2 SAMUEL 12
12
Si Natan Nagasabdong kay David
1Kag ginpadala sang Ginoo si Natan kay David.#Sal. 51 Titulo. Nagkadto sia sa iya, kag nagsiling sa iya, “May duha ka tawo sa isa ka banwa, ang isa manggaranon kag ang isa imol. 2Ang manggaranon nga tawo may lakas kadamu nga mga panong kag kabakahan; 3apang ang imol wala luwas sang diotay nga cordera, nga iya ginbakal. Kag ginbatiti ini, kag nagdaku ini upud sa iya kag upud sa iya mga anak; ini nagkaon sang iya kaugalingon nga hungit, kag nag-inum sa iya ilimnan, kag nagluko sa iya sabak, kag nanginsubong sa iya sang isa ka anak nga babayi. 4Karon may nag-abut nga manlalagaw sa tawo nga manggaranon, kag nahilak sia magkuha sa iya kaugalingon nga panong kag sa iya kaugalingon nga kabakahan nga ihawon tungud sa manlalakat nga tawo nga nag-abut sa iya, kondi ginkuha niya ang cordera sang tawo nga imol, kag gin-ihaw ini tungud sa tawo nga nag-abut sa iya.” 5Niyan nagdabdab ang kaakig ni David batok sa tawo; kag nagsiling sia kay Natan, “Sa nagakabuhi ang Ginoo, ang tawo nga nakahimo sini takus sa kamatayon; 6kag ulian niya ang cordera sing apat ka pilo, bangud nga naghimo sia sini nga butang, kag bangud nga wala sia sing kaawa.”
7Si Natan nagsiling kay David, “Ikaw amo ang tawo. Amo ini ang ginasiling sang Ginoo, ang Dios sang Israel, ‘Ako naghaplas sa imo nga hari sa Israel, kag ginluwas ko ikaw sa kamut ni Saul; 8kag ako naghatag sa imo sang balay sang imo agalon kag sang mga asawa sang imo agalon sa imo sabak, kag naghatag sa imo sang balay sang Israel kag sang Juda; kag kon ini tama pa kadiotay, ako nagdugang kuntani sa imo sang amo kag amo nga mga butang. 9Ngaa bala nga gintamay mo ang polong sang Ginoo, sa paghimo sang malaut sa iya itololok? Ginpatay mo sa espada si Urias nga Hethanon, kag ginkuha mo ang iya asawa nga mangin-asawa mo, kag ginpapatay sia sa espada sang mga anak ni Amon. 10Busa karon ang espada indi magbulag nga mas-a sa imo panimalay, bangud nga gintamay mo ako, kag ginkuha mo ang asawa ni Urias nga Hethanon nga mangin-imo asawa.’ 11Amo ini ang ginasiling sang Ginoo, ‘Yari karon, magabangon ako sing malaut batok sa imo gikan sa imo kaugalingon nga panimalay; kag kuhaon ko ang imo mga asawa gikan sa imo mga mata, kag ihatag sila sa imo abyan, kag sia magahulid sa imo mga asawa sa dayag sini nga adlaw. 12Kay ginhimo mo ini sa tago; apang himoon ko ini sa atubang sang bug-os nga Israel, kag sa dayag sang adlaw.’#2 Sam. 16:22. ” 13Si David nagsiling kay Natan, “Nakasala ako batok sa Ginoo.” Kag si Natan nagsiling kay David, “Ang Ginoo man nagsikway sang imo sala; dili ka mapatay. 14Apang, bangud nga paagi sini nga buhat naghatag ka sing daku nga kahigayonan sa mga kaaway sang Ginoo sa pagpasipala, ang bata man nga natawo sa imo mapatay sing totoo.” 15Niyan si Natan nagpauli sa iya balay.
