DEUTERONOMIO 15
15
Ang Tuig sang Paghilway
(Lev. 25:1-38)
1“Sa katapusan sang tagpito ka tuig maghimo ka sing paghilway. 2Kag ini amo ang bagay sang paghilway: ang tagsa ka nautangan maghilway sang iya napahulam sa iya isigkatawo; dili niya pagsukton ini sa iya isigkatawo kag sa iya utud, bangud nga nabantala na ang paghilway sang Ginoo. 3Sa dumuloong makasukut ka sini; apang ang bisan ano nga imo nga yara sa imo utud hilwayon ini sang imo kamut. 4Apang manginwala sing imol kaupud nimo (kay ang Ginoo magapakamaayo gid sa imo sa duta nga ginhatag sa imo nga panublion sang Ginoo nga imo Dios sa pagtag-iya sa iya), 5kon lamang magpamati ka sing makugi sa tingug sang Ginoo nga imo Dios, sa pagbantay sa paghimo sini tanan nga sogo nga ginasogo ko sa imo sini nga adlaw. 6Kay pakamaayohon ka sang Ginoo nga imo Dios, sono sa ginsaad niya sa imo, kag magpahulam ka sa madamu nga mga pungsud, apang dili ka magpanghulam; kag maggahum ka sa madamu nga mga pungsud, apang dili sila maggahum sa imo.
7“Kon may yara sa imo nga imol, isa sang imo mga utud, sa sulud sang bisan diin sang imo mga gawang sa imo duta nga ginahatag sa imo sang Ginoo nga imo Dios, dili mo pagpatig-ahon ang imo tagiposoon ukon kuumon ang imo kamut gikan sa imo utud nga imol, 8kondi humlaron mo sa pagkamatuud ang imo kamut sa iya, kag pahulamon mo gid sia sing tuman sa iya kinahanglanon nga ginakinahanglan niya.#Lev. 25:35. 9Mag-andam ka nga wala sa imo tagiposoon sing malain nga panghunahuna, nga nagasiling, ‘Ang ikapito nga tuig, ang tuig sang paghilway malapit na,’ kag magmalaut ang imo mata batok sa imo utud nga imol, kag indi mo sia paghatagan, kag magtuaw sia sa Ginoo batok sa imo, kag ini manginsala sa imo. 10Hatagan mo sia sing totoo, kag dili magkasakit ang imo tagiposoon kon maghatag ka sa iya; bangud nga tungud sini nga butang pakamaayohon ka sang Ginoo nga imo Dios sa tanan mo nga buluhaton kag sa tanan nga buhaton sang imo kamut. 11Kay ang imol indi madula sa duta;#Mat. 26:11; Mar. 14:7; Juan 12:8. busa nagasogo ako sa imo, Paghumlaron mo sing totoo ang imo kamut sa imo utud, sa makalolooy kag sa imol, sa imo duta.
Ang Pagkabig sang mga Ulipon
(Ex. 21:1-11)
12“Kon ang imo utud nga lalaki ukon babayi nga Hebreo mabaligya sa imo, kag mag-alagad sa imo sing anum ka tuig, niyan sa ikapito nga tuig hilwayon mo sia sa imo. 13Kag kon hilwayon mo sia sa imo, dili mo sia pagpalakton nga walay dala; 14sangkapan mo sia sing maalwanon gikan sa imo panong, gikan sa imo linasan, kag gikan sa imo linasan sang uvas; hatagan mo sia sono sa napakamaayo sa imo sang Ginoo nga imo Dios. 15Magdumdum ka nga ikaw nangin-ulipon sa duta sang Egipto, kag ang Ginoo nga imo Dios nagtubus sa imo; busa ginasogo ko ining butang sa imo karon nga adlaw. 16Apang kon sia magsiling sa imo, ‘Indi ako maghalin sa imo,’ bangud nga ginahigugma niya ikaw kag ang imo panimalay, bangud nga maayo sia sa imo, 17niyan magkuha ka sing dulat, kag tohogon mo sini ang iya dulunggan sa ganhaan, kag mangin-ulipon mo sia sing dayon. Kag amo ini man ang himoon mo sa imo ulipon nga babayi. 18Dili pagkabigon nga maiwat ini sa imo, kon hilwayon mo sia sa imo; kay nag-alagad sia sa imo sing anum ka tuig sa pilo nga sohol sang sinoholan. Gani ang Ginoo nga imo Dios magapakamaayo sa imo sa tanan nga ginabuhat mo.#Lev. 25:39-46.
Ang Paghalad sang mga Panganay
19“Pakabalaanon mo sa Ginoo nga imo Dios ang tanan nga panganay nga lalaki#Ex. 13:12. nga gin-anak sa imo kabakahan kag sa imo panong; dili mo pagpapangabudlayon ang panganay sang imo kabakahan, kag dili mo pag-alotan ang panganay sang imo panong. 20Kaonon mo ini tuigtuig, ikaw kag ang imo panimalay, sa atubangan sang Ginoo nga imo Dios sa duug nga pilion sang Ginoo. 21Apang kon may bisan anong kasawayan ini, subong nga piang ukon bulag, ukon anong malaut nga kasawayan, dili mo pag-ihalad ini sa Ginoo nga imo Dios. 22Kaonon mo ini sa sulud sang imo mga gawang; ang dimatinlo kag ang matinlo magakaon sini sing alangay, subong sang gacela kag sang usa. 23Lamang dili mo pagkaonon ang iya dugo;#Gen. 9:4; Lev. 7:26-27; 17:10-14; 19:26; Deut. 12:16, 23. ulaon mo ini sa duta subong sang tubig.
Currently Selected:
DEUTERONOMIO 15: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
