2 MGA CRONICA 4
4
Ang mga Gamit nga sa Templo
(1 Hari 7:23-51)
1Naghimo sia sing halaran nga saway,#Ex. 27:1-2. duha ka pulo ka maniko ang kalabaon, kag duha ka pulo ka maniko ang kasangkaron, kag napulo ka maniko ang kataason. 2Naghimo man sia sang isa ka dagat nga tinunaw; manipolon ini, napulo ka maniko sa bibig pa bibig, kag lima ka maniko ang kataason, kag isa ka lubid nga katloan ka maniko makalikus sini. 3Sa idalum sini may kaangay sang mga baka nga lalaki, sa palibut nga napulo ka maniko, sa palibut sang dagat; ang mga baka duha ka kubay, nga unay sang pagtunaw sini sang sia gintunaw. 4Natungtung ini sa napulog duha ka baka, nga ang tatlo nagatolok nayon sa aminhan, ang tatlo nagatolok nayon sa katundan, ang tatlo nagatolok nayon sa bagatnan, kag ang tatlo nagatolok nayon sa sidlangan; ang dagat natungtung sa ila, kag ang tanan nilang pangulihi nayon sa sulud. 5Ang kadamul sini dapal; kag ang bibig sini ginhimo kaangay sang bibig sang tagayan, kaangay sang bukad sang lirio: ini masudlan sing tatlo ka libo ka bat. 6Naghimo man sia sang napulo ka batiya,#Ex. 30:17-21. kag ginbutang ang lima sa too, kag ang lima sa wala, sa pagpanghugas sa ila. Nahugasan nila sa ila ang mga butang nga sa halad-nga-sinonog, apang ang dagat iya sang mga sacerdote panghinawan.
7Kag naghimo sia sang napulo ka candelero nga bulawan#Ex. 25:31-40. sono sa pagsolondan nahanungud sa ila, kag ginbutang niya sila sa sulud sang templo, lima sa too kag lima sa wala. 8Naghimo man sia sing napulo ka latok,#Ex. 25:23-30. kag ginbutang niya sila sa sulud sang templo, lima sa too kag lima sa wala. Kag naghimo sia sing isa ka gatus ka planggana nga bulawan. 9Naghimo sia sang luwang sang mga sacerdote, kag sang dakung luwang, kag mga takup sang ganhaan nga sa luwang, kag gintaklapan sing saway ang mga takup; 10kag ginpahamtang niya ang dagat sa kilid nga too nayon sa sidlangan pa bagatnan.
11Si Huram naghimo sang mga alabohan, sang mga pala, kag sang mga planggana. Gani natapus ni Huram ang paghimo sang buluhaton nga ginhimo niya kay Hari Salomon sa balay sang Dios: 12ang duha ka haligi, ang mga yahong, kag ang duha ka oloolo nga yara sa ukbung sang mga haligi; kag ang duha ka pinuna sa pagputus sang duha ka yahong sang mga oloolo nga yara sa ukbung sang mga haligi; 13kag ang apat ka gatus ka granada nga sa duha ka pinuna, duha ka kubay nga granada sa tagsa ka pinuna, sa pagputus sang duha ka yahong sang mga oloolo nga yara sa ukbung sang mga haligi. 14Ginhimo man niya ang mga tulungtungan, kag ginhimo niya ang mga batiya sa ibabaw sang mga tulungtungan, 15kag ang isa ka dagat, kag ang napulog duha ka baka sa idalum sini. 16Ang mga alabohan man, ang mga pala, ang mga kaw-it sa unud, kag ang tanan niyang gamit ginhimo ni Huram nga iya amay sila sa saway nga masiga tungud kay Hari Salomon nga sa balay sang Ginoo. 17Ginhorma sila sang hari sa kapatagan sang Jordan, sa duta nga daga sa ulut sang Sucot kag Zereda. 18Sa amo ginhimo ni Salomon ang tanan nga gamit sa dakung kabugana, sa bagay nga wala masayri ang timbang sang saway.
19Gani ginhimo ni Salomon ang tanan nga gamit nga yara sa balay sang Dios: ang halaran nga bulawan, ang mga latok nga sa ibabaw nila yara ang mga tinapay nga Pahayag, 20ang mga candelero pati ang ila mga suga nga bulawan nga bus-og nga sa pagpadabdab sono sa pagsolondan sa atubangan sang santuario; 21ang mga bukad, ang mga suga, kag ang mga kimpit, sa bulawan nga lubus; 22ang mga magpapalong, ang mga planggana, ang mga cuchara, kag ang mga balagahan, sa bulawan nga bus-og; kag nahanungud sang salamputan sang balay, ang nasulud nga mga ganhaan nga sa duug nga labi gid ka balaan kag ang mga ganhaan sang balay sang templo, sa bulawan.
Currently Selected:
2 MGA CRONICA 4: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
