2 MGA HARI 23

1Niyan ang hari nagpadala, kag gintipon nila sa iya ang tanan nga tigulang sang Juda kag sang Jerusalem. 2Kag nagsaka ang hari sa balay sang Ginoo, kag upud niya ang tanan nga tawo sang Juda kag ang tanan nga pumuluyo sang Jerusalem, kag ang mga sacerdote kag ang mga manalagna, ang bug-os nga katawohan, magamay kag dalagku; kag ginbasa niya sa ila mga idulungug ang tanan nga polong sang tolon-an sang katipan nga nakita sa balay sang Ginoo. 3Kag nagtindug ang hari sa luyo sang haligi kag nagpakigkatipan sa atubangan sang Ginoo, sa pagsonod sa Ginoo kag sa pagbantay sang iya mga sogo kag sang iya mga pagpamatuud kag sang iya mga palatukuran, sa bug-os nga tagiposoon kag sa bug-os nga kalag, sa pagtuman sang mga polong sini nga katipan nga nasulat sa sini nga tolon-an; kag ang bug-os nga katawohan nagpanangdo sa katipan.

Ang mga Pagbalhin nga Nahimo ni Josias

(2 Cron. 34:3-7)

4Kag nagsogo ang hari kay Helcias, nga pinakamataas nga sacerdote, kag sa mga sacerdote nga sa ikaduha nga pasonod, kag sa mga manugbantay sang atangan, sa pagpagowa gikan sa templo sang Ginoo sang tanan nga gamit nga ginhimo tungud kay Baal, nga sa Ashera, kag sa bug-os nga kasoldadosan sang langit; ginsonog niya sila sa gowa sang Jerusalem sa mga latagon sang Cedron, kag gindala ang mga abo nila sa Bet-el. 5Kag ginpahalin niya ang mga sacerdote nga diwatahan nga gintakdungan sang mga hari sang Juda sa pagsonog sing incienso sa mataas nga mga duug sa kabanwaanan sang Juda kag sa mga duug palibut sa Jerusalem; sila man nga nagsonog sing incienso kay Baal, sa adlaw, kag sa bulan, kag sa mga planeta, kag sa bug-os nga kasoldadosan sang langit. 6Kag gindala niya ang Ashera gikan sa balay sang Ginoo, pagowa sa Jerusalem, sa sapa nga Cedron, kag ginsonog ini sa sapa nga Cedron, kag ginbukbuk ini kag ginsabwag ang iya yab-ok sa ibabaw sang mga lulubngan sang mga timawa.#2 Hari 21:3; 2 Cron. 33:3. 7Kag ginguba niya ang mga balay sang mga sodomanhon nga yara sa balay sang Ginoo, diin naghabol ang mga babayi sang mga kumbung nga sa Ashera. 8Kag ginpagowa niya ang tanan nga sacerdote gikan sa kabanwaanan sang Juda, kag gindagtaan ang mataas nga mga duug diin ang mga sacerdote nagsonog sing incienso, kutub sa Geba tubtub sa Beer-seba; kag ginguba niya ang mataas nga mga duug sang mga gawang nga yara sa salamputan sang gawang ni Josue nga pangolo sang banwa, nga yara sa wala sa gawang sang banwa. 9Wala sing sapayan, ang mga sacerdote sang mataas nga mga duug wala magtaklad sa halaran sang Ginoo sa Jerusalem, kondi nagkaon sila sing mga tinapay nga wala sing tapay sa tunga sang ila mga utud. 10Kag gindagtaan niya ang Tofet, nga yara sa nalupyakan sang mga anak ni Hinom,#Jer. 7:31; 19:1-6; 32:35. agud nga wala sing tawo nga magpaagi sang iya anak nga lalaki ukon sang iya anak nga babayi sa kalayo kay Moloc.#Lev. 18:21. 11Kag ginkuha niya ang mga kabayo nga ginhalad sang mga hari sang Juda sa adlaw, sa salamputan sang balay sang Ginoo,#2 Hari 21:5; 2 Cron. 33:5. sa luyo sang hulut ni Natan-melec nga tulugyanan sang hulut ng yara sa mga palayas; kag ginsonog niya sa kalayo ang mga kangga sang adlaw. 12Kag ang mga halaran nga yadto sa atop sang naibabaw nga hulut ni Acaz, nga nahimo sang mga hari sang Juda, kag ang mga halaran nga nahimo ni Manases sa duha ka luwang sang balay sang Ginoo,#2 Hari 21:5; 2 Cron. 33:5. ginlaglag sang hari kag ginpu-ad gikan didto, kag ginsabwag ang yab-ok nila sa sapa nga Cedron. 13Kag ginhigkoan sang hari ang mataas nga mga duug nga yara sa atubangan sang Jerusalem, nga yara sa too sang bukid sang kalaglagan, nga ginpatindug ni Salomon nga hari sang Israel kay Astarot nga kangil-aran sang mga Sidonhon, kag kay Cemos nga kangil-aran sang Moab, kag kay Milcom nga kangil-aran sang mga anak ni Amon gindagtaan sang hari.#1 Hari 11:7. 14Kag gindugmok niya ang mga obelisco, kag ginpulud ang mga Asherim, kag ginhil-ob ang mga duug nila sing mga tul-an sang mga tawo.

