ISAIAS 46
46
1Si Bel nagaduko, kag si Nebo nagakuub,
ang ila mga diosdios natungtung sa mga sapat kag sa mga kahayupan;
ang mga butang nga gindaladala ninyo nahimo nga kabug-atan
subong nga lulan sa sapat nga nalapyo.
2Nagakuub sila, nagaduko sila sing tingub,
indi sila makaluwas sang lulan,
apang sila ila ginabihag.
3“Magpamati sa akon, O balay ni Jacob,
ang bug-os nga salin sang panimalay sang Israel,
nga gindala ko kutub sa ila pagkatawo,
nga gindala kutub sa tiyan;
4bisan tubtub sa katigulangon ako Sia,
kag bisan tubtub sa pagkaubanon dalhon ko kamo.
Ako ang naghimo, kag ako magabatas;
ako magadala kag magaluwas.
5“Sa kay sin-o bala ako ninyo ipaangay kag ipatupung ako,
kag ipaanggid ako, agud nga manginkaangay kami?
6Ang mga nagapatuyang sing bulawan gikan sa puyo,
kag nagatimbang sing pilak sa timbangan,
nagasohol sila sing manugsalsal sing bulawan, kag ginahimo ini nga diosdios;
nagayaub sila kag nagasimba sila!
7Ginapas-an nila ini, ginadala nila ini,
ginapahamtang ini sa iya duug, kag ini nagatindug;
gikan sa iya duug indi ini makuha.
Ang isa magatuaw sa sini, apang indi ini makasabat,
ukon makaluwas sa iya sa kalisdanan niya.
8“Dumduma ini kag magpakalalaki kamo,
painoinoha ninyo ini, O kamo nga mga malalison,
9dumduma ang nahauna nga mga butang sang dumaan;
kay Ako amo ang Dios, kag wala na sing iban;
Ako ang Dios, kag wala na gid sing kaangay sa akon,
10nga nagapahayag sang katapusan kutub sa ginsuguran
kag kutub sa dumaan nga mga tion sang mga butang nga wala pa mahimo,
nga nagasiling, ‘Ang akon tinutuyo magapadayon,
kag himoon ko ang tanan ko nga luyag,’
11nga nagatawag gikan sa sidlangan sang pispis nga mananagit,
ang tawo sang akon tinutuyo gikan sa duta nga malayo.
Nagpamolong ako, kag pahanabuon ko man ini;
ginboko ko, kag himoon ko man ini.
12“Pamati sa akon, kamo nga matig-a sing tagiposoon,
nga malayo sa pagkamatarung:
13papalapiton ko ang akon pagkamatarung, indi magmalayo ini,
kag indi magpalantang ang akon kaluwasan;
ibutang ko sa Sion ang akon kaluwasan,
tungud sa Israel nga akon himaya.”
Currently Selected:
ISAIAS 46: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
