2 MGA CRONICA 6
6
Ang Paghalad sang Templo
(1 Hari 8:12-66)
1Niyan nagpamolong si Salomon,
“Ang Ginoo nagsiling nga sia magapuyo sa pitipit nga kadudulman.
2Ako nagpatindug sa imo sing balay nga puluy-an, duug nga puluy-an mo sa gihapon.”
3Niyan ang hari nagliso sang iya nawung, kag nagpakamaayo sang bug-os nga katilingban sang Israel, samtang ang bug-os nga katilingban sang Israel nagtindug. 4Kag sia nagsiling, “Pakamaayohon ang Ginoo, ang Dios sang Israel, nga nagpamolong sa iya baba kay David nga akon amay kag sa iya kamut nagtuman sini, nga nagasiling, 5‘Kutub sang adlaw nga ginpagowa ko ang akon katawohan gikan sa duta sang Egipto, wala ako magpili sing banwa gikan sa tanan nga kabikahan sang Israel nga patindugan sing balay, agud nga mangindidto ang akon ngalan, kag wala ako magpili sing bisan sin-o nga lalaki nga manginprincipe sa ibabaw sang akon katawohan nga Israel; 6apang ginpili ko ang Jerusalem agud nga mangindidto ang akon ngalan kag ginpili si David nga maggahum sa akon katawohan nga Israel.’ 7Karon yari ini sa tagiposoon ni David nga akon amay sa pagpatindug sing balay tungud sa ngalan sang Ginoo, ang Dios sang Israel. 8Apang ang Ginoo nagsiling kay David nga akon amay, ‘Tungud nga ini yara sa imo tagiposoon sa pagpatindug sing balay sa akon ngalan, naghimo ka sing maayo nga ini yara sa imo tagiposoon; 9walay sapayan dili ikaw magpatindug sang balay, kondi ang imo anak nga magagikan sa imo mga balikawang sia magapatindug sang balay sa akon ngalan.’#2 Sam. 7:1-13; 1 Cron. 17:1-12. 10Karon gintuman sang Ginoo ang iya polong nga ginpamolong niya; kay nagtindug ako nga tal-us ni David nga akon amay, kag naglingkod sa trono sang Israel, sono sa ginsaad sang Ginoo, kag nagpatindug sang balay nga sa ngalan sang Ginoo, ang Dios sang Israel. 11Kag didto ginpahamtang ko ang kaban, diin nasulud ang katipan sang Ginoo, nga ginhimo niya upud sa katawohan sang Israel.”
12Niyan nagtindug si Salomon sa atubangan sang halaran sang Ginoo sa atubangan sang bug-os nga katilingban sang Israel, kag ginbayaw ang iya mga kamut. 13Si Salomon naghimo sing plataforma nga saway nga lima ka maniko kalaba, kag lima ka maniko kasangkad, kag tatlo ka maniko ang kataas, kag ginbutang ini sa tunga sang luwang; kag nagtindug sia sa ibabaw sini. Niyan nagluhud sa iya mga tuhud sa atubangan sang bug-os nga katilingban sang Israel, kag nagbayaw sang iya mga kamut nayon sa langit; 14kag nagsiling sia, “O Ginoo, ang Dios sang Israel, wala sing Dios kaangay sa imo, sa langit ukon sa duta, nga nagabantay sang katipan kag sang malig-on nga paghigugma upud sa imo mga alagad nga naglakat sa atubangan mo sa bug-os nila nga tagiposoon; 15nga naghuput upud sa imo alagad nga si David nga akon amay sang imo ginsaad sa iya; hoo, nagpamolong ka sa imo baba, kag gintuman mo ini sang imo kamut subong sang sa sini nga adlaw. 16Busa karon, O Ginoo, ang Dios sang Israel, hupti upud sa imo alagad nga si David nga akon amay ang ginsaad mo sa iya, nga nagasiling, ‘Dili mawad-an sing lalaki sa akon itololok nga magalingkod sa trono sang Israel, kon lamang ang imo mga anak nga lalaki mag-andam sa ila dalanon, sa paglakat sa akon kasogoan subong sang imo paglakat sa atubangan nakon.’#1 Hari 2:4. 17Busa karon, O Ginoo, ang Dios sang Israel, pamatud-i ang imo polong, nga ginpamolong mo sa imo alagad nga si David.
18“Apang matuud gid bala nga ang Dios magapuyo upud sa mga tawo sa duta? Yari karon, ang langit kag ang langit sang mga langit indi makaigo sa imo; daw ano pa gid ka kubus ini nga balay nga akon ginpatindug! 19Apang tamda ang pangamuyo sang imo alagad kag ang iya pag-ampo, O Ginoo nga akon Dios, sa pagpamati sa pagtu-aw kag sa pangamuyo sang imo alagad nga ginapangamuyo niya sa atubangan mo; 20nga ang imo mga mata mabuksan nayon sa sini nga balay sa adlaw kag gab-i, nayon sa duug nga imo ginsiling nga butangan mo sang imo ngalan#Deut. 12:11. didto, sa pagpamati sa pangamuyo nga ipangamuyo sang imo alagad nayon sa sini nga duug. 21Kag pamati ka sa mga pag-ampo sang imo alagad kag sang imo katawohan nga Israel, kon magpangamuyo sila nayon sa sini nga duug; hoo, pamati ka kutub sa imo puluy-an; kag kon makabati ka, patawara.
