kag manginpinakamalaut kamo kag sa kahuluy-an sa tanan nga pungsud sang duta? 9Nalipat bala kamo sang pagkamalaut sang inyo mga ginikanan, sang pagkamalaut sang mga hari sang Juda, sang pagkamalaut sang ila mga asawa, sang inyo kaugalingon nga pagkamalaut, sang pagkamalaut sang inyo mga asawa, nga ginhimo nila sa duta sang Juda kag sa mga dalan sang Jerusalem? 10Wala sila magpaubus bisan tubtub sini nga adlaw, ukon nagkahadluk sila, ukon naglakat sa akon kasogoan ukon sa akon mga palatukuran nga ginbutang ko sa atubangan ninyo kag sa atubangan sang inyo mga ginikanan.
11“Busa amo ini ang ginasiling sang Ginoo sang mga kasoldadosan, ang Dios sang Israel: Yari karon, ipahamtang ko ang akon nawung batok sa inyo nga sa malaut, sa pag-utud sang bug-os nga Juda. 12Kuhaon ko ang nabilin sang Juda nga nagtuhuy sang ila mga nawung sa pagsulud sa duta sang Egipto sa pagpanlugayaw didto, kag sila tanan mapapas; sa duta sang Egipto mapukan sila; mapapas sila sa espada kag sa tiggulutum; mapatay sila kutub sa magamay tubtub sa dalagku, sa espada kag sa tiggulutum; kag manginkadudlaan sila, kabulungan, pakamalaut, kag kahuluy-an. 13Silotan ko sila nga nagapuyo sa duta sang Egipto, subong sang pagsilot ko sang Jerusalem, tungud sa espada, sa tiggulutum, kag sa kamatay, 14agud nga wala gid sang nabilin sang Juda nga nagkadto sa duta sang Egipto sa pagpanlugayaw didto nga makapalagyo ukon mabilin ukon makabalik sa duta sang Juda, diin may handum sila sa pagbalik sa pagpuyo didto; kay wala gid sing makabalik, luwas sang makapalagyo.”
15Niyan ang tanan nga lalaki nga nakahibalo nga ang ila mga asawa nagsonog sing incienso sa iban nga mga dios, kag ang tanan nga babayi nga nagtambong, isa ka daku nga katilingban, ang bug-os nga katawohan nga nagapuyo sa Patros sa duta sang Egipto, nagsabat kay Jeremias: 16“Nahanungud sang polong nga ginpamolong mo sa amon sa ngalan sang Ginoo, indi kami magpamati sa imo. 17Kondi magahimo gid kami sa tagsa ka polong nga naggowa sa amon baba, sa pagsonog sing incienso sa hara sang langit kag sa pag-ula sing mga halad-nga-ilimnon sa iya, subong sang nahimo namon, kami kag ang amon mga ginikanan, ang amon mga hari kag ang amon mga principe, sa kabanwaanan sang Juda kag sa mga dalan sang Jerusalem; kay niyan may bugana kami nga kalan-on, kag maayo, kag wala sing nakita nga malaut. 18Apang kutub nga nag-untat kami sa pagsonog sing incienso sa hara sang langit kag sa pag-ula sing mga halad-nga-ilimnon sa iya, nakulangan kami sang tanan nga butang kag ginpapas sang espada kag tiggulutum.” 19“Sang nagsonog kami sing incienso sa hara sang langit kag nag-ula kami sing mga halad-nga-ilimnon sa iya, naghimo bala kami sing mga kalan-onon sa iya sa pagsimba sa iya kag nag-ula sing mga halad-nga-ilimnon sa iya nga wala ang amon mga bana?”
20Niyan si Jeremias nagsiling sa bug-os nga katawohan, sa mga lalaki kag sa mga babayi, sa bug-os nga katawohan nga nagsabat sina sa iya: 21“Ang incienso nga inyo ginsonog sa kabanwaanan sang Juda kag sa mga dalan sang Jerusalem, kamo kag ang inyo mga ginikanan, ang inyo mga hari kag ang inyo mga principe, kag ang katawohan sang duta, wala bala sila pagdumduma sang Ginoo? Wala bala ini mag-abut sa iya painoino? 22Ang Ginoo indi na makabatas sang kalaut sang inyo mga ginahimo kag sang mga kangil-aran nga inyo nahimo; busa ang inyo duta nanginmamingaw kag kabulungan kag pagpakamalaut, nga wala sing pumuluyo, subong sang sa sini nga adlaw. 23Bangud nga nagsonog kamo sing incienso, kag bangud nagpakasala kamo batok sa Ginoo kag wala magtuman sa tingug sang Ginoo ukon maglakat sa iya kasogoan ukon sa iya mga palatukuran ukon sa iya mga pagpamatuud, busa ini nga malaut nahanabu sa inyo, subong sang sa sini nga adlaw.”
24Si Jeremias nagsiling sa bug-os nga katawohan kag sa tanan nga babayi, “Pamatii ang polong sang Ginoo, bug-os nga Juda nga yara sa duta sang Egipto, 25Amo ini ang ginasiling sang Ginoo sang mga kasoldadosan, ang Dios sang Israel: Kamo kag ang inyo mga asawa nagpamolong sing tingub sa inyo mga baba, kag sa inyo mga kamut nagtuman sini, nga nagasiling, ‘Sa pagkamatuud tumanon namon ang amon mga saad nga ginsaad namon, sa pagsonog sing incienso sa hara sang langit kag sa pag-ula sing mga halad-nga-ilimnon sa iya.’ Niyan palig-ona ang inyo mga saad kag himoa ang inyo mga saad! 26Busa pamatii ninyo ang polong sang Ginoo, bug-os nga Juda nga nagapuyo sa duta sang Egipto: Yari karon, nagsumpa ako tungud sa akon daku nga ngalan, nagasiling ang Ginoo, nga ang akon ngalan indi na gid paghingadlan sa baba sang bisan sin-o nga tawo sang Juda sa bug-os nga duta sang Egipto, nga nagasiling, ‘Sa nagakabuhi ang Ginoong Dios.’ 27Yari karon, nagabantay ako sa ila tungud sa malaut kag indi tungud sa maayo; ang tanan nga tawo sang Juda nga yara sa duta sang Egipto papason tungud sa espada kag sa tiggulutum, tubtub nga maubus sila. 28Kag sila nga makapalagyo sa espada magabalik gikan sa duta sang Egipto pakadto sa duta sang Juda, pila ka bilog; kag ang bug-os nga nabilin sang Juda, nga nagkadto sa duta sang Egipto sa pagpanlugayaw didto, makahibalo kon kay sin-o polong ang magapadayon, ang akon ukon ang ila. 29Ini mangintanda sa inyo, nagasiling ang Ginoo, nga silotan ko kamo sa sini nga duug, agud nga mahibaloan ninyo nga ang akon mga polong magapadayon sing totoo batok sa inyo tungud sa malaut: 30Amo ini ang ginasiling sang Ginoo, Yari karon, ihatag ko si Faraon Hofra nga hari sang Egipto sa kamut sang iya mga kaaway kag sa kamut sang mga nagatinguha sang iya kabuhi, subong nga ginhatag ko si Sedequias nga hari sang Juda sa kamut ni Nabucodonosor nga hari sang Babilonia,#2 Hari 25:1-7. nga iya kaaway kag nagtinguha sang iya kabuhi.”
Currently Selected:
JEREMIAS 44: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
