SANTIAGO 3

Ang Dila

1Mga kauturan ko, dili maghingamo ang madamu sa inyo sa pagkamanunudlo, kay nahibaloan ninyo nga kita nga nagatudlo hukman sing maid-id pa. 2Kay sa madamung butang kita tanan nakasayup, kag kon sin-o ang wala nagasayup sa polong sia himpit nga tawo, nga sarang makapugung sang bug-os nga lawas man. 3Kon ginabutang ta ang mga busal sa mga baba sang mga kabayo agud nga magtuman sila sa aton, ginatuytuyan ta ang ila bug-os nga mga lawas. 4Tan-awa ang mga sakayan man; bisan daw ano ka dalagku sila kag ginapalid sang mamadlus nga mga hangin, ginatuytuyan sila sang diotay gid nga bansalan kon diin ang buut sang manug-ulin. 5Amo man ang dila bahin nga diotay kag nagapabugal sing dalagku nga mga butang. Daw ano kadaku nga kagulangan ang ginasonog sang diotay nga kalayo!

6Kag ang dila kalayo. Ang dila amo ang kalibutan sang kalautan sa tunga sang aton mga bahin, nga nagadagta sang bug-os nga lawas, kag nagasonog sang paglakat sang pangabuhi, kag ginasonog sang infierno. 7Kay ang tagsa ka sari sang sapat kag pispis, sang nagasaug nga sapat kag sapat sa dagat, ginahagup kag nahagup sang katawohan, 8apang walay tawo nga makahagup sang dila—ini amo ang isa ka malauton nga hulagan, puno sang makamamatay nga hilo. 9Paagi sini ginapakamaayo ta ang Ginoo kag Amay, kag paagi sini ginapakamalaut ta ang mga tawo, nga ginhimo sa kaangay sang Dios.#Gen. 1:26. 10Gikan sa among baba nagagowa ang pagpakamaayo kag ang pagpakamalaut. Mga kauturan ko, ini indi dapat magmangin-amo. 11Nagapailig bala ang tuburan gikan sa amo man nga boho sing tubig nga matab-ang kag matayam? 12Mga kauturan ko, makapatubas bala ang higuera sing mga oliva, ukon ang uvas sing higos? Ang maasin nga tubig indi makahatag sing matab-ang nga tubig.

Ang Kaalam gikan sa Ibabaw

13Sin-o bala ang maalam kag mahangponon sa inyo? Magpakita sia sa iya maayong kabuhi sang iya mga binuhatan sa pagkamapinaubuson sang kaalam. 14Apang kon kamo may mapait nga kahisa kag maiyaiyahon nga handum sa inyo tagiposoon, dili magpabugal kag dili magbutig batok sa kamatooran. 15Ining kaalam wala magikan sa hitaas, kondi dutan-on, lawasnon, yawan-on. 16Kay kon diin ang kahisa kag maiyaiyahon nga handum, didto ang kagamo kag tagsa ka malaut nga buhat. 17Apang ang kaalam nga gikan sa hitaas sa nahauna putli, ugaling madaiton, malolo, masinulugton, puno sang kalooy kag maayong mga bunga, walay pagpangduhaduha ukon pagkasalimpapaw. 18Kag ang bunga sang pagkamatarung ginasab-ug sa paghidait sang mga nagapakighidait.

Currently Selected:

SANTIAGO 3: ABHIL82

Highlight

Copy

Compare