15Labut pa ang halaran nga yadto sa Bet-el, kag ang mataas nga duug nga ginhimo ni Jeroboam nga anak ni Nabat,#1 Hari 12:33. nga nagpapakasala sang Israel, yadto gid nga halaran kag ang mataas nga duug ginlumpag niya kag ginsonog niya ang mataas nga duug kag ginbukbuk ini; ginsonog man niya ang Ashera. 16Kag sang nagliso si Josias, nakita niya ang mga lulubngan nga yadto didto sa bukid; kag nagpadala sia, kag ginpakuha ang mga tul-an gikan sa mga lulubngan, kag ginsonog sila sa ibabaw sang halaran, kag gindagtaan ini, sono sa polong sang Ginoo nga ginbantala sang tawo sang Dios, nga nagbantala sini nga mga butang.#1 Hari 13:2. 17Niyan ang hari nagsiling, “Ano bala ina nga monumento nga ginatan-aw ko?” Kag ang mga tawo sang banwa nagsugid sa iya, “Ini lulubngan sang tawo sang Dios nga nag-abut gikan sa Juda kag nagbantala sini nga mga butang nga nahimo mo batok sa halaran sang Bet-el.”#1 Hari 13:30-32. 18Kag sia nagsiling, “Pabayai sia; wala sing tawo nga maghulag sang iya mga tul-an.” Gani ginpabay-an nila ang iya mga tul-an, upud sa mga tul-an sang manalagna nga nag-abut gikan sa Samaria. 19Kag ang tanan nga balay man sang mataas nga mga duug nga yadto sa kabanwaanan sang Samaria, nga ginhimo sang mga hari sa Israel sa pagpaakig sa Ginoo, ginkuha ni Josias; ginhimo sa ila ang sono sa tanan nga binuhatan nga nahimo niya sa Bet-el. 20Kag ginpatay niya sa ibabaw sang mga halaran ang tanan nga sacerdote sang mataas nga mga duug nga yadto didto, kag ginsonog sa ibabaw nila ang mga tul-an sang mga tawo. Niyan nagpauli sia sa Jerusalem.

Ang Pascua Ginbantayan

(2 Cron. 35:1-19)

21Kag nagsogo ang hari sa bug-os nga katawohan, “Hiwata ninyo ang pascua sa Ginoo nga inyo Dios, sono sa nasulat sa sini nga tolon-an sang katipan.” 22Sa pagkamatuud wala gid sing nahiwat nga subong nga pascua kutub sa mga adlaw sang mga hukom nga naghukom sa Israel, bisan sa tanan nga adlaw sang mga hari sang Israel, ukon sang mga hari sang Juda; 23apang sa ikanapulo kag walo nga tuig ni Hari Josias ini nga pascua ginhiwat sa Ginoo sa Jerusalem.

