GENESIS 35
35
Ang Dios Nagapakamaayo kay Jacob sa Bet-el
1Ang Dios nagsiling kay Jacob, “Tindug ka, taklad sa Bet-el, kag puyo didto; kag himo didto sing halaran sa Dios nga nagpahayag sa imo sang nagpalagyo ka gikan kay Esau nga imo utud.”#Gen. 28:11-17. 2Gani si Jacob nagsiling sa iya panimalay kag sa tanan nga upud niya, “Isikway ang tanan nga dios nga dumuloong nga yara sa inyo, kag paninlo kamo, kag ilisi ang inyo mga panapton; 3niyan magtindug kita kag magtaklad pa Bet-el, agud magahimo ako didto sing halaran sa Dios nga nagsabat sa akon sa adlaw sang akon kalisdanan kag nag-upud sa akon sa dalanon nga ginlaktan ko.” 4Gani ginhatag nila kay Jacob ang tanan nga dios nga dumuloong nga yara sa ila, kag ang mga aritos nga yara sa ila mga dulunggan; kag si Jacob nagtago sa ila sa idalum sang terebinto nga yara sa luyo sang Siquem.
5Kag sang nagpanlakatan sila, ang kakugmat gikan sa Dios yara sa kabanwaanan sa palibut nila, gani wala nila paglagsa ang mga anak ni Jacob. 6Kag si Jacob nag-abut sa Luz (ini amo, ang Bet-el), nga yara sa duta sang Canaan, sia kag ang tanan nga katawohan nga upud sa iya, 7kag nagpatindug sia didto sing halaran, kag ginhingalanan ang duug El-Bet-el,#35:7 Kag sayoron Ang Dios sang Bet-el. bangud nga didto nagpahayag sa iya ang Dios sang sia nagpalagyo gikan sa iya utud. 8Kag napatay si Debora nga sisiwa ni Rebeca, kag ginlubung sia sa ubus sang Bet-el sa idalum sang terebinto; gani ang ngalan sini Allon-bacut.#35:8 Kon sayoron Ang terebinto sang paghibi.
9Nagpahayag liwat ang Dios kay Jacob, sang pag-abut niya gikan sa Padan-aram, kag ginpakamaayo sia. 10Kag ang Dios nagsiling sa iya, “Ang imo ngalan Jacob; indi na pagtawgon ang imo ngalan Jacob, kondi Israel ang imo ngalan.”#Gen. 32:28. Gani ginhingalanan sia Israel. 11Kag ang Dios nagsiling sa iya, “Ako ang Makaako nga Dios: magmabungahon kag magmabuaron ka; isa ka pungsud kag isa ka hut-ong sang mga pungsud magagikan sa imo, kag mga hari magagowa sa imo mga balikawang. 12Ang duta nga ginhatag ko kay Abraham kag kay Isaac ihatag ko sa imo, kag sa imo mga kaliwatan sa olihi nimo ihatag ko ang duta.”#Gen. 17:4-8. 13Niyan nagpaibabaw ang Dios gikan sa iya sa duug diin nagpamolong sia sa iya. 14Kag si Jacob nagpatindug sing haligi sa duug diin nagpamolong sia sa iya, isa ka haliging bato; kag ginboboan niya sa ibabaw sini sing halad nga ilimnon, kag ginboboan sing lana. 15Gani ginhingalanan ni Jacob ang duug sa diin ang Dios nagpamolong sa iya, Bet-el.#Gen. 28:18-19.
Ang Pagkapatay ni Raquel
16Niyan nagpanlakatan sila gikan sa Bet-el; kag sang may diotay pa nga lalakton pakadto sa Efrata, si Raquel ginsakitan, kag gin-iwatan sia.#Jer. 31:15. 17Kag sang gin-iwatan sia, nagsiling sa iya ang partera, “Dili ka mahadluk; kay karon maga-anak ka sing isa pa ka lalaki.” 18Kag sang nagataliwan ang iya kalag (kay napatay sia), ginhingalanan niya sia Ben-oni;#35:18 Kon sayoron Ang anak sang akon kasubo. apang ginhingalanan sia sang iya amay Benjamin#35:18 Kon sayoron Ang anak sang too nga kamut ukon Ang anak sang Bagatnan. 19Gani si Raquel napatay, kag ginlubung sa dalanon pa Efrata (nga amo, Bet-lehem), 20kag ginpatindugan ni Jacob sing haligi sa ibabaw sang iya lulubngan; ini amo man ang haligi sang lulubngan ni Raquel tubtub sining adlaw. 21Nagpanlakatan si Israel, kag naghumlad sang iya layanglayang sa unhan sang torre sang Eder.
Ang mga Anak ni Jacob
(1 Cron. 2:1-2)
22Sang nagpuyo si Israel sa sadtong duta si Ruben nagkadto sa paghulid kay Bilha nga babayi sang iya amay; kag nabatian ini ni Israel.
Karon ang mga anak nga lalaki ni Israel napulog duha. 23Ang mga lalaking anak ni Lea: si Ruben (panganay ni Jacob), kag si Simeon, si Levi, si Juda, si Isacar, kag si Zabulon. 24Ang mga lalaking anak ni Raquel: si Jose kag si Benjamin. 25Ang mga lalaking anak ni Bilha, alagad nga babayi ni Raquel: si Dan kag si Neftali. 26Ang mga lalaking anak ni Zilpa, alagad nga babayi ni Lea: si Gad kag si Aser. Ini sila amo ang mga lalaking anak ni Jacob nga natawo sa iya sa Padan-aram.
Ang Pagkapatay ni Isaac
27Kag nagkadto si Jacob kay Isaac nga iya amay sa Mamre, ukon Kiryat-arba (nga amo, Hebron), diin nagpanlugayaw si Abraham kag si Isaac.#Gen. 13:18. 28Karon ang kaadlawan ni Isaac isa ka gatus kag kawaloan ka tuig. 29Kag nabugto ang ginhawa ni Isaac; kag napatay kag ginsimpon sa iya katawohan, tigulang kag puno sa kaadlawan; kag ginlubung sia ni Esau kag ni Jacob nga iya mga anak.
Currently Selected:
GENESIS 35: ABHIL82
Highlight
Share
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society