2 MGA CRONICA 18
18
Si Micaya Nagatagna sang Pagdaug kay Acab kag kay Josafat
(1 Hari 22:1-40)
1Karon si Josafat may bugana nga manggad kag kadungganan; kag nagpakighimata sia kay Acab. 2Sa tapus sang pila ka tuig nagdulhog sia kay Acab sa Samaria. Kag si Acab nag-ihaw sing bugana nga mga carnero kag mga baka tungud sa iya kag sa mga tawo nga upud sa iya, kag ginbuyuk sia sa pagtaklad pa Ramot-galaad. 3Si Acab nga hari sang Israel nagsiling kay Josafat nga hari sang Juda, “Magaupud ka bala sa akon pakadto sa Ramot-galaad?” Sia nagsabat sa iya, “Ako subong sa imo, kag ang akon katawohan subong sang imo katawohan. Magaupud kami sa imo sa inaway.”
4Kag nagsiling si Josafat sa hari sang Israel, “Magpamangkot ka anay tungud sa polong sang Ginoo.” 5Niyan gintipon sing tingub sang hari sang Israel ang mga manalagna, apat ka gatus ka tawo, kag nagsiling sa ila, “Magataklad bala kami sa pag-away sa Ramot-galaad, ukon magapaumud ako?” Kag sila nagsiling, “Taklad; kay ang Dios magatugyan sini sa kamut sang hari.” 6Apang si Josafat nagsiling, “Wala bala diri sing iban pa nga manalagna sang Ginoo agud nga makapamangkot kita sa iya?” 7Kag ang hari sang Israel nagsiling kay Josafat, “May isa pa ka lalaki nga paagi sa iya makapamangkot kita sa Ginoo, apang ako nagadumut sa iya, kay wala sia nagatagna sing maayo nahanungud sa akon, kondi malaut sa gihapon, amo ini si Micaya nga lalaking anak ni Imla.” Kag si Josafat nagsiling, “Indi magsiling ang hari sing subong.” 8Niyan ang hari sang Israel nagtawag sing manugdumala kag nagsiling, “Dalha sing madali si Micaya nga anak ni Imla.” 9Karon ang hari sang Israel kag si Josafat nga hari sang Juda naglingkod ang tagsa sa iya trono, nga nasukluban sang ila mga panapton; kag naglingkod sila sa nakawaan sa salamputan sang gawang sang Samaria; kag ang tanan nga manalagna nagatagna sa atubangan nila. 10Kag si Sedequias nga lalaking anak ni Canaana naghimo nga sa iya sing mga sungay nga salsalon, kag nagsiling, “Amo ini ang ginasiling sang Ginoo, ‘Sa sini idusdus mo ang mga Siriahanon tubtub nga mapapas sila.’” 11Kag ang tanan nga manalagna nagtagna sing amo, nga nagasiling, “Taklad ka sa Ramot-galaad kag mag-uswag; ang Ginoo magatugyan sini sa kamut sang hari.”
12Kag ang manugbalita nga nagkadto sa pagtawag kay Micaya nagpamolong sa iya, “Yari karon, ang mga polong sang mga manalagna nagpahayag sing maayo sa hari sa isa ka baba; manginkaangay ang imo polong sa isa sa ila, kag magpamolong ka sing maayo.” 13Apang si Micaya nagsiling, “Sa nagkabuhi ang Ginoo, ang ginasiling sa akon sang akon Dios, ina ipamolong ko.” 14Kag sang nag-abut sia sa hari, ang hari nagsiling sa iya, “Micaya, magakadto bala kami sa pag-away sa Ramot-galaad, ukon magapaumud ako?” Kag sia nagsiling, “Taklad kamo kag mag-uswag; itugyan sila sa inyo kamut.” 15Apang ang hari nagsiling sa iya, “Makapila pa bala pasumpaon ko ikaw nga indi ka magpamolong sa akon sing bisan ano kondi ang kamatooran sa ngalan sang Ginoo?” 16Kag sia nagsiling, “Nakita ko ang bug-os nga Israel nga nag-aplaag sa kabukiran, subong sang mga carnero nga wala sing manugpahalab;#Mat. 9:36; Mar. 6:34. kag ang Ginoo nagsiling, ‘Ini sila wala sing agalon; magpauli ang tagsa ka tawo sa iya balay sa paghidait.’” 