SANTIAGO 5

Paandam sa mga Manggaranon

1Kari karon, kamo nga mga manggaranon, maghibi kag magtiabaw bangud sang inyo mga pagkakailo nga nagaabut sa inyo. 2Ang inyo mga manggad nagakadunut kag ang inyo mga panapton ginaut-ut sang sipit. 3Ang inyo bulawan kag pilak ginatuktuk, kag ang ila tuktuk manginsaksi batok sa inyo kag magaupud sang inyo unud subong sang kalayo. Natipon ninyo ang inyo bahandi#5:3 Ukon magakaon sang inyo unud, sanglit nakatipon kamo sang kalayo. sa katapusan nga mga adlaw.#Mat. 6:19. 4Yari karon, ang mga sohol sang mga mamumugon nga naggalab sang inyo mga uma, nga inyo ginahawiran sa limolimo, nagasinggit; kag ang mga singgit sang mga naggalab naglambut sa mga dulunggan sang Ginoo sang kasoldadosan.#Deut. 24:14-15. 5Nakapangabuhi kamo sa duta sa patuyang kag sa kasadia; ginpatambok ninyo ang inyo mga tagiposoon sa adlaw sang pagpamatay. 6Gintagudilian ninyo, ginpatay ninyo ang matarung; wala sia nagasumpung sa inyo.

Pagpailub kag Pagpangamuyo

7Busa, mga kauturan, magpailub kamo tubtub sa pag-abut sang Ginoo. Yari karon, ang mangunguma nagahulat sang hamiling bunga sang duta, nga nagapailub tubtub nga mabaton sini ang una kag olihing ulan. 8Magpailub man kamo. Palig-ona ang inyo mga tagiposoon, kay ang pag-abut sang Ginoo malapit na. 9Mga kauturan, dili kamo magkulumuray, ang isa batok sa isa, agud nga indi kamo paghukman; yari karon, ang Hukom nagatindug sa mga ganhaan. 10Mga kauturan, gamita ninyo nga huwaran sang pag-antus kag sang pagpailub ang mga manalagna nga naghambal sa ngalan sang Ginoo. 11Yari karon, ginatawag naton nga bulahan ang mga nagpakalig-on. Nabatian ninyo ang pagkalig-on ni Job,#Job 1:21-22; 2:10. kag nakita ninyo ang katuyoan sang Ginoo, kon daw ano kamainawaon kag maloloy-on ang Ginoo.#Sal. 103:8.

12Apang labaw sa tanan, mga kauturan ko, dili magsumpa, bisan bangud sa langit ukon bangud sa duta ukon sa ano pa nga iban nga sumpa; kondi ang inyo hoo manginhoo kag ang inyo indi mangin-indi, agud nga indi kamo maholog sa katagudilian.#Mat. 5:34-37.

13May yara bala sa inyo nga nagaantus? Magpangamuyo sia. May malipayon? Mag-amba sia sing pagdayaw. 14May nagamasakit bala sa inyo? Magpatawag sia sang mga tigulang sang iglesia kag pangamuyoan nila sia, nga ginahaplas sia sing lana#Mar. 6:13. sa ngalan sang Ginoo; 15kag ang pangamuyo sang pagtoo magaayo sang nagamasakit, kag ang Ginoo magabangon sa iya; kag kon nakasala sia, patawaron ini sa iya. 16Busa magtinu-aray kamo sang inyo mga sala, kag magpangamuyoay kamo, agud nga mag-ayo kamo. Ang pangamuyo sang matarung nga tawo may dakung gahum sa mga pagpanghikot sini. 17Si Elias tawo nga kaanggid naton sa kinaugali kag nagpangamuyo sia sing hanoot nga indi mag-ulan, kag wala mag-ulan sa duta sa tatlo ka tuig kag anum ka bulan.#1 Hari 17:1; 18:1. 18Niyan nagpangamuyo sia liwat kag ang langit naghatag sing ulan,#1 Hari 18:42-45. kag ang duta nagpatubas sang iya bunga.

19Mga kauturan ko, kon may yara sa inyo nga nagatalang sa kamatooran kag may isa nga nagapaliso sa iya, 20pahibaloa sia nga ang nagapaliso sing makasasala gikan sa pagtalang sang iya paggawi magaluwas sang iya kalag gikan sa kamatayon kag magatabon sing kadam-an nga mga sala.#Hulu. 10:12.

Currently Selected:

SANTIAGO 5: ABHIL82

Highlight

Copy

Compare