22“Kon ang isa ka tawo makasala batok sa iya isigkatawo kag piliton sia sa pagsumpa, kag sia magkari kag magsumpa sa atubangan sang imo halaran sa sini nga balay, 23niyan pamati ka kutub sa langit, kag himoa, kag hukmi ang imo mga alagad, nga nagabalus sa malauton sa pagpabalik sang iya pagginawi sa iya kaugalingon nga olo, kag nagapakamatarung sang matarung sa paghatag sa iya sono sang iya pagkamatarung.
24“Kon ang imo katawohan nga Israel dag-on sa atubangan sang mga kaaway bangud nga nakasala sila batok sa imo, kon magbalik kag magtu-ad sang imo ngalan, kag magpangamuyo kag mag-ampo sa imo atubangan sa sini nga balay; 25niyan pamati ka kutub sa langit, kag patawara ang sala sang imo katawohan nga Israel, kag iuli sila sa duta nga ginhatag mo sa ila kag sa ila mga ginikanan.
26“Kon ang mga langit matakpan kag wala sing ulan bangud nga nakasala sila batok sa imo, kon magpangamuyo sila nayon sini nga duug, kag magtu-ad sang imo ngalan, kag magtalikod sa ila mga sala, kon sakiton mo sila, 27niyan pamati ka sa langit, kag patawara ang sala sang imo mga alagad, sang imo katawohan nga Israel, kon matudloan mo sila sang maayo nga dalan nga ila laktan; kag padalhi sing ulan ang imo duta, nga nahatag mo nga panublion sa imo katawohan.
28“Kon sa duta may tiggulutum, kon may kamatay ukon may panlaya ukon kusim ukon apan ukon lukso; kon kibonon sila sang ila mga kaaway sa duta sang ila mga banwa; bisan ano dira nga kalalat-an, ukon bisan ano nga balatian; 29bisan ano nga pangamuyo kag pag-ampo nga himoon sang bisan sin-o nga tawo ukon sang imo bug-os nga katawohan nga Israel, nga ang tagsa ka tawo makahibalo sang iya kaugalingon nga kalalat-an kag sang iya kaugalingon nga kalisud kag magabayaw sang iya mga kamut nayon sa sining balay; 30niyan pamati ka kutub sa langit nga imo puluy-an, kag patawara, kag ihatag sa tagsa ka tawo sono sa iya mga pagginawi, nga nakilala nimo ang iya tagiposoon (kay ikaw, ikaw gid lamang, ang nakakilala sang mga tagiposoon sang mga anak sang mga tawo); 31agud nga magkahadluk sila sa imo sa paglakat sa imo mga dalanon, tubtub nga nagakabuhi sila sa duta nga ginhatag mo sa amon mga ginikanan.
32“Labut pa nahanungud sa dumuloong, nga indi sa imo katawohan nga Israel, kon mag-abut sia gikan sa malayo nga mga duta tungud sang imo daku nga ngalan, kag sang imo gamhanan nga kamut, kag sang imo inuntay nga butkon, kon magkari sila kag magpangamuyo nayon sa sini nga balay, 33pamati ka kutub sa langit nga imo puluy-an, kag himoa sono sa tanan nga panawag sa imo sang dumoloong; agud nga ang tanan nga katawohan sang duta makakilala sang imo ngalan kag magkahadluk sa imo, subong sang ginahimo sang imo katawohan nga Israel, kag agud nga makakilala sila nga ini nga balay nga napatindug ko ginatawag sa imo ngalan.
34“Kon ang imo katawohan maggowa sa inaway batok sa ila mga kaaway, sa bisan ano nga dalan ipadala mo sila, kag magpangamuyo sila sa imo nayon sini nga banwa nga napili mo kag sa balay nga akon ginpatindug sa imo ngalan, 35niyan pamati ka kutub sa langit sang ila pangamuyo kag sang ila pag-ampo, kag sakdaga ang ila kinamatarung.
36“Kon makasala sila batok sa imo—kay wala sing tawo nga wala nagapakasala—kag maakig ka sa ila, kag itugyan sila sa kaaway, sa bagay nga bihagon nila sila pakadto sa duta nga malayo ukon malapit; 37apang kon makapanghunahuna sila sa ila kaugalingon sa duta diin gindala sila nga bihag, kag magliso liwat, kag mag-ampo sa imo sa duta sang ila kabihagan, nga nagasiling, ‘Nakasala kami, nakahimo kami sing binalingag kag nagmalauton’; 38kon magbalik sila sa imo sa bug-os nila nga tagiposoon kag sa bug-os nila nga kalag sa duta sang ila kabihagan, diin gindala nila sila nga bihag, kag magpangamuyo nayon sa ila duta, nga imo ginhatag sa ila mga ginikanan, sa banwa nga imo ginpili, kag nayon sa balay nga akon napatindug sa imo ngalan, 39niyan pamati ka kutub sa langit bisan kutub sa imo puluy-an sang ila pangamuyo kag sang ila mga pag-ampo, kag apini ang ila kinamatarung kag patawara ang imo katawohan nga nakasala batok sa imo. 40Karon, O Dios ko, ginapakilooy ko sa imo, magmuklat ang imo mga mata kag ilingig ang imo mga idulungug sa pangamuyo nga ginahimo sa sining duug.
41“Busa karon tindug, O Ginoong Dios, kag sulud sa imo palahuwayan,
ikaw kag ang kaban sang imo kusug.
Pagpanaputan sing kaluwasan ang imo mga sacerdote, O Ginoong Dios,
kag magkasadya sa kaayohan ang imo mga balaan.
42O Ginoong Dios, dili pagpatalikda ang nawung sang imo hinaplas!
Dumduma ang imo malig-on nga paghigugma kay David nga imo alagad.”#Sal. 132:8-10.
Currently Selected:
2 MGA CRONICA 6: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
