2 SAMUEL 13
13
Si Amnon kag si Tamar
1Karon sa tapus sini si Absalom nga anak ni David, may maayoayo nga utud nga babayi, nga ginhingalanan Tamar; kag ginhigugma sia ni Amnon nga anak ni David. 2Kag si Amnon nagpalibog sing tama sa bagay nga nagbalatian sia bangud kay Tamar nga iya utud; kay sia ulay, kag daw tama kaiwat kay Amnon ang paghimo sing bisan ano nga butang sa iya. 3Apang si Amnon may abyan, nga ginhingalanan si Jonadab, ang anak ni Simea, utud ni David; kag si Jonadab tawo nga tama gid kalalang. 4Kag sia nagsiling sa iya, “O anak sang hari, ngaa bala naganiwang ka adlawadlaw? Indi ka bala magsugid sa akon?” Si Amnon nagsiling sa iya, “Ako nahigugma kay Tamar, utud nga babayi ni Absalom nga akon utud.” 5Si Jonadab nagsiling sa iya, “Higda ka sa imo higdaan, kag magmulumasakit ka; kag kon ang imo amay magkari sa pagduaw sa imo, isiling sa iya, ‘Pakari-a ang akon utud nga si Tamar kag magpakaon sa akon, kag maghimo sing pagkaon sa akon itololok, agud nga akon ini makita, kag magkaon sini gikan sa iya kamut.’” 6Gani si Amnon naghigda, kag nagpamulumasakit sia; kag sang nag-abut ang hari sa pagduaw sa iya, si Amnon nagsiling sa hari, “Nagaampo ako sa imo, pakari-a ang akon utud nga si Tamar kag himoan ako sing duha ka bilog nga kalan-onon sa itololok ko, agud nga magkaon ako gikan sa iya kamut.”
7Niyan si David nagpasogo sa iya puluy-an kay Tamar, nga nagasiling, “Kadto ka karon sa balay ni Amnon nga imo utud, kag himoi sia sing pagkaon.” 8Gani si Tamar nagkadto sa balay sang iya utud nga si Amnon, kag naghigda sia. Kag sia nagkuha sing linamas, kag ginlamas ini, kag naghimo sing mga kalan-onon sa iya itololok, kag nagluto sang mga kalan-onon. 9Kag ginbahit niya ang sartin kag ginbobo sila sa atubang niya, apang nagdumili sia sa pagkaon. Kag si Amnon nagsiling, “Pagowaa gikan sa akon ang tanan nga tawo.” Gani naggowa sila ang tagsa ka tawo gikan sa iya. 10Niyan si Amnon nagsiling kay Tamar, “Dalha ang pagkaon sa hulut, agud nga ako magkaon gikan sa imo kamut.” Kag ginkuha ni Tamar ang mg kalan-onon nga iya nahimo, kag gindala sila sa sulud sang hulut sa iya utud nga si Amnon. 11Apang sang nadala niya sila malapit sa iya sa pagkaon, gindakup niya sia, kag nagsiling sa iya, “Kari, hulid ka sa akon, utud ko.” 12Sia nagsabat sa iya, “Dili, utud ko, dili ako paglugusa; kay ang subong nga butang dili dapat himoon sa Israel; dili ka maghimo sini nga kabuangan. 13Kag ako, diin ko bala dalhon ang akon kahuluy-an? Kag nahanungud sa imo, manginsubong ka sang isa sang mga kulangkulang sa Israel. Busa karon, ginaampo ko sa imo, hambala ang hari; kay indi sia magpugung sa akon sa imo.” 14Wala sing sapayan indi sia magpamati sa iya tingug; apang bangud nga makusug pa sa iya, ginlugus niya sia, kag naghulid sa iya.
15Niyan si Amnon nagdumut sa iya sa lakas kadaku nga dumut; kay ang dumut nga gindumut niya sa iya daku pa sa gugma nga ginhigugma niya sa iya. Kag si Amnon nagsiling sa iya, “Tindug ka, halin.” 16Apang sia nagsiling sa iya, “Dili subong, bangud nga ini nga daku nga sayup sa pagtabog sa akon malain pa sang sa isa nga ginhimo mo sa akon.” Apang indi sia magpamati sa iya. 17Gintawag niya ang iya alagad nga nag-alagad sa iya kag nagsiling, “Pagowaa karon ini nga babayi gikan sa akon, kag pintali ang ganhaan sa olihi niya.” 18Karon napanaptan sia sing bayo nga sarisari sing mga duag; kay sa amo nga mga panapton ginpanaptan ang mga ulay nga mga anak sang mga hari. Gani gindala sia pagowa sang iya alagad, kag ginpintalan ang ganhaan sa olihi niya. 19Kag si Tamar nagbutang sing abo sa iya olo, kag nagkusnit sang iya panapton nga sarisari sing mga duag nga ginpanaput niya; kag ginbutang niya ang iya mga kamut sa iya olo, kag naglakat sa iya dalanon, nga nagahaya sa nagalakat sia.
