EXODO 16

Ang Dios Nagahatag sang Mana

1Nagpanlakatan sila gikan sa Elim, kag ang bug-os nga katilingban sang katawohan sang Israel nag-abut sa kamingawan sang Sin, nga yara sa ulut sang Elim kag sang Sinai, sa ikapulo kag lima nga adlaw sang ikaduha nga bulan sa tapus nga nakagowa sila sa duta sang Egipto. 2Kag ang bug-os nga katilingban sang katawohan sang Israel nagkumud batok kay Moises kag kay Aaron sa kamingawan, 3kag nagsiling sa ila, “Kuntani nagkalamatay kami sa kamut sang Ginoo sa duta sang Egipto, sang kami nagalingkod sa luyo sang mga lalagaan sang unud kag nagakaon sing tinapay tubtub mabusug; kay gindala ninyo kami sa sining kamingawan sa pagpatay sa gutum sining bug-os nga katilingban.”

4Niyan ang Ginoo nagsiling kay Moises, “Yari karon, paulanon ko sa inyo ang tinapay gikan sa langit;#Juan 6:31. kag ang katawohan magagowa kag magatipon sa adlawadlaw sang bahin sa tagsa ka adlaw, agud nga akon sila matilawan, kon magalakat sila sa akon kasogoan ukon indi. 5Sa ikan-um nga adlaw, sang nagaaman sila sang ila matipon, manginpilo ini sa kadamuon nga ila matipon sa tagsa ka adlaw.” 6Gani nagsiling si Moises kag si Aaron sa tanan nga katawohan sang Israel, “Sa kahaponon makilala ninyo nga ang Ginoo nagpagowa sa inyo gikan sa duta sang Egipto, 7kag sa kaagahon makita ninyo ang himaya sang Ginoo, kay sia nagapamati sang inyo mga pagkumud batok sa Ginoo. Kay ano bala kami, nga nagakumud kamo batok sa amon?” 8Kag si Moises nagsiling, “Kon ang Ginoo maghatag sa inyo sa kahaponon sing unud nga kaonon, kag sa kaagahon tinapay nga makabusug, kay ang Ginoo nakabati sang inyo mga pagkumud nga ginkumud ninyo batok sa iya—ano bala kami? Ang inyo mga pagkumud indi batok sa amon kondi batok sa Ginoo.”

9Kag si Moises nagsiling kay Aaron, “Isiling sa bug-os nga katilingban sang katawohan sang Israel, ‘Palapit kamo sa atubangan sang Ginoo, kay sia nakabati sang inyo mga pagkumud.’” 10Kag sang nagpamolong si Aaron sa bug-os nga katilingban sang katawohan sang Israel, naglantaw sila nayon sa kamingawan, kag yari karon, ang himaya sang Ginoo nagpahayag sa panganud. 11Kag ang Ginoo nagsiling kay Moises, 12“Ako nakabati sang mga pagkumud sang katawohan sang Israel; isiling sa ila, ‘Sa kahaponon magakaon kamo sing unud, kag sa kaagahon busgon kamo sing tinapay; niyan mahibaloan ninyo nga Ako ang Ginoo nga inyo Dios.’”

13Sa kahaponon nagsaka ang mga pitaw kag naghil-ob sang dologan; kag sa kaagahon ang ton-og yara sa palibut sang dologan. 14Kag sang naghayaw ang ton-og, sa kadaygan sang kamingawan may diotay nga matipolon nga butang, diotay subong sang binukbuk nga hielo sa ibabaw sang duta. 15Sang nakita ini sang katawohan sang Israel, nagsinilingay sila, “Ano bala ini?”#16:15 Ukon “Ini mana.” Kay wala sila makakilala kon ano yadto. Kag si Moises nagsiling sa ila, “Amo ini ang tinapay nga ginhatag sang Ginoo nga kaonon ninyo. 16Ini amo ang butang nga ginsogo sang Ginoo: ‘Pamolot kamo sini, ang tagsa ka tawo sono sa iya makaon; isa ka omer sa tagsa ka tawo, sono sa kadamuon sang inyo mga tawo, magakuha kamo sini, ang tagsa ka tawo tungud sa mga yadto sa iya layanglayang.’” 17Kag ang katawohan sang Israel naghimo sing subong sini; nagpamolot sila, ang iban madamu, ang iban diotay. 18Apang sang ginsukub nila ini sa omer, ang nagpamolot sing madamu wala sing kapin, kag ang nagpamolot sing diotay wala sing kulang;#2 Cor. 8:15. ang tagsa ka tawo nagpamolot sono sa iya makaon. 19Kag si Moises nagsiling sa ila, “Wala sing tawo nga magbilin sini tubtub sa aga.” 20Apang wala sila magpamati kay Moises; ang iban sa ila nagbilin sini tubtub sa aga, kag gin-udlan ini kag nagpan-us; kag nagsingkal batok sa ila si Moises. 21Nagpamolot sila sini agaaga, ang tagsa ka tawo sono sa iya makaon; apang sang nag-init ang adlaw, natunaw ini.