Kag ginsakit sang Ginoo ang bata nga gin-anak sang asawa ni Urias kay David, kag nagbalatian ini sing tama. 16Busa si David nagpakilooy sa Dios tungud sang bata; kag nagpuasa si David, kag nagsulud kag naghigda sa duta sa bug-os nga gab-i. 17Kag nagtindug ang mga tigulang sang iya balay sa luyo niya, sa pagbangon sa iya gikan sa duta; apang indi sia buut, bisan magkaon upud sa ila. 18Sa ikapito nga adlaw ang bata napatay. Kag ang mga alagad ni David nahadluk magsugid sa iya nga ang bata patay na; kay nagsiling sila, “Yari karon, sang buhi pa ang bata, nagpamolong kita sa iya, kag wala sia magpamati sa aton tingug; paano bala niyan ang pagsakit niya sang iya kaugalingon kon sugiran naton sia nga ang bata patay na?” 19Apang sang nakita ni David nga ang iya mga alagad nagahinutikay, ginhantup ni David nga ang bata patay na; kag si David nagsiling sa iya mga alagad, “Patay na bala ang bata?” Kag sila nagsiling, “Patay na sia.” 20Niyan si David nagtindug gikan sa duta, kag nagpaninlo, kag nagpanghaplas sang iya kaugalingon, kag nag-ilis sang iya panapton; kag nagsulud sia sa balay sang Ginoo, kag nagsimba; niyan nagpauli sia sa iya kaugalingon nga balay; kag sang nagpangayo sia, ginbutangan nila sia sing pagkaon, kag nagkaon sia. 21Niyan nagsiling sa iya ang iya mga alagad, “Ano bala ini nga butang nga imo nahimo? Nagpuasa ka kag naghibi tungud sa bata sang buhi pa ini; apang sang patay na ang bata, nagtindug ka kag nagkaon.” 22Nagsiling sia, “Sang buhi pa ang bata, nagpuasa ako kag naghibi; kay nagsiling ako, ‘Sin-o bala ang nakahibalo nga ang Ginoo indi magkalooy sa akon, agud nga mabuhi ang bata?’ 23Apang karon patay na sia; ngaa bala nga magpuasa pa ako? Sarang ko bala sia mapabalik liwat? Ako makadto sa iya, apang sia indi magbalik sa akon.”
24Niyan ginlipay ni David si Bat-seba, nga iya asawa, kag nagsulud sa iya, kag naghulid sa iya; kag nag-anak sia sing lalaki, kag ginhingalanan niya sia Salomon. Kag ang Ginoo naghigugma sa iya, 25kag nagpadala sia sa kamut ni Natan nga manalagna; gani gintawag niya ang iya ngalan Jedidia,#12:25 Kon sayoron Hinigugma sang Ginoo. tungud sang Ginoo.
Si David Nagaagaw sang Raba
(1 Cron. 20:1-3)
26Karon si Joab nag-away batok sa Raba sang mga anak ni Amon, kag gin-agaw ang banwa nga harianon. 27Kag si Joab nagpadala sing mga manugbalita kay David, kag nagsiling, “Ako nagpakig-away sa Raba; hoo, naagaw ko ang banwa sang mga tubig. 28Busa, karon, tipona sing tingub ang katawohan nga nabilin, kag magpahamtang sing dologan batok sa banwa, kag agawa ini; basi nga maagaw ko ang banwa, kag tawgon ini sono sa akon ngalan.” 29Gani gintipon sing tingub ni David ang bug-os nga katawohan kag nagkadto sa Raba, kag gin-away ini kag gin-agaw ini. 30Kag ginkuha niya ang purungpurung sang ila hari sa iya olo; ang iya timbang isa ka talanton nga bulawan, kag may mga bato nga bilidhon; kag ginbutang ini sa olo ni David. Kag nagdala sia sing tama kadamu nga inagaw gikan sa banwa. 31Kag gindala niya pagowa ang katawohan nga yara sa iya, kag ginbutang sila sa mga lagari kag sa mga pakalas nga salsalon kag sa mga wasay nga salsalon, kag ginpapangabudlay sila sa horno sang tisa; kag amo ini ang ginhimo niya sa tanan nga banwa sang mga anak ni Amon. Niyan si David kag ang bug-os nga katawohan nagpauli sa Jerusalem.
Currently Selected:
2 SAMUEL 12: ABHIL82
Highlight
Share
Compare
Copy
Want to have your highlights saved across all your devices? Sign up or sign in
Ang Biblia ©1982 Philippine Bible Society
