ISAIAS 21

Ang Lulan sang Kamingawan sang Dagat

1Ang lulan sang kamingawan sang dagat.

Subong sang mga buhawi sa Bagatnan nga nagaagi,

nagahalin ini gikan sa kamingawan,

gikan sa duta nga makakulugmat.

2Isa ka makahalanguyus nga palanan-awon ang ginpahayag sa akon;

ang mabudhion nga tawo nagabudhi,

kag ang manuglaglag nagalaglag.

Taklad, O Elam,

magkibon, O Media;

ginpauntat ko

ang tanan niya nga panghayhay.

3Busa ang akon mga balikawang puno sing kagha;

ang mga kasakit nagdakup sa akon,

subong sang mga kasakit sang babayi nga ginasakitan;

nagabalikutot ako sa bagay nga indi ako makabati,

ginakulbaan ako sa bagay nga indi makakita.

4Nagakubakuba ang akon tagiposoon, ang kakugmat nagapalisang sa akon;

ang kasisidmon nga akon ginhandum

nanginpagkurug sa akon.

5Nagaaman sila sang latok,

ginabutang nila ang bantay,

nagakaon sila, nagainum sila.

Tindug, kamo nga mga principe,

haplasa ang taming!

6Kay amo ini ang ginasiling sang Ginoo sa akon:

“Lakat, butang sing bantay,

magpahayag sia sang iya makita.

7Kon makakita sia sing guban, nga mga manugkabayo nga pinares,

guban sang mga asno, guban sang mga camelyo,

magpamati sia sing makugi,

sa daku gid nga pagtalupangud.”

8Niyan nagsinggit sia subong sang leon:

“O Ginoo, nagatindug ako sa torre nga balantayan

sing dalayon sa adlawon,

kag yara ako sa akon hulut

sa bug-os nga mga gab-i.

9Kag, yari karon, nagapakari ang guban nga mga lalaki,

mga manugkabayo nga pinares!”

Kag nagsabat sia,

“Napukan, napukan ang Babilonia;#Bug. 14:8; 18:2.

kag ang tanan nga larawan nga tinigban sang iya mga dios

nagkalautud sa duta.”

10O ikaw nga akon lininas kag ang uyas sang akon linasan,

ang akon nabatian sa Ginoo sang mga kasoldadosan,

ang Dios sang Israel, ginpahayag ko sa imo.

Ang Lulan sang Duma

11Ang lulan sang Duma.

Ang isa nagatawag sa akon gikan sa Seir,

“Manugbantay, ano bala ang kagab-ihon?

Manugbantay, ano bala ang kagab-ihon?”

12Ang manugbantay nagsiling:

“Ang kaagahon nagaabut, kag ang kagab-ihon man.

Kon kamo mamangkot, pamangkot kamo;

balik kamo liwat.”

Ang Lulan sang Arabia

13Ang lulan sang Arabia.

Sa talon sa Arabia magapabilin kamo,

O kamo nga mga katay sang mga Dedanhon.

14Sa nauhaw nagdala sila sing tubig,

ang mga pumuluyo sang duta nga Tema

nagsugata upud sang kalan-on sang mga laaslaas.

15Kay nagapalagyo sila gikan sa mga espada,

gikan sa espada nga nagabut,

gikan sa pana nga nabingat,

kag sa kangitngitan sang inaway.

16Kay amo ini ang ginsiling sa akon sang Ginoo, “Sa sulud sang isa ka tuig, sono sa mga tuig sang sinoholan, ang bug-os nga himaya sang Cedar mawala; 17kag ang nabilin sang kadamuon sang mga manugpana sang gamhanan nga mga lalaki sang mga anak sang Cedar magadiotay; kay ang Ginoo, ang Dios sang Israel, nagpamolong sini.”

Currently Selected:

ISAIAS 21: ABHIL82

Highlight

Compare

Copy