22Sa adlaw nga ikan-um nagpamolot sila sing pilo nga kadamuon sang tinapay, duha ka omer sa tagsatagsa; kag sang nagkadto ang tanan nga pangolo sang katilingban kag nagsugid kay Moises, 23sia nagsiling sa ila, “Ini amo ang ginsogo sang Ginoo: ‘Buwas amo ang maligdong nga pahuway, balaan nga inugpahuway sa Ginoo;#Ex. 20:8-11. bibingkaha ninyo ang inyo bibingkahon kag laga-a ang inyo lalaga-on, kag ang tanan nga mabilin itigana tubtub sa aga.’” 24Gani gintigana nila ini tubtub sa aga, sono sa ginsogo ni Moises; kag wala magpan-us, kag wala pag-udla ini. 25Si Moises nagsiling, “Kaona ninyo ini karon nga adlaw, kay karon nga adlaw inugpahuway sa Ginoo; karon nga adlaw indi kamo makakita sini sa latagon. 26Sa anum ka adlaw magapamolot kamo sini; apang sa ikapitong adlaw, nga amo ang inugpahuway, wala sini.” 27Sa adlaw nga ikapito ang iban nga katawohan naggowa sa pagpamolot, kag wala sila sing nakita. 28Kag ang Ginoo nagsiling kay Moises, “Tubtub pa bala san-o magadumili kamo sa pagtuman sang akon mga sogo kag akon mga kasogoan? 29Tan-awa! Ang Ginoo naghatag sa inyo sang inugpahuway, busa nagahatag sia sa inyo sa ikan-um nga adlaw sang tinapay sa duha ka adlaw; magpabilin ang tagsa ka tawo sa iya duug, dili maghalin ang bisan sin-ong tawo sa iya duug sa adlaw nga ikapito.” 30Gani nagpahuway ang katawohan sa adlaw nga ikapito.

31Karon ang panimalay sang Israel naghingalan sini mana; kaangay ini sang liso nga culantro, maputi, kag ang iya lalim subong sang tinapay nga manipis nga may dugus.#Num. 11:7-8. 32Kag si Moises nagsiling, “Ini amo ang ginsogo sang Ginoo: ‘Isa ka omer sini tagoon sa inyo bug-os nga mga kaliwatan, agud nga makita nila ang tinapay nga ginpakaon ko sa inyo sa kamingawan, sang pagpagowa ko sa inyo gikan sa duta sang Egipto.’” 33Kag si Moises nagsiling kay Aaron, “Kuha ka sing kolon, kag butangi sing isa ka omer sang mana,#Heb. 9:4. kag ibutang ini sa atubangan sang Ginoo, nga tagoon sa inyo bug-os nga mga kaliwatan.” 34Sono sa ginsogo sang Ginoo kay Moises, sa amo si Aaron nagbutang sini sa atubangan sang Pagpamatuud, nga tagoon. 35Kag nagkaon sang mana ang katawohan sang Israel sing kap-atan ka tuig, tubtub nga nag-abut sila sa duta nga ginapuy-an; nagkaon sila sang mana, tubtub nga nagsulud sila sa mga ginsakpan sang duta sang Canaan.#Jos. 5:12. 36(Karon ang omer ikapulo nga bahin sang efa.)

Currently Selected:

EXODO 16: ABHIL82

Highlight

Copy