17Kag ang hari sang Israel nagsiling kay Josafat, “Wala bala ako magsugid sa imo nga nahanungud sa akon indi sia magtagna sing maayo, kondi malaut?” 18Kag si Micaya nagsiling, “Busa pamatii ang polong sang Ginoo: nakita ko ang Ginoo nga nagalingkod sa iya trono, kag ang bug-os nga kasoldadosan sang langit nagatindug sa iya too kag sa iya wala; 19kag ang Ginoo nagsiling, ‘Sin-o bala ang magapahaylo kay Acab nga hari sang Israel, agud nga magtaklad sia kag magdamhag sa Ramot-galaad?’ Kag ang isa nagsiling sa sini nga bagay, kag ang isa nagsiling sa sina nga bagay. 20Niyan may naggowa nga espiritu kag nag-atubang sa Ginoo, kag nagsiling, ‘Ako magapahaylo sa iya.’ Kag ang Ginoo nagsiling sa iya, ‘Sa ano bala?’ 21Kag sia nagsiling, ‘Ako magakadto, kag manginespiritu nga butigon sa baba sang tanan niya nga manalagna.’ Kag sia nagsiling, ‘Ikaw magapahaylo sa iya, kag magalandas man; kadto ka kag himoa ang subong.’ 22Busa yari karon, ang Ginoo nagbutang sing espiritu nga butigon sa baba sining imo nga mga manalagna; ang Ginoo nagpamolong sing malaut nahanungud sa imo.”
23Niyan nagpalapit si Sedequias nga lalaking anak ni Canaana kag gintampa si Micaya sa pisngi, kag nagsiling, “Diin bala mag-agi gikan sa akon ang Espiritu sang Ginoo sa pagpamolong sa imo?” 24Kag si Micaya nagsiling, “Yari karon, makita mo sa sadto nga adlaw kon magsulud ka sa hulut pa hulut sa pagpanago.” 25Kag ang hari sang Israel nagsiling, “Kuhaa ninyo si Micaya, kag dalha sia pabalik kay Amon nga pangolo-puud sang banwa kag kay Joas nga lalaking anak sang hari; 26kag isiling, ‘Amo ini ang ginasiling sang hari, Isulud ini nga tawo sa bilanggoan, kag saguron sia sang tinapay sang kapipit-an kag sang tubig sang kapipit-an, tubtub nga ako magbalik sa paghidait.’” 27Kag si Micaya nagsiling, “Kon makapauli ka nga mas-a sa paghidait, ang Ginoo wala magpamolong paagi sa akon.” Kag nagsiling sia, “Pamati, kamo nga mga katawohan!”
28Gani ang hari sang Israel kag si Josafat nga hari sang Juda nagtaklad pakadto sa Ramot-galaad. 29Kag ang hari sang Israel nagsiling kay Josafat, “Indi ako magpakilala sang akon kaugalingon kag magkadto sa inaway, apang suklub ka sang imo mga panapton.” Gani ang hari sang Israel wala magpakilala sang iya kaugalingon; kag nagkadto sila sa inaway. 30Karon ang hari sang Siria nagsogo sa mga pangolo sang iya mga kangga, “Dili kamo mag-away bisan sa magamay ukon sa dalagku, luwas lamang sa hari sang Israel.” 31Kag sang nakita sang mga pangolo sang mga kangga si Josafat, nagsiling sila, “Ini amo ang hari sang Israel.” Busa nagliso sila sa pag-away batok sa iya; apang si Josafat nagtuaw, kag gintabangan sia sang Ginoo. Gintandug sila sang Dios sa pagtaliwan gikan sa iya, 32kag sang nakita sang mga pangolo sang mga kangga nga indi ini ang hari sang Israel, nagbalik sila gikan sa paglagas sa iya. 33Apang ang isa ka tawo nagpana sing palagpat, kag naigo ang hari sang Israel sa ulut sang mga tinaboan sang hinganib; busa si Acab nagsiling sa manugkangga, “Palisoa ang imo kamut, kag pagowa ako gikan sa kasoldadosan, kag napilasan ako sing tama.” 34Kag ang inaway nagsandukot sa sadto nga adlaw, wala sing sapayan ang hari sang Israel nagpanikasug sa pagtindug sa iya kangga batok sa mga Sirianhon tubtub sa kahaponon; kag sa paghinunud sang adlaw napatay sia.
Currently Selected:
2 MGA CRONICA 18: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
