2 MGA HARI 24
24
1Sa iya mga adlaw nagtaklad si Nabucodonosor nga hari sang Babilonia,#Jer. 25:1-38; Dan. 1:1-2. kag si Joaquim nangin-alagad niya sing tatlo ka tuig; ugaling nagliso sia kag nagribuk batok sa iya. 2Kag ang Ginoo nagpadala batok sa iya sing mga kabon sang mga Caldeanhon, kag mga kabon sang mga Sirianhon, kag mga kabon sang mga Moabnon, kag mga kabon sang mga anak ni Amon, kag ginpadala sila batok sa Juda sa paglaglag sa iya, sono sa polong sang Ginoo nga ginpamolong niya paagi sa iya mga alagad nga mga manalagna. 3Sa pagkamatuud sa sogo sang Ginoo nag-abut ini sa Juda, sa pagkuha sa ila gikan sa iya itololok, tungud sa mga sala ni Manases, sono sa tanan nga ginhimo niya, 4kag subong man tungud sa dugo nga wala sing sala nga ginpaagay niya; kay gintugub niya ang Jerusalem sing dugo nga wala sing sala, kag ang Ginoo indi buut magpatawad. 5Karon ang nabilin sang mga binuhatan ni Joaquim, kag ang tanan nga ginhimo niya, wala bala sila masulat sa Tolon-an sang mga Maragtas sang mga Hari sang Juda? 6Gani si Joaquim nagtolog upud sa iya mga ginikanan, kag naghari nga tal-us niya si Joaquin nga iya anak nga lalaki. 7Kag ang hari sang Egipto wala na gid maggowa liwat sa iya duta, kay ang hari sang Babilonia nag-agaw sang tanan nga iya sang hari sang Egipto kutub sa Sapa sang Egipto tubtub sa suba nga Eufrates.
Si Joaquin kag ang mga Dungganon Nabihag pa Babilonia
(2 Cron. 36:9-10)
8Nagsugud sa paghari si Joaquin sang sia napulo kag walo ka tuig, kag naghari sia sa Jerusalem sing tatlo ka bulan. Ang ngalan sang iya iloy si Nehusta nga anak ni Elnatan sang Jerusalem. 9Kag ginhimo niya ang malaut sa itololok sang Ginoo, sono sa tanan nga ginhimo sang iya amay.
10Sa sadtong tion ang mga alagad ni Nabucodonosor nga hari sang Babilonia nagtaklad sa Jerusalem, kag ang banwa ginkibon. 11Kag si Nabucodonosor nga hari sang Babilonia nag-abut sa banwa, sang ginakibon ini sang iya mga alagad; 12kag si Joaquin nga hari sang Juda naggowa pakadto sa hari sang Babilonia, sia, kag ang iya iloy, kag ang iya mga alagad, kag ang iya mga principe, kag ang iya mga manugdumala. Gindakup sia sang hari sang Babilonia sa ikawalo nga tuig sang iya paghari,#Jer. 22:24-30; 24:1-10; 29:1-2. 13kag gindala niya gikan didto ang tanan nga bahandi sang balay sang Ginoo, kag ang mga bahandi sang balay sang hari, kag ginpihakpihak niya ang tanan nga gamit nga bulawan, nga ginhimo ni Salomon nga hari sang Israel sa templo sang Ginoo, sono sa napamolong sang Ginoo. 14Gindala niya ang bug-os nga Jerusalem, ang tanan nga principe, kag ang tanan nga gamhanan nga mga tawo nga isganan, bisan napulo ka libo ka mga bihag, kag ang tanan nga panday kag manugsalsal sang salsalon; wala gid sing nabilin, luwas ang mga labi gid ka imol sang mga tawo sang duta. 15Kag gindala niya si Joaquin sa Babilonia;#Ezeq. 17:12. gindala niya nga bihag gikan sa Jerusalem pa Babilonia ang iloy sang hari, ang mga asawa sang hari, ang iya mga manugdumala, kag ang puno nga mga tawo sang duta. 16Kag ang tanan nga tawo nga gamhanan, bisan pito ka libo, kag ang mga panday kag ang mga manugsalsal sang salsalon, nga isa ka libo, sila tanan makusug kag handa sa inaway, bisan sila gindala nga bihag sa Babilonia sang hari sang Babilonia. 17Kag ang hari sang Babilonia naghimo kay Natamias, utud sang amay ni Joaquin, nga hari nga tal-us niya, kag ginbaylohan niya ang iya ngalan sa kay Sedequias.#Jer. 37:1; Ezeq. 17:13.
Ang Paghari ni Sedequias
(2 Cron. 36:11-16; Jer. 52:1-3)
18Nagsugud sa paghari si Sedequias sang sia duha ka pulo kag isa ka tuig,#Jer. 27:1-22; 28:1-17. kag naghari sia sing napulog isa ka tuig sa Jerusalem. Ang ngalan sang iya iloy si Hamutal nga anak ni Jeremias sang Libna. 19Kag ginhimo niya ang malaut sa itololok sang Ginoo, sono sa tanan nga nahimo ni Joaquim. 20Kay tungud sa kaakig sang Ginoo nahanabu ini sa Jerusalem kag sa Juda tubtub nga ginsikway niya sila gikan sa iya atubangan.
Ang Jerusalem Gindaug
(Jer. 39:1-7; 52:3-11)
Kag si Sedequias nagribuk batok sa hari sang Babilonia.#Ezeq. 17:15.
Currently Selected:
2 MGA HARI 24: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
