ISAIAS 47
47
Ang Paghukom sa Babilonia
1Panaug kag lingkod sa yab-ok,
O ulay nga babayi nga anak sang Babilonia;#Isa. 13:1–14:23; Jer. 50:1–51:64.
lingkod sa duta nga wala sing trono,
O babayi nga anak sang mga Caldeanhon!
Kay indi ka na pagtawgon
nga mahomok kag maluming.
2Kuhaa ang mga galingan kag galing ka sing harina,
kuhaa ang imo takurung,
huklasa ang imo malaba nga bayo, pamalaking ka,
tabok sa mga suba.
3Magdayag ang imo kahubo,
kag ang imo kahuluy-an makita.
Magatimalus ako,
kag wala sing patawaron nga tawo.
4Ang aton Manunubus—ang Ginoo sang mga kasoldadosan ang iya ngalan—
amo ang Balaan sang Israel.
5Lingkod ka sing hipus, kag kadto ka sa kadulum,
O babayi nga anak sang mga Caldeanhon;
kay indi ka na pagtawgon
nga babayi nga agalon sang mga ginharian.
6Nasingkal ako batok sa akon katawohan,
ginpasipalahan ko ang akon panublion;
ginhatag sila sa imo kamut,
wala ka magkalooy sa ila;
sa mga tigulang ginbutang mo ang imo gota
sing mabug-at gid.
7Nagsiling ka, “Ako mangin-agalon nga babayi sing dayon,”
sa bagay nga wala mo paghupti ini nga mga butang sa imo tagiposoon
ukon magdumdum sang iya kaolihian.
8Busa karon pamatii ini, ikaw nga nagapatuyang sa mga kalipayan,
nga nagalingkod sing malig-on,
nga nagasiling sa imo tagiposoon,
“Ako amo, kag wala na gid sing iban luwas sa akon;
indi ako maglingkod subong nga balo
ukon makakilala sang kadulaan sang mga anak”:
9Apang ini nga duha ka butang magaabut sa imo
sa hinali, sa isa ka adlaw;#Bug. 18:7-8.
ang pagkadula sang mga anak kag ang pagkabalo
sa ila kabug-osan magaabut sila sa imo,
sa kadam-an sang imo mga diwata
kag sa daku nga kabuganaan sang imo mga babaylan.
10Kay ikaw nagsalig sa imo pagkamalaut,
nagsiling ka, “Wala gid sing nakakita sa akon”;
ang imo kaalam kag ang imo ihibalo
nagpabalingag sa imo,
kag nagsiling ka sa imo tagiposoon,
“Ako amo, kag wala na gid sing iban luwas sa akon.”
11Busa magaabut sa imo ang malaut,
indi ka makahibalo sang pamanagbanag sini;
ang malain magaabut sa imo,
indi ka makasarang magsikway sini;
kag ang kamingaw magaabut sa imo sing hinali,
nga wala mo mahibaloi.
12Tindug ka karon upud sa imo mga babaylan
kag sa kadam-an sang imo mga diwata,
sa diin nagpangabudlay ka kutub sa imo pagkapamatan-on;
basi kon makapulus ka,
basi kon makalandas ka.
13Ginalapyo ka sa kadam-an sang imo mga laygay;
patinduga karon ang mga astrologo,
ang mga manuglantaw sa bitoon,
ang mga manugpakot sa binulan,
kag magaluwas sa imo sa mga butang nga magaabut sa imo.
14Yari karon, manginsubong sila sang ginalaban,
ang kalayo magasonog sa ila;
indi nila maluwas ang ila kaugalingon
sa gahum sang dabdab.
Indi ini manginbaga nga palainitan,
ukon kalayo nga ganggangan!
15Manginsubong sini sa imo ang mga butang nga ginpangabudlayan mo,
ang mga nagpakig-upud sa imo kutub sa imo pagkapamatan-on;
magadalangdalang ang tagsatagsa sa iya duug;
wala gid sang magaluwas sa imo.
Currently Selected:
ISAIAS 47: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
