2 MGA CRONICA 17
17
Ang Ginharian ni Josafat Ginpalig-on
1Si Josafat nga iya anak nga lalaki naghari nga tal-us niya, kag nagpangalig-on sia batok sa Israel. 2Nagbutang sia sing mga kusug sa tanan nga banwa nga napamakuran sa Juda, kag nagbutang sing mga pamakud nga balantayan sa duta sang Juda, kag sa mga banwa sang Efraim nga naagaw ni Asa nga iya amay. 3Nag-upud ang Ginoo kay Josafat, bangud nga naglakat sia sa nahauna nga mga dalanon sang iya amay nga si David; sia wala magdangup sa mga Baal, 4kondi nagdangup sa Dios sang iya amay kag naglakat sa iya mga sogo, kag indi sono sa mga ginahimo sang Israel. 5Busa ginpalig-on sang Ginoo ang ginharian sa iya kamut; kag ang bug-os nga Juda nagdala kay Josafat sing buhis; kag may bugana sia nga manggad kag kadungganan. 6Ginbayaw ang iya tagiposoon sa mga dalanon sang Ginoo; kag dugang pa ginkuha niya ang mataas nga mga duug kag ang Asherim sa Juda.
7Sa ikatlo nga tuig sang iya paghari ginpadala niya ang iya mga principe, si Ben-hail, si Abdias, si Zacarias, si Natanael, kag si Micaya, sa pagpanudlo sa mga banwa sang Juda; 8kag upud sa ila ang mga Levinhon, si Semaias, si Netanias, si Zebadias, si Asael, si Semiramot, si Jonatan, si Adonias, si Tobias, kag si Tobadonias; kag upud sining mga Levinhon, si Elisama kag si Joram nga mga sacerdote. 9Kag nagpanudlo sila sa Juda, nga yara sa ila ang tolon-an sang kasogoan sang Ginoo; naglibut sila sa tanan gid nga banwa sang Juda kag nagtudlo sa katawohan.
10Kag ang kahadluk sa Ginoo nag-abut sa tanan nga ginharian sang mga duta nga yara sa palibut sang Juda, sa bagay nga wala sila mag-away batok kay Josafat. 11Ang iban sang mga Filistinhon nagdala sing mga dolot kay Josafat, kag pilak nga sa buhis; ang mga taga-Arabia man nagdala sa iya sing mga panong nga pito ka libo kag pito ka gatus ka mga carnero nga lalaki kag pito ka libo kag pito ka gatus ka mga kanding nga lalaki. 12Kag nagdaku sing lakas si Josafat. Nagpatindug sia sa Juda sing mga castilyo kag mga banwa nga suluptan, 13kag may madamu sia nga buluhaton sa mga banwa sang Juda. May mga tawo sia nga hangaway, nga gamhanan nga mga lalaki nga isganan, sa Jerusalem. 14Ini amo ang pag-isip sa ila sono sa ila mga kabaranggayan: gikan sa Juda, ang mga pangolo sang linibo: si Adna nga pangolo, upud sa iya ang tatlo ka gatus ka libo ka gamhanan nga mga tawo nga isganan, 15kag madason sa iya si Johanan nga pangolo, upud sa iya ang duha ka gatus kag kawaloan ka libo, 16kag madason sa iya si Amasias nga lalaking anak ni Zicri, nga naghalad sing kinabubut-on sang iya kaugalingon sa Ginoo, upud sa iya ang duha ka gatus ka libo ka gamhanan nga mga lalaki nga isganan. 17Gikan sa Benjamin; si Eliada, gamhanan nga lalaki nga isganan, upud sa iya ang duha ka gatus ka libo nga mga nasangkapan sing pana kag taming, 18kag madason sa iya si Jozabad upud sa iya ang isa ka gatus kag kawaloan ka libo nga nahanda sa inaway. 19Ini sila amo ang mga nag-alagad sa hari, luwas sang mga ginbutang sang hari sa mga banwa nga napamakuran sa bug-os gid nga Juda.
Currently Selected:
2 MGA CRONICA 17: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
