JEREMIAS 41
41
1Sa ikapitong bulan, si Ismael nga anak ni Netanias, ang anak ni Elisama, gikan sa kaliwat nga harianon, isa sang puno nga mga manugdumala sang hari, kag napulo ka tawo upud sa iya, nag-abut kay Gedalias nga anak ni Ahicam sa Mizpa. Samtang nagkaon sila sing tingub didto sa Mizpa, 2nagtindug si Ismael nga anak ni Netanias kag ang napulo ka tawo upud sa iya kag ginlabo sang espada si Gedalias nga anak ni Ahicam, nga anak ni Safan, kag ginpatay sia, sia nga ginhimo nga pangolo-puud sa duta sang hari sang Babilonia. 3Si Ismael man nagpatay sang tanan nga Judio nga upud kay Gedalias sa Mizpa, kag ang mga Caldeanhon nga hangaway nga nakita didto.#2 Hari 25:25.
4Sa ikaduhang adlaw sa tapus napatay niya si Gedalias, sa walay tawo pa nga nakahibalo sini, 5may nag-abut nga kawaloan ka tawo gikan sa Siquem kag sa Silo kag sa Samaria, nga nakiskis ang ila mga bungut kag nakusnit ang ila mga panapton, kag nagpilas sang ila kaugalingon, nga may mga halad-nga-kalan-on kag incienso sa ila kamut sa pagdala sa ila sa balay sang Ginoo. 6Kag si Ismael nga anak ni Netanias naggowa sa Mizpa sa pagsugata sa ila, nga nagahibi sing padayon sa nagalakat sia. Sang nasugata niya sila, nagsiling sia sa ila, “Kadto kamo kay Gedalias nga anak ni Ahicam.” 7Sang nag-abut sila sa tunga sang banwa, ginpatay sila ni Ismael nga anak ni Netanias, kag sang mga tawo upud sa iya, kag gintagbong sila sa tunga sang boho. 8Apang may napulo ka tawo sa ila nga nagsiling kay Ismael, “Dili kami pagpatya, kay may mga nasuput kami nga tinago sa latagon, sang trigo, sang sebada, sang lana kag sang dugus.” Gani nagpaumud sia kag wala niya pagpatya sila sa tunga sang ila mga utud.
9Karon ang boho nga gintagbongan ni Ismael sang tanan nga bangkay sang mga tawo nga ginpatay niya, sa kilid ni Gedalias, amo ini ang ginhimo ni Asa nga hari tungud sa kahadluk kay Baasa nga hari sang Israel; ini ginpuno ni Ismael nga anak ni Netanias sang mga ginpatay. 10Niyan gindala ni Ismael subong nga bihag ang tanan nga nabilin sang katawohan nga yara sa Mizpa, ang babayi nga mga anak sang hari kag ang tanan nga katawohan nga nabilin sa Mizpa, nga gintugyan ni Nabuzaradan nga pangolo sang bantay kay Gedalias nga anak ni Ahicam. Si Ismael nga anak ni Netanias nagdala sa ila nga bihag kag nagtaliwan sa pagtabok sa mga anak ni Amon.
11Apang sang nabatian ni Johanan nga anak ni Carea kag sang tanan nga pangolo sang mga kusug nga upud sa iya ang tanan nga malaut nga nahimo ni Ismael nga anak ni Netanias, 12gindala nila ang tanan nga tawo kag naglakat sa pag-away kay Ismael nga anak ni Netanias. Nakita nila sia sa ubay sang dalagkung mga tubig nga yara sa Gabaon. 13Kag sang nakita sang bug-os nga katawohan nga nag-upud kay Ismael si Johanan nga anak ni Carea kag ang tanan nga pangolo sang mga kusug nga upud sa iya, nagkasadya sila. 14Gani ang bug-os nga katawohan nga gindala ni Ismael subong nga bihag gikan sa Mizpa nagliso kag nagbalik, kag nagkadto kay Johanan nga anak ni Carea. 15Apang si Ismael nga anak ni Netanias nagpalagyo upud sang walo ka tawo gikan kay Johanan, kag nagkadto sa mga anak ni Amon. 16Niyan ginkuha ni Johanan nga anak ni Carea kag sang tanan nga pangolo sang mga kusug nga upud sa iya ang bug-os nga salin sang katawohan nga nabawi niya kay Ismael nga anak ni Netanias gikan sa Mizpa sa tapus nga napatay niya si Gedalias nga anak ni Ahicam—ang mga lalaki nga hangaway, ang mga babayi, ang mga kabataan, kag ang mga eunuco, nga ginpabalik ni Johanan gikan sa Gabaon. 17Kag nagtaliwan sila kag nagpuyo sa Gerut Camaam, nga yara sa luyo sang Bet-lehem, pakadto sa pagsulud sa Egipto 18bangud sang mga Caldeanhon; kay nahadluk sila sa ila, bangud nga ginpatay ni Ismael nga anak ni Netanias si Gedalias nga anak ni Ahicam, nga ginhimo sang hari sang Babilonia nga pangolo-puud sa duta.
Currently Selected:
JEREMIAS 41: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
