JEREMIAS 42
42
Ang Balita ni Jeremias kay Johanan
1Niyan ang tanan nga pangolo sang mga kusug, kag si Johanan nga anak ni Carea kag si Azarias nga anak ni Osaya, kag ang bug-os nga katawohan kutub sa mga magamay tubtub sa mga dalagku, nagpalapit 2kag nagsiling kay Jeremias nga manalagna, “Batona ang amon pangabay sa atubangan mo, kag magpangamuyo ka tungud sa amon sa Ginoo nga imo Dios, tungud sa bug-os sining salin (kay pila lamang kami nga nabilin gikan sa madamu, subong sang ginatan-aw kami sang imo mga mata), 3agud nga ang Ginoo nga imo Dios magpakita sa amon sang dalanon nga amon paglaktan, kag sang butang nga amon paghimoon.” 4Si Jeremias nga manalagna nagsiling sa ila, “Ginpamatian ko kamo; yari karon, nagapangamuyo ako sa Ginoo nga inyo Dios sono sa inyo mga polong, kag ang bisan anong butang nga isabat sa inyo sang Ginoo, ipahayag ko sa inyo; wala ako sing ilikum sa inyo.” 5Niyan nagsiling sila kay Jeremias, “Ang Ginoo manginmatuud kag matutum nga saksi sa tunga namon kon indi kami maghimo sono sa bug-os nga polong nga ipadala paagi sa imo sang Ginoo nga imo Dios sa amon. 6Bisan ini maayo ukon malaut, tumanon namon ang tingug sang Ginoo nga aton Dios nga sa iya ginapadala ka namon, agud nga manginmaayo sa amon kon tumanon namon ang tingug sang Ginoo nga aton Dios.”
7Sa tapus ang napulo ka adlaw ang polong sang Ginoo nag-abut kay Jeremias. 8Niyan gintawag niya si Johanan nga anak ni Carea kag ang tanan nga pangolo sang mga kusug nga upud sa iya, kag ang bug-os nga katawohan kutub sa magamay tubtub sa dalagku, 9kag nagsiling sa ila, “Amo ini ang ginasiling sang Ginoo, ang Dios sang Israel, nga sa iya ginpadala ninyo ako sa pagpahayag sang inyo pangabay sa atubangan niya: 10Kon magpabilin pa kamo sa sining duta, niyan patindugon ko kamo kag indi paglumpagon; itanum ko kamo, kag indi paggabuton; kay nagakalisud ako sang malaut nga nahimo ko sa inyo. 11Dili kamo magkahadluk sa hari sang Babilonia, nga inyo ginakahadlukan; dili magkahadluk sa iya, nagasiling ang Ginoo, kay nagaupud ako sa inyo, sa pagluwas sa inyo kag sa paghilway sa inyo sa iya kamut. 12Kalooyan ko kamo, agud nga sia malooy sa inyo kag pabalikon kamo sa inyo kaugalingon nga duta. 13Apang kon magsiling kamo, ‘Indi kami magpuyo sining duta,’ sa bagay nga wala kamo magtuman sa tingug sang Ginoo nga inyo Dios 14kag nagasiling, ‘Indi, kondi magakadto kami sa duta sang Egipto, diin indi kami makakita sang inaway, ukon makabati sang tunog sang budyong, ukon may gutum sang kalan-on, kag didto magapuyo kami,’ 15busa karon pamatii ninyo ang polong sang Ginoo, O nabilin sang Juda. Amo ini ang ginasiling sang Ginoo sang mga kasoldadosan, ang Dios sang Israel: Kon ituhuy ninyo ang inyo mga nawung sa pagsulud pakadto sa Egipto kag sa pagkadto sa pagpanlugayaw didto, 16niyan ang espada nga ginakahadlukan ninyo magalambut sa inyo didto sa duta sang Egipto; kag ang tiggulutum nga ginakahadlukan ninyo magasonod gid sa inyo didto sa Egipto; kag didto mapatay kamo. 17Ang tanan nga tawo nga nagatuhuy sang ila nawung sa pagsulud sa Egipto sa pagpanlugayaw didto mapatay sila sa espada, sa tiggulutum, kag sa kamatay; wala gid sa ila sing mabilin ukon makapalagyo sa malaut nga dalhon ko sa ila.
18“Kay amo ini ang ginasiling sang Ginoo sang mga kasoldadosan, ang Dios sang Israel: Subong nga ang akon kaakig kag ang akon kasingkal gin-ula sa mga pumuluyo sang Jerusalem, sa amo iula ang akon kasingkal sa inyo kon magsulud kamo sa Egipto. Manginkadudlaan kamo, kabulungan, pagkamalaut, kag kahuluy-an. Indi na kamo makakita sining duug. 19Ang Ginoo nagpamolong nahanungud sa inyo, O nabilin sang Juda, ‘Dili kamo magsulud sa Egipto.’ Kilalaha sing matuud nga nagpamatuud ako sa inyo sini nga adlaw 20nga nagmalimbongon kamo sa inyo kaugalingon nga mga kalag. Kay ginpadala ako ninyo sa Ginoo, nga inyo Dios, nga nagasiling, ‘Pangamuyo ka sa Ginoo nga aton Dios tungud sa amon, kag ang tanan nga isiling sang Ginoo nga aton Dios ipahayag mo sa amon kag himoon namon ini.’ 21Kag ginpahayag ko ini sa inyo sini nga adlaw, apang wala kamo magtuman sang tingug sang Ginoo nga inyo Dios sa bisan ano nga butang nga tungud sa iya ginpadala ako niya sa inyo. 22Busa karon kilalaha ninyo sing matuud, nga mapatay kamo sa espada, sa tiggulutum, kag sa kamatay sa duug nga naluyagan ninyo kadtoan sa pagpanlugayaw didto.”
Currently Selected:
JEREMIAS 42: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
