MANUGWALI 1
1
Ang Tanan Kadayawan
1Ang mga polong sang Manugwali, ang anak ni David, hari sa Jerusalem.
2Kadayawan sang mga kadayawan, nagasiling ang Manugwali,
kadayawan sang mga kadayawan! Ang tanan kadayawan.
3Ano bala ang kapuslanan nga iya sang tawo sa tanan niya nga pagpangabudlay
diin nagapangabudlay sia sa idalum sang adlaw?
4Ang isa ka kaliwatan nagataliwan, kag ang isa pa ka kaliwatan nagaabut,
apang ang duta nagapabilin sa gihapon.
5Ang adlaw man nagabutlak kag ang adlaw nagasalup,
kag nagadali sa iya duug diin sia nagabutlak.
6Ang hangin nagahuyup nayon sa bagatnan,
kag nagabalik pa aminhan;
nagabuyong sing dalayon sa iya alagyan,
kag ang hangin nagabalik liwat sa iya mga lilibutan.
7Ang tanan nga suba nagailig pakadto sa dagat,
apang ang dagat wala mapuno;
sa duug diin ang mga suba nagakadto,
didto nagabalik sila.
8Ang tanan nga butang puno sang pagkalapyo;
ang tawo indi makamitlang sini;
ang mga mata indi mabusug sa pagtan-aw,
ukon ang mga idulungug mapuno sa pagpamati.
9Ang nagligad na amo ang magaabut,
kag ang nahimo na amo ang himoon;
kag wala sing bag-o nga butang sa idalum sang adlaw.
10May butang bala nga nahanungud sa iya sarang masiling,
“Tan-awa, bag-o ini”?
Nahimo na ini sing dugay na,
sa mga katuigan nga una sa aton.
11Wala sing pagdumdum sang una nga mga kaliwatan,
kag wala sing pagdumdum
sang olihi nga mga kaliwatan nga magaabut
sa tunga sang mga magaabut sa olihi.
Ang Pinaniiran sang Manugwali
12Ako nga Manugwali hari anay sa Israel sa Jerusalem. 13Kag gintugyan ko ang akon tagiposoon sa pagpangita kag pag-usisa tungud sa kaalam nahanungud sang tanan nga ginahimo sa idalum sang langit; ini tama nga kasakit nga ginhatag sang Dios sa mga anak sang mga tawo nga hanason sila sa sini. 14Nakita ko ang tanan nga buluhaton nga ginahimo sa idalum sang adlaw; kag yari karon, ang tanan kadayawan kag pagpanikasug sa hangin.
15Ang tiko indi mapatadlong,
kag ang nakulang indi sarang maisip.
16Nagpatugsiling ako sa akon kaugalingon nga tagiposoon, “Nakaagum ako sing daku nga kaalam, labaw sa tanan nga una sa akon sa Jerusalem; kag ang akon tagiposoon nakaangkon sing daku nga agi sang kaalam kag ihibalo.”#1 Hari 4:29-31. 17Kag gintugyan ko ang akon tagiposoon sa pagkilala sang kaalam kag sa pagkilala sang pagkabuang kag kabuangan. Nahantupan ko nga ini man pagpanikasug sa hangin.
18Kay sa tama nga kaalam may tama nga kalisud,
kag ang nagadugang sing ihibalo nagadugang sing kasubo.
Currently Selected:
MANUGWALI 1: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
