1 TIMOTEO 1
1
Pag-abiabi
1Si Pablo, pinadala ni Cristo Jesus sono sa sogo sang Dios nga aton Manluluwas kag ni Cristo Jesus nga aton paglaum,
2Kay Timoteo,#Binu. 16:1. akon matuud nga anak sa pagtoo:
Ang bugay, kalooy, kag paghidait nga gikan sa Dios nga Amay kag kay Cristo Jesus nga aton Ginoo.
Paandam batok sa Dimatuud nga Pagtolon-an
3Subong nga nagpangabay ako sa imo sang nagapakadto ako sa Macedonia, pabilin ka sