HEBREO 10
10
1Kay sanglit ang kasogoan may landong lamang sang maayong mga butang nga palaabuton sa baylo sang matuud nga dagway nila, indi nga mas-a ini, paagi sa amo nga mga halad nga ginahalad nila sing dalayon tuigtuig, makahimpit sang mga nagapalapit. 2Kon indi, wala bala sila kuntani gin-untat sa paghalad? Kon ang mga manugsimba natinloan sing makaisa, wala na sila sing pagbatiag sang sala. 3Apang sa sining mga halad may pagpahanumdum tuigtuig sang sala. 4Kay indi mahimo nga ang dugo sang mga lalaking baka kag sang mga kanding magkuha sang mga sala.
5Gani, sang pag-abut ni Cristo sa kalibutan, nagsiling sia,
“Indi ka buut sang mga halad kag mga dolot,
kondi gin-amanan mo ako sing lawas;
6sa mga halad nga sinonog kag mga halad tungud sa sala wala ka sing kalipay.
7Niyan nagsiling ako, ‘Yari karon, nagaabut ako sa paghimo sang imo kabubut-on, O Dios,’
subong nga nasulat nahanungud sa akon sa linokot nga tolon-an.”#Sal. 40:6-8.
8Sang nagsiling sia sa ibabaw, “Indi ka buut ukon nahamuut sa mga halad kag mga dolot kag mga halad-nga-sinonog kag mga halad-tungud-sa-sala” (ini sila ginahalad sono sa kasogoan), 9niyan nagsiling pa sia, “Yari karon, nagakari ako sa paghimo sang imo kabubut-on.” Ginakuha niya ang nahauna agud nga mapasad niya ang ikaduha. 10Kag paagi sa sinang kabubut-on ginapakabalaan kita paagi sa paghalad sang lawas ni Jesu-Cristo sing makaisa gid lang.
11Kag ang tagsa ka sacerdote nagatindug adlawadlaw sa iya pag-alagdan, nga nagahalad sing liwatliwat sang amo nga mga halad, nga indi gid makakuha sang mga sala.#Ex. 29:38. 12Apang sang nakahalad si Cristo sing isa ka halad nga sa gihapon, tungud sa mga sala, naglingkod sia sa too sang Dios, 13niyan sa paghulat tubtub nga ang iya mga kaaway mahimo nga palatungan sang iya mga tiil.#Sal. 110:1. 14Kay bangud sa isa ka halad nahimpit niya sing dayon ang mga ginpakabalaan. 15Kag ang Espiritu Santo man nagasaksi sa aton; kay sa tapus nga nakasiling sia,
16“Amo ining katipan nga himoon ko sa ila
sa tapus sadtong mga adlaw, nagasiling ang Ginoo:
Ibutang ko ang akon mga kasogoan sa ila mga tagiposoon,
kag sa ila mga hunahuna isulat ko ini sila,”#Jer. 31:33.
17niyan nagsiling sia,
“Ang ila mga sala kag ang ila mga kalautan indi ko na pagdumdumon.”#Jer. 31:34.
18Kon may kapatawaran sini sa ila, wala na sing halad tungud sa sala.
19Busa, mga kauturan, sanglit may pagsalig kita sa pagsulud sa santuario paagi sa dugo ni Jesus, 20paagi sa dalanon nga bag-o kag buhi nga iya ginbuksan tungud sa aton, paagi sa kumbung, kon sayoron, sa iya unud, 21kag sanglit may daku kita nga sacerdote sa balay sang Dios, 22magpalapit kita nga may bunayag nga tagiposoon sa bug-os nga kalig-onan sang pagtoo, nga nawisikan sing matinlo ang aton mga tagiposoon#Lev. 8:30. gikan sa malaut nga kaisipan kag nahugasan ang aton mga lawas sa tubig nga matinlo.#Lev. 8:6. 23Lig-onon ta ang pagtu-ad sang aton paglaum nga indi mationg, kay matutum sia nga nagsaad; 24kag magpatugsiling kita kon paano ang pagpukaw sa isa kag isa sa gugma kag maayong mga buhat, 25nga wala nagabiya sang aton pagtilipon sing tingub, subong sang kinabatasan sang iban, kondi nagalinaygayay ang isa kag isa, kag labi pa gid sa ginatan-aw ninyo nga nagapalapit ang Adlaw.
Paandam batok sa Kinabubut-on nga Sala
26Kay kon magpakasala kita sing kinabubut-on sa tapus nga aton nabaton ang pagkilala sang kamatooran, wala na sing halad tungud sa mga sala, 27kondi ang makahaladluk nga paghulat sang paghukom, kag kasingkal sang kalayo nga magalamon sang mga kasumpung.#Isa. 26:11. 28Ang nakalalis sang kasogoan ni Moises mapatay sa walay kalooy sa pagpamatuud sang duha ukon tatlo ka saksi.#Deut. 17:6; 19:15. 29Daw ano pa kapait nga silot sa hunahuna ninyo ang takus nga pag-ihukom sa iya nga nagsikway sang Anak sang Dios, kag nagpakadibalaan sang dugo sang katipan#Ex. 24:8. nga sa amo ginpakabalaan sia, kag nagpasipala sa Espiritu sang bugay? 30Kay kilala naton ang nagsiling, “Akon ang pagtimalus, ako ang magabalus.”#Deut. 32:35. Kag liwat, “Ang Ginoo magahukom sang iya katawohan.”#Deut. 32:36. 31Makahaladluk nga butang nga maholog sa mga kamut sang Dios nga buhi.
32Apang panumduma ninyo ang nahaunang mga adlaw diin, sa tapus na kamo maiwagan, ginbatas ninyo ang daku nga pagsumpung sang mga pag-antus, 33nga kon kaisa nagaantus sing mga pagpasipala kag kangitngitan sa dayag, kag kon kaisa nangin-umalambit upud sang mga ginhimoan sini. 34Kay may kalooy kamo sa mga binilanggo, kag ginbaton ninyo sing malipayon ang paglugus sang inyo mga pagkabutang, sanglit nga nakahibalo kamo nga kamo inyo may maayo pa nga pagkabutang kag isa nga nagapadayon. 35Busa indi ninyo pag-isikway ang inyo pagsalig, nga may daku nga balus. 36Kay may kinahanglan kamo sang pagbatas agud nga mahimo ninyo ang kabubut-on sang Dios kag mabaton ang saad.
37“Kay sa madali na lamang,
kag ang nagaabut magaabut kag indi maglantang;
38apang ang akon matarung magakabuhi sa pagtoo,
kag kon mag-isul sia,
ang akon kalag walay kahamuut sa iya.”#Hab. 2:3-4.
39Apang indi kita gikan sa mga nagaisul kag ginalaglag, kondi sa mga may pagtoo kag nagatipig sang ila mga kalag.
Currently Selected:
HEBREO 10: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
