MANUGWALI 8
8
1Sin-o bala ang subong sang maalam nga tawo?
Kag sin-o bala ang nakahibalo sang kasaysayan sang butang?
Ang kaalam sang tawo nagapasilak sang iya nawung,
kag ang katig-a sang iya nawung nagabalhin.
2Bantayi ang sogo sang hari, kag ina nga nahanungud sa sumpa sang Dios; 3dili ka magdalidali sa paghalin sa atubangan niya, dili ka magpadayon sa butang nga malaut, kay ginahimo niya ang bisan anong butang nga nahamut-an niya. 4Kay ang polong sang hari may gahum, kag sin-o bala ang makasiling sa iya, “Ano bala ang ginahimo mo?” 5Ang bisan sin-o nga nagabantay sang sogo indi makakilala sang butang nga malaut, kag ang tagiposoon sang maalam nga tawo nagakilala sang tion kag paghukom. 6Kay sa tagsa ka katuyoan may tion kag paghukom, bangud nga ang pagkakailo sang tawo daku sa iya. 7Kay wala sia makahibalo sang mahanabu, kay sin-o bala ang makasugid sa iya kon paano ang pagkahanabu sini? 8Walay tawo nga may gahum sa espiritu sa pagpugung sang espiritu, kag wala sia sing gahum sa adlaw sang kamatayon; walay pagbuhi sa inaway, kag walay pagkamalaut nga magaluwas sa iya nga natugyan sa sini. 9Ini tanan nakita ko kag gintuhoy ang akon tagiposoon sa tagsa ka buluhaton nga ginahimo sa idalum sang adlaw, samtang ang isa ka tawo may gahum sa isa sa iya kasamaran.
Ang Pagkadi-alangay sang Kabuhi
10Niyan nakita ko ang malauton nga ginlubung; nagasulud kag nagagowa anay sila sa balaan nga duug, kag gindayaw sa banwa diin sila naghimo sang amo nga mga butang. Ini man kadayawan. 11Bangud nga ang paghukom batok sa malaut nga buhat wala ginahikot sing madali, busa ang tagiposoon sang mga anak sang mga tawo natuhoy sing bug-os sa ila sa paghimo sing malaut. 12Bisan ang makasasala maghimo sing malaut sing makaisa ka gatus kag maglawig ang iya mga adlaw, apang sa pagkamatuud nakahibalo ako nga manginmaayo sa mga nagakahadluk sa Dios, bangud nga nagakahadluk sila sa atubangan niya; 13apang indi manginmaayo sa malauton, kag indi sia magpalawig sang iya mga adlaw nga subong sang landong, bangud nga wala sia nagakahadluk sa atubangan sang Dios.
14May kadayawan nga ginahimo sa duta, nga may matarung nga mga tawo nga sa ila nagakahanabu ini sono sa binuhatan sang malauton, kag may malauton nga mga tawo nga sa ila nagakahanabu ini sono sa binuhatan sang matarung. Nagsiling ako nga ini man kadayawan. 15Niyan ginpakamaayo ko ang kinasadya, bangud nga ang tawo wala na sing maayo pa nga butang sa idalum sang adlaw sang sa magkaon, kag mag-inum, kag magmalipayon, kay ina magapabilin sa iya pagpangabudlay sa tanan nga adlaw sang iya kabuhi nga ginhatag sa iya sang Dios sa idalum sang adlaw.
16Sang gintuhoy ko ang akon tagiposoon sa paghibalo sang kaalam, kag sa pagtan-aw sang palangitan-an nga ginahimo sa duta, kay may yara man nga bisan sa adlaw ukon sa gab-i indi makakita sing katologon sa iya mga mata; 17niyan nakita ko ang bug-os nga binuhatan sang Dios, nga ang tawo indi makatungkad sang buluhaton nga ginahimo sa idalum sang adalw. Bisan daw ano gid nga pagpangabudlay sang tawo sa pagpangita sini, indi gid sia makakita sini; bisan ang maalam nga tawo nagahunahuna sa paghibalo sini, indi gid sia sarang makakita sini.
Currently Selected:
MANUGWALI 8: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
