2 MGA HARI 22

Ang Paghari ni Josias

(2 Cron. 34:1-2)

1Si Josias#Jer. 3:6. walo ka tuig sang nagsugud sia sa paghari, kag naghari sia sa Jerusalem sing katloan kag isa ka tuig. Ang ngalan sang iya iloy si Jedida nga anak ni Adaya sang Boscat. 2Kag ginhimo niya ang matarung sa mga mata sang Ginoo, kag naglakat sa bug-os nga dalanon ni David nga iya amay, kag wala maglipas sa too ukon sa wala.

Ang Tolon-an sang Kasogoan Nasapwan

(2 Cron. 34:8-33)

3Sa ikanapulo kag walo nga tuig ni Hari Josias, ginpadala sang hari si Safan nga escriba, ang anak ni Azalia nga anak ni Mesullam, sa balay sang Ginoo, nga nagasiling, 4“Taklad ka kay Helcias nga pinakamataas nga sacerdote, agud nga mabilog niya ang cuarta nga ginsulud sa balay sang Ginoo, nga gintipon sang mga manugbantay sa atangan gikan sa katawohan; 5kag itugyan nila ini sa kamut sang mga manugpangabudlay nga nagadumala sa balay sang Ginoo; kag ihatag nila ini sa mga panday sa balay sang Ginoo, sa pagpakaayo sang mga lubot sang balay, 6sa mga panday, sa mga manugtukud, kag sa mga cantero, kag sa pagbakal sing tablon kag bato nga binasbasan sa pagpakaayo sang balay. 7Apang wala sing husay sang cuarta nga gintugyan sa ila kamut, kay sila nagagawi sing matutum.”

8Kag si Helcias nga pinakamataas nga sacerdote nagsiling kay Safan nga escriba, “Nakita ko ang tolon-an sang kasogoan sa balay sang Ginoo.” Kag ginhatag ni Helcias ang tolon-an kay Safan, kag ginbasa niya ini. 9Kag si Safan nga escriba nagkadto sa hari, kag nagsugid liwat sa hari, “Ginbobo sang imo mga alagad ang cuarta nga nakita sa balay, kag nagtugyan sini sa kamut sang mga manugpangabudlay nga nagadumala sang balay sang Ginoo.” 10Niyan si Safan nga escriba nagsugid sa hari, “Si Helcias nga sacerdote naghatag sa akon sing tolon-an.” Kag ginbasa ini ni Safan sa atubangan sang hari.

11Kag sang nakabati ang hari sang mga polong sang tolon-an sang kasogoan, ginkusnit niya ang iya mga panapton. 12Kag ang hari nagsogo kay Helcias nga sacerdote, kag kay Ahicam nga anak ni Safan, kag kay Acbor nga anak ni Mecaya, kag kay Safan nga escriba, kag kay Asaya nga alagad sang hari, nga nagasiling, 13“Lakat kamo, pamangkota ninyo ang Ginoo tungud sa akon, kag tungud sa katawohan, kag tungud sa bug-os nga Juda, nahanungud sa mga polong sini nga tolon-an nga nakita; kay daku ang kasingkal sang Ginoo nga nagdabdab batok sa aton, bangud nga ang aton mga ginikanan wala magpamati sa mga polong sini nga tolon-an, sa paghimo sono sa tanan nga nasulat nahanungud sa aton.”

14Gani si Helcias nga sacerdote, kag si Ahicam, kag si Acbor, kag si Safan, kag si Asaya nagkadto kay Hulda nga manalagna nga babayi, ang asawa ni Sallum nga anak ni Ticva, ang anak ni Carcas, manugbantay sang mga panapton (karon nagpuyo sia sa Jerusalem sa Ikaduha nga Bahin); kag nagpakigsapul sila sa iya. 15Kag nagsiling sia sa ila, “Amo ini ang ginasiling sang Ginoo, ang Dios sang Israel: ‘Sugiri ninyo ang lalaki nga nagpadala sa inyo sa akon, 16Amo ini ang ginasiling sang Ginoo, Yari karon, magapadala ako sing malaut sa sini nga duug kag sa iya pumuluyo, bisan ang tanan nga mga polong sang tolon-an nga ginbasa sang hari sang Juda. 17Bangud nga ginbayaan nila ako kag nagsonog sing incienso sa iban nga mga dios, agud nga mapaakig ako nila sa bug-os nga binuhatan sang ila mga kamut, busa ang akon kasingkal magadabdab batok sini nga duug, kag indi ini mapalong. 18Apang sa hari sang Juda, nga nagpadala sa inyo sa pagpamangkot sa Ginoo, amo ini ang isiling ninyo sa iya, Amo ini ang ginasiling sang Ginoo, ang Dios sang Israel: Nahanungud sa mga polong nga nabatian mo, 19bangud nga ang imo tagiposoon mahomok, kag nagpaubus ka sa atubangan sang Ginoo, sang pagkabati mo sang ginpamolong ko batok sini nga duug, kag batok sa iya mga pumuluyo, nga sila manginmamingaw kag pinakamalaut, kag nagkusnit ka sang imo mga panapton kag naghibi sa akon atubangan, ako man nagpamati sa imo, nagasiling ang Ginoo. 20Busa, yari karon, isimpon ko ikaw sa imo mga ginikanan, kag isimpon ka sa paghidait sa imo lulubngan, kag indi makakita ang imo mga mata sang tanan nga malaut nga dalhon ko sa sini nga duug.’” Kag ginsugiran nila liwat ang hari.

Currently Selected:

2 MGA HARI 22: ABHIL82

Highlight

Copy

Compare