EXODO 17

Ang Tubig gikan sa Igang

1Naglakat halin sa kamingawan sang Sin ang bug-os nga katilingban sang katawohan sang Israel sono sa ila mga pagdologdolog, sono sa sogo sang Ginoo, kag nagpahamtang sila sing dologan sa Refidim; apang wala sing tubig nga imnon sang katawohan. 2Busa ang katawohan nagpakasayup kay Moises, kag nagsiling, “Hatagi kami sing tubig nga imnon namon.” Kag si Moises nagsiling sa ila, “Ngaa bala nga ginapakasayup ninyo ako? Ngaa bala nga ginasulay ninyo ang Ginoo” 3Apang didto ang katawohan gin-uhaw sing tubig, kag nagkumud ang katawohan batok kay Moises, kag nagsiling, “Ngaa bala nga ginpagowa mo kami gikan sa Egipto, sa pagpatay sa amon kag sa amon kabataan kag sa amon kahayupan sa kauhaw?” 4Gani nagtuaw si Moises sa Ginoo, “Ano bala ang himoon ko sa sining katawohan? Daw batohon na nila ako.” 5Kag ang Ginoo nagsiling kay Moises, “Una ka sa katawohan, kag magdala upud sa imo sang mga tigulang sang Israel; kag ang imo sungkud nga ginhampak mo sa Nilo, dalha sa imo kamut, kag lakat ka. 6Yari karon, ako magatindug sa atubangan nimo didto sa ibabaw sang bato sa Horeb; kag hampakon mo ang bato, kag magagowa sa sini ang tubig, agud nga mag-inum ang katawohan.” Kag ginhimo ni Moises ang subong sini, sa itololok sang mga tigulang sang Israel. 7Kag ginhingalanan niya yadtong duug Masa#17:7 Kon sayoron Pagpamatuud. kag Meriba,#17:7 Kon sayoron Panuay. bangud sang pagpangita sing sayup sang mga anak sang Israel, kag bangud nga ginsulay nila ang Ginoo sa pagsiling, “Yari bala ang Ginoo sa tunga naton ukon wala?”#Num. 20:2-13.

Ang Inaway batok kay Amalec

8Niyan nag-abut si Amalec kag nag-away batok sa Israel sa Refidim. 9Kag si Moises nagsiling kay Josue, “Pili ka sing mga tawo sa aton, kag gowa, awaya si Amalec; buwas magatindug ako sa putokputokan sang bakolod nga yara ang sungkud sang Dios sa akon kamut.” 10Gani ginhimo ni Josue sono sa ginsiling sa iya ni Moises, kag nagpakig-away kay Amalec; kag si Moises, si Aaron, kag si Hur nagtukad sa putokputokan sang bakolod. 11Kon si Moises magbayaw sang iya kamut, ang Israel nagdaug; kag kon iholog niya ang iya kamut, si Amalec nagdaug. 12Apang kinapoy ang mga kamut ni Moises; gani nagkuha sila sing bato kag ginbutang ini sa idalum niya, kag naglingkod sia sa sini, kag si Aaron kag si Hur nagtib-ong sang iya mga kamut, ang isa sa isa ka kilid, kag ang isa sa isa ka kilid; gani ang iya mga kamut nagpadayon nga nabayaw tubtub sa pagtunud sang adlaw. 13Kag ginlaglag ni Josue si Amalec kag ang iya katawohan sa sulab sang espada.

14Kag ang Ginoo nagsiling kay Moises, “Isulat ini sa tolon-an subong nga handumanan kag basahon, ini sa idulungug ni Josue, nga panason ko sing totoo ang handumanan ni Amalec gikan sa idalum sang langit.”#Deut. 25:17-19; 1 Sam. 15:2-9. 15Kag si Moises nagpatindug sing halaran kag ginhingalanan niya ini, ang Ginoo akon hayahay, 16nga nagasiling, “Isa ka kamut sa hayahay sang Ginoo! Ang Ginoo magapakig-away kay Amalec gikan sa kaliwatan pa kaliwatan.”

Currently Selected:

EXODO 17: ABHIL82

Highlight

Copy