MANUGWALI 9
9
1Kay ini tanan ginpahamtang ko sa akon tagiposoon, sa pag-usisa sini tanan, nga ang matarung kag ang maalam kag ang ila binuhatan yara sa kamut sang Dios; bisan ini gugma ukon dumut ang tawo wala makahibalo sini. Ang tanan yara sa atubangan nila kadayawan, 2sanglit isa lang ka kapalaran ang nagaabut sa tanan, sa matarung kag sa malauton, sa maayo kag sa malain, sa matinlo kag sa dimatinlo, sa nagahalad kag sa wala nagahalad. Subong sang maayo, amo man ang makasasala; kag ang nagasumpa subong sang nagakahadluk sang sumpa. 3Ini malaut sa tanan nga ginahimo sa idalum sang adlaw, nga may isa ka hitabu sa tanan; ang tagiposoon man sang mga anak sang mga tawo puno sang malaut, kag ang kabuangan yara sa ila tagiposoon samtang nga nagakabuhi sila, kag sa tapus sina nagakadto sila sa mga patay. 4Apang sa iya nga nagasimpon sa tanan nga mga buhi may paglaum, kay maayo pa ang ido nga buhi sang sa leon nga patay. 5Kay ang buhi nakahibalo nga mapatay sila, apang ang patay wala makahibalo sang bisan ano, kag wala na sila sing balus; kay ang ila handumanan nalimtan. 6Subong man ang ila gugma kag ang ila dumut kag ang ila kahisa nawala sing dugay na, kag wala na sila sing bahin sa gihapon sa bisan anong butang nga ginahimo sa idalum sang adlaw.
7Lakat ka, magkaon nga may kalipay sang imo kalan-on, kag mag-inum nga may malipayon nga tagiposoon sang imo alak; kay ang Dios nagbaton na sang imo mga binuhatan.
8Magmaputi ang imo mga panapton sa dalayon; dili pagpakawad-i sing lana ang imo olo.
9Magkabuhi sing malipayon upud sa asawa nga imo ginahigugma, sa tanan nga adlaw sang imo kabuhi nga kadayawan nga ginhatag niya sa imo sa idalum sang adlaw, sa tanan mo nga adlaw nga kadayawan, kay ina amo ang imo bahin sa kabuhi kag sa imo kinabudlayan nga ginapangabudlayan mo sa idalum sang adlaw. 10Ang bisan ano nga makita nga himoon sang imo kamut, himoa ini sa imo gahum; kay sa Sheol nga imo ginakadtoan walay buluhaton ukon pahito ukon ihibalo ukon kaalam.
11Nagliso ako kag nakita ko sa idalum sang adlaw nga ang palumba indi sa madasig, ukon ang inaway sa makusug, kag indi man ang kalan-on sa maalam, ukon ang manggad man sa mga tawo nga mahangponon, ukon ang kahamuut man sa mga tawo nga sampaton; kondi ang tion kag ang kahigayonan nagakahanabu sa ila tanan. 12Kay ang tawo man wala makahibalo sang iya tion. Subong sang mga isda nga ginadakup sa malaut nga pukot, kag subong sang mga pispis nga ginadakup sa siod, amo man ang mga anak sang mga tawo ginasiod sa malaut nga tion, kon ini mahanabu sa ila sing hinali.
13Nakita ko man ang kaalam sa idalum sang adlaw sa sining bagay, kag ini daw daku sa akon. 14May banwa nga diotay kag pila ka tawo sa sulud sini; kag may nag-abut nga daku nga hari batok sini kag ginkibon ini, kag nagpatindug sing dalagku nga mga pamakud batok sini. 15Karon may nakita sa sulud sini nga isa ka imol nga maalam nga tawo, kag sia tungud sa iya kaalam nagluwas sang banwa. Apang wala sing tawo nga nakadumdum sadto gid nga imol nga tawo. 16Niyan nagsiling ako nga ang kaalam maayo pa sa kusug, wala sing sapayan nga ang kaalam sang imol ginahikayan, kag ang iya mga polong wala ginapamatii.
17Ang mga polong sang maalam nga nabatian sa mahinay maayo pa sang singgit sang nagagahum sa mga buangbuang. 18Ang kaalam maayo pa sa mga hinganiban sang inaway, apang ang isa ka makasasala nagalaglag sing madamu nga kaayohan.
Currently Selected:
MANUGWALI 9: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
