HEBREO 9

1Karon bisan ang nahaunang katipan may mga pagsolondan tungud sa panimbahon kag may santuario nga kalibutanon. 2Kay ang isa ka kayangkayang#Ex. 26:1-30. gin-aman, ang sa gowa, diin ang candelero#Ex. 25:31-40. kag ang latok kag ang tinapay nga pahayag;#Ex. 25:23-30. ini gintawag ang Duug nga Balaan. 3Sa likod sang ikaduhang kumbung nagtindug ang kayangkayang nga gintawag ang Duug nga Balaan gid,#Ex. 26:31-33. 4nga may halaran nga bulawan sang incienso#Ex. 30:1-6. kag ang kaban sang katipan nga nataklapan sa palibut sing bulawan,#Ex. 25:10-16. diin ang suludlan nga bulawan nga nasudlan sang mana,#Ex. 16:33. kag ang sungkud ni Aaron nga nagpanalingsing,#Num. 17:8-10. kag ang mga tapitapi sang katipan; 5sa ibabaw sini ang mga querubin sang himaya nga nagalandong sa lingkoran nga pakilooyan. Nahanungud sining mga butang indi kita karon makahambal sing talaid.

6Ining mga pag-aman nga nahimo sing subong, ang mga sacerdote nagasulud sing dalayon sa nagowa nga kayangkayang, nga nagatuman sang mga hilikoton sang ila pag-alagdan;#Num. 18:2-6. 7apang sa ikaduha nagasulud ang pinakamataas nga sacerdote nga isa lamang, kag makaisa sa isa ka tuig, kag indi nga wala sing dala nga dugo nga ginahalad niya tungud sa iya kaugalingon kag tungud sa mga sayup sang katawohan.#Lev. 16:2-34. 8Ang Espiritu Santo nagapahangup sini nga ang dalan pakadto sa santuario wala pa mabuksi sa nagatindug pa ang nagowa nga kayangkayang 9(nga amo ang paanggid sang tion nga karon). Sono sa sining paagi, ginahalad ang mga dolot kag mga halad nga indi makahimpit sang kaisipan sang manugsimba, 10apang nahanungud lamang sa kalan-on kag ilimnon kag sarisari nga mga pagpanghugas, mga pagsolondan tungud sa lawas nga ginpatuman tubtub sa tion sang pagbaylo.

11Apang sang nagpahayag si Cristo nga pinakamataas nga sacerdote sang maayong mga butang nga nag-abut na, niyan paagi sa daku pa kag himpit pa nga kayangkayang (nga wala paghimoa sang mga kamut, nga kon sayoron, indi sa sining tinuga) 12nagsulud sia sing makaisa gid lang sa Duug nga Balaan, nga wala nagadala sang dugo sang mga kanding kag mga tinday sang baka kondi sang iya kaugalingon nga dugo, sa amo nakatigayon sing pagtubus nga dayon. 13Kay kon ang pagwisik sa mga nadagtaan sang dugo sang mga kanding kag lalaking mga baka#Lev. 16:15-16. kag sang mga abo sang tinday nga baka nga babayi#Num. 19:9, 17-19. nga nagapakabalaan nga sa katinloan sang unud, 14daw ano pa gid ang dugo ni Cristo, nga paagi sa Espiritu nga dayon naghalad sang iya kaugalingon nga walay dagta sa Dios, nga makatinlo sang inyo kaisipan gikan sa patay nga mga buhat sa pag-alagad sa Dios nga buhi.

15Busa sia amo ang manugpatunga sang bag-ong katipan, agud nga ang mga ginatawag makabaton sang saad sang panublion nga dayon, sanglit ang kamatayon natabo nga nagatubus sa ila gikan sa mga paglapas sa idalum sang nahaunang katipan. 16Kay kon may yara nga katipan, ang kamatayon sang taghimo sini kinahanglan gid. 17Kay ang katipan matuman kon may kamatayon lamang, sanglit wala ini ginapatuman samtang nagakabuhi pa ang taghimo. 18Gani ang nahaunang katipan wala mapamatud-i sa walay dugo. 19Kay sang napamolong ni Moises sa bug-os nga katawohan ang tagsa ka sogo sang kasogoan, ginkuha niya ang dugo sang mga tinday nga baka kag sang mga kanding, nga may tubig kag dilana nga escarlata kag hisopo, kag ginwisikan ang tolon-an gid kag ang bug-os nga katawohan, 20nga nagasiling, “Ini amo ang dugo sang katipan nga ginsogo sang Dios sa inyo.”#Ex. 24:6-8. 21Kag sa among bagay ginwisikan niya sing dugo ang kayangkayang kag ang tanan nga galamiton sa panimbahon.#Lev. 8:15. 22Sa pagkamatuud, sa idalum sang kasogoan daw ang tanan nga butang ginapaputli sang dugo, kag sa walay pagpaagay sang dugo walay kapatawaran sang mga sala.#Lev. 17:11.

Ang Sala Ginwala paagi sa Paghalad ni Cristo

23Sa amo kinahanglan nga ang mga hinuwad sang mga butang nga langitnon pagputlion sa sining mga tulumanon, apang ang mga butang gid nga langitnon sa maayo pa nga mga halad sang sa sini. 24Kay si Cristo nagsulud, indi sa santuario nga ginhimo sang mga kamut, nga kaangay sang matuud, kondi sa langit gid, karon sa pagpahayag sa atubangan sang Dios tungud sa aton. 25Indi nga maghalad pa sia sing liwatliwat sang iya kaugalingon, subong sang pinakamataas nga sacerdote nga nagasulud sa Balaan nga Duug tuigtuig nga may dugo nga indi iya kaugalingon; 26kay niyan dapat sia kuntani mag-antus sing liwatliwat kutub sa pagpasad sang kalibutan. Apang karon, sa makaisa gid lang sa katapusan sang katuigan nagpahayag sia sa pagwala sang sala paagi sa paghalad sang iya kaugalingon. 27Kag sa bagay nga gintangdo sa mga tawo nga mapatay sing makaisa, kag sa tapus sina ang paghukom, 28subong man si Cristo, nga nahalad sing makaisa sa pagdala sang mga sala sang madamu, magapahayag sa ikaduha, nga walay kalabtanan sa sala kondi sa pagluwas sang mga nagahulat sing makugihon sa iya.

Currently Selected:

HEBREO 9: ABHIL82

Highlight

Copy

Compare