Ang Pagtimalus kag Pagpalagyo ni Absalom
20Kag nagsiling sa iya ang iya utud nga si Absalom, “Nakaupud bala sa imo ang imo utud nga si Amnon? Karon hipus ka, utud ko; utud mo sia; dili pagkalisdi sa tagiposoon ini nga butang.” Gani si Tamar nagpabilin nga mamingaw, sa balay ni Absalom nga iya utud. 21Sang pagkabati ni Hari David sini tanan nga butang, nagsingkal gid sia. 22Apang si Absalom wala magpamolong kay Amnon sing maayo ukon malain; kay si Absalom nagdumut kay Amnon, bangud nga ginlugus niya si Tamar nga iya utud.
23Sa tapus ang duha ka tuig nga bug-os si Absalom may mga manug-alot sang mga carnero sa Baal-hazor, nga yara sa luyo sang Efraim, kag gin-agda ni Absalom ang tanan nga anak sang hari. 24Kag si Absalom nagkadto sa hari, kag nagsiling, “Yari karon, ang imo alagad may mga manug-alot sang mga carnero; ginaampo ko sa imo mag-upud ang hari kag ang iya mga alagad sa imo alagad.” 25Apang ang hari nagsiling kay Absalom, “Dili, anak ko, indi nga tanan kami magkadto, basi nga kami manginmabug-at sa imo.” Ginpilit niya sia, apang si David indi buut magkadto kondi ginpakamaayo sia. 26Niyan si Absalom nagsiling, “Kon indi, ginaampo ko sa imo, paupda sa amon si Amnon nga akon utud.” Kag ang hari nagsiling sa iya, “Ngaa bala nga mag-upud sia sa imo?” 27Apang si Absalom nagpilit sa iya kag ginpaupud niya sa iya si Amnon kag ang tanan nga anak sang hari. 28Niyan si Absalom nagsogo sa iya mga alagad, “Tandai ninyo karon kon ang tagiposoon ni Amnon nagakasadya sa alak, kag kon magsiling ako sa inyo, ‘Lab-a si Amnon,’ niyan patya sia. Dili magkahadluk; wala bala ako magsogo sa inyo? Magpakaisug kamo kag mapakaisganan.” 29Gani ang mga alagad ni Absalom naghimo kay Amnon subong sang nasogo sa ila ni Absalom. Niyan nagtilindug ang tanan nga anak sang hari, kag nagsakay ang tagsa ka tawo sa iya mula kag nagpalagyo.
30Sang sa dalanon pa sila, nag-abut kay David ang mga balita, “Ginpatay ni Absalom ang tanan nga anak sang hari, kag wala sing isa sa ila nga nabilin.” 31Niyan nagtindug ang hari, kag nagkusnit sang iya mga panapton, kag naghigda sa duta; kag ang tanan niya nga alagad nagtindug sa luyo nga nakusnit ang ila mga panapton. 32Apang si Jonadab nga anak ni Simea, utud ni David, nagsiling, “Dili magbanta ang akon ginoo nga ginpatay nila ang tanan nga pamatan-on nga lalaki nga mga anak sang hari, kay si Amnon lamang ang napatay, kay tungud sa gintangdo ni Absalom ini napat-ud kutub sa adlaw nga ginlugus niya si Tamar nga iya utud. 33Busa karon dili magkalisud sa iya tagiposoon ang akon ginoo nga hari sini nga butang sa paghunahuna nga ang tanan nga anak sang hari napatay; kay si Amnon lamang ang napatay.”
34Apang si Absalom nagpalagyo. Kag ang pamatan-on nga lalaki nga nagbantay nagbayaw sang iya mga mata, kag naglantaw, kag yari karon, may nag-abut nga labi kadamu nga katawohan sa dalanon sa banglid sa nalikod niya. 35Kag si Jonadab nagsiling sa hari, “Yari karon, ang mga anak sang hari nagapakari; sono sa ginsiling sang imo alagad, amo ini.” 36Kag sa gilayon nga nakatapus sia sa pagpamolong, yari karon, ang mga anak sang hari nag-abut, kag nagbayaw sang ila tingug kag naghinibi; kag ang hari man kag ang tanan niya nga alagad naghinibi sing tama gid.
37Apang si Absalom nagpalagyo, kag nagkadto kay Talmai nga anak ni Amihud, hari sang Gesur.#2 Sam. 3:3. Kag si David naglalaw tungud sa iya anak adlawadlaw. 38Gani si Absalom nagpalagyo, kag nagkadto sa Gesur, kag yadto didto sing tatlo ka tuig. 39Kag nahidlaw si Hari David kay Absalom; kay ginlipay sia nahanungud kay Amnon, kay patay na sia.
Currently Selected:
2 SAMUEL 13: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