Ang Padayon na Kaakig sang Ginoo batok sa Juda

24Labut pa ang mga manugpagowa sang mga espiritu kag ang mga salamangkero kag ang mga terafim kag ang mga diosdios kag ang tanan nga kalangil-aran nga nakita sa duta sang Juda kag sa Jerusalem, ginpahilayo ni Josias, agud nga matuman niya ang mga polong sang kasogoan, nga nasulat sa tolon-an nga nakita ni Helcias nga sacerdote sa balay sang Ginoo. 25Sa nahauna niya wala sing hari nga kaangay niya, nga nagliso sa Ginoo sa bug-os niya nga tagiposoon kag sa bug-os niya nga kalag kag sa bug-os niya nga kusug, sono sa bug-os nga kasogoan ni Moises; bisan sa olihi niya wala na sing agtindug nga kaangay sa iya.

26Wala sing sapayan ang Ginoo wala magbiya gikan sa kapintas sang iya daku nga kasingkal, diin ang iya kaakig nagdabdab batok kay Juda, bangud sang tanan nga pag-akyat nga gin-akyat sa iya ni Manases. 27Kag ang Ginoo nagsiling, “Pahalinon ko ang Juda man gikan sa akon itololok, subong nga ginpahalin ko ang Israel, kag sobolon ko ini nga banwa nga ginpili ko, bisan ang Jerusalem, kag ang balay nga nahanungud sa iya nagsiling ako, Ang akon ngalan mangindidto.”

Ang Pagkapatay ni Josias sa Meguido

(2 Cron. 35:20-27)

28Karon ang nabilin sang mga binuhatan ni Josias, kag ang tanan nga ginhimo niya, wala bala sila masulat sa Tolon-an sang mga Maragtas sang mga Hari sang Juda? 29Sa iya mga adlaw si Faraon-necao nga hari sang Egipto nagtaklad batok sa hari sang Asiria sa suba nga Eufrates. Naggowa batok sa iya si Hari Josias; kag sang nakita sia ni Faraon-necao ginpatay niya sia sa Meguido. 30Kag ang iya mga alagad nagdala sa iya nga patay sa kangga gikan sa Meguido, kag gindala sia sa Jerusalem, kag ginlubung sia sa iya kaugalingon nga lulubngan. Kag ang katawohan sang duta nagkuha kay Jehoacaz nga anak nga lalaki ni Josias, kag ginhaplas sia, kag ginhimo sia nga hari nga tal-us sa iya amay.

Ang Paghari kag Pagpahalin kay Joacaz

(2 Cron. 36:1-4)

31Si Jehoacaz duha ka pulo kag tatlo ka tuig sang nagsugud sia sa paghari, naghari sia sing tatlo ka bulan sa Jerusalem. Ang ngalan sang iya iloy si Hamutal nga anak ni Jeremias sang Libna. 32Kag ginhimo niya ang malaut sa itololok sang Ginoo, sono sa tanan nga nahimo sang iya mga ginikanan. 33Kag ginbilanggo sia ni Faraon-necao sa Ribla sa duta sang Hamat, agud nga indi sia maghari sa Jerusalem, kag ginpabuhis ang duta sing isa ka gatus ka talanton nga pilak kag isa ka talanton nga bulawan. 34Kag si Faraon-necao naghimo nga hari kay Eliaquim nga anak ni Josias nga tal-us ni Josias nga iya amay, kag ginbaylohan ang iya ngalan kay Joaquim. Apang ginpahalin niya si Jehoacaz; kag nagkadto sia sa Egipto, kag napatay didto.#Jer. 22:11-12. 35Kag si Joaquim naghatag kay Faraon sang pilak kag bulawan, apang ginpabuhis niya ang duta sa paghatag sang cuarta sono sa sogo ni Faraon. Nagsukut sia sing pilak kag bulawan sa katawohan sang duta, sa tagsatagsa sono sa iya pagpabuhis, sa paghatag sini kay Faraon-necao.

Ang Paghari ni Joaquim

(2 Cron. 36:5-8)

36Si Joaquim#Jer. 22:18-19; 26:1-6; 35:1-19. duha ka pulo kag lima ka tuig sang nagsugud sia sa paghari, kag naghari sia sing napulo kag isa ka tuig sa Jerusalem. Ang ngalan sang iya iloy si Zebida nga anak ni Pedaya sang Ruma. 37Kag ginhimo niya ang malaut sa itololok sang Ginoo, sono sa tanan nga nahimo sang iya mga ginikanan.

Currently Selected:

2 MGA HARI 23: ABHIL82

Highlight

Copy

Compare