GALACIA 5
5
Tindug sing Malig-on sa Kahilwayan
1Tungud sa kahilwayan ginhilway kita ni Cristo; busa magtindug kamo sing malig-on, kag dili magpagota liwat sa kahiolipnan.
2Karon ako, si Pablo, nagasiling sa inyo nga kon magpacircuncidar kamo, si Cristo manginwalay pulus sa inyo. 3Nagapamatuud ako liwat sa tagsa ka tawo nga nagapacircuncidar nga may katungdanan sia sa pagtuman sang bug-os nga kasogoan. 4Nahamulag kamo kay Cristo, kamo nga buut magpakamatarung paagi sa kasogoan; naholog kamo gikan sa bugay. 5Kay paagi sa Espiritu, bangud sa pagtoo, kita nagahulat sang paglaum sang pagkamatarung. 6Kay sa kay Cristo Jesus ang circuncision ukon ang dicircuncision walay bisan ano nga kapuslanan, kondi ang pagtoo nga nagahikot paagi sa gugma. 7Nagdalagan kamo sing maayo; sin-o bala ang nag-upang sa inyo gikan sa pagtuman sang kamatooran? 8Ining pagpatalupangud wala magikan sa iya nga nagtawag sa inyo. 9Ang diotay nga tapay nagalatum sang bug-os nga linamas.#1 Cor. 5:6. 10May pagsalig ako sa inyo sa Ginoo, nga indi kamo magpanghunahuna sa lain nga bagay; apang ang nagatublag sa inyo, bisan sin-o sia, magaantus sang pagsilot sa iya. 11Apang ako, mga kauturan, kon nagawali pa sang circuncision, ngaa bala ginahingabut pa ako? Niyan ang kahigayonan sa kasandad sang cruz nakuha. 12Kabay nga ang mga nagatublag sa inyo maghimo sing labi pa sa circuncision!
13Kay kamo, mga kauturan, gintawag sa kahilwayan; lamang nga indi paggamita ang inyo kahilwayan nga kahigayonan sa unud, kondi paagi sa gugma mag-inalagaray kamo. 14Kay ang bug-os nga kasogoan natuman sa isa ka polong, “Higugmaa ang imo isigkatawo subong sang imo kaugalingon.”#Lev. 19:18. 15Kag kon magkinagtanay kag magkinaunay kamo, mag-andam nga indi kamo malaglag ang isa sang isa.
Ang Bunga sang Espiritu kag ang mga Buhat sang Unud
16Apang nagasiling ako, maggawi sa Espiritu, kag dili ninyo pagtumana ang kailigbon sang unud. 17Kay ang mga handum sang unud batok sa Espiritu, kag ang mga handum sang Espiritu batok sa unud; kag ini sila nagasumpunganay, agud nga indi ninyo mahimo ang mga butang nga buut ninyo.#Roma 7:15-23. 18Apang kon ginatuytuyan kamo sang Espiritu, wala kamo sa idalum sang kasogoan. 19Karon hayag ang mga buhat sang unud, nga amo: pagkamakihilawason, pagkahigko, pagkaulag, 20pagkadiwatahan, pagkababaylan, kaawayon, pagpinuyas, kaimon, kasingkal, pagbinahinbahin, katuhaytuhayan, herejia, 21pagkahisa, paghoboghobog, magansal nga kinalipay, kag ang kaangay sini. Ginapaandaman ko kamo, subong nga ginpaandaman ko kamo, nga ang nagahimo sang amo nga mga butang indi makapanubli sang ginharian sang Dios. 22Apang ang bunga sang Espiritu amo ang gugma, kalipay, paghidait, pagbatas, pagkalolo, pagkaayo, pagkatutum, 23pagkamapainubuson, pagpugung sang kaugalingon; batok sa amo walay kasogoan. 24Kag ang mga yara kay Cristo Jesus naglansang sang unud sa cruz kaupud sang iya balatyagon kag mga kailigbon.
25Kon nagakabuhi kita sa Espiritu, maggawi man kita sa Espiritu. 26Dili kita magpadayawdayaw, nga nagahangkatanay, nga nagahinisaay.
Currently Selected:
GALACIA 5: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
