1 TIMOTEO 2
2
Mga Laygay nahanungud sa Pangamuyo
1Niyan, nahauna sa tanan, nagapangabay ako nga ang mga pag-ampo, mga pangamuyo, mga pagpakilooy, mga pagpasalamat himoon tungud sa tanan nga tawo, 2tungud sa mga hari kag sa tanan nga yara sa kagamhanan, agud nga magkabuhi kita sing malinong kag makidaiton, diosnon kag talahuron sa tagsa ka bagay. 3Ini maayo, kag kalahamut-an ini sa itololok sang Dios nga aton Manluluwas, 4nga buut nga ang tanan nga tawo maluwas kag makadangat sa pagkilala sang kamatooran. 5Kay may isa ka Dios, kag may isa ka manugpatunga sa Dios kag sa mga tawo, ang tawo nga si Cristo Jesus, 6nga naghatag sang iya kaugalingon subong nga gawad tungud sa tanan, nga ang pagpamatuud sini ginhatag sa nagakaigo nga tion. 7Tungud sini gintangdoan ako nga manugwali kag pinadala (nagasugid ako sang kamatooran, wala ako nagabutig), manunudlo sang mga Gentil sa pagtoo kag kamatooran.#2 Tim. 1:11.
8Buut ko niyan nga ang mga lalaki magpangamuyo sa tagsa ka duug, nga nagabayaw sing balaan nga mga kamut sa walay kaakig kag pagsinuay; 9subong man ang mga babayi magpamuni sing panapton nga nagakaigo nga may kaugdang kag kaligdong, indi nga may sinalapid nga buhuk ukon bulawan ukon mga mutya ukon panapton nga malahalon#1 Ped. 3:3. 10kondi paagi sa mga buhat nga maayo, nga bagay sa mga babayi nga nagapakadiosnon. 11Ang babayi magtoon sing hipus sa bug-os nga pagpasakup. 12Wala ako nagatugut sa babayi nga magpanudlo ukon maggahum sa lalaki; kinahanglan maghipus sia. 13Kay si Adam ginhimo sing una,#Gen. 2:7. ugaling si Eva;#Gen. 2:21-22. 14kag si Adam wala malimbongi, kondi ang babayi nalimbungan kag nagmalinapason.#Gen. 3:1-6. Walay sapayan ang babayi maluwas paagi sa pagpanganak, kon magpadayon sia sa pagtoo kag paghigugma kag pagkabalaan, nga may kaugdang.
Currently Selected:
1 TIMOTEO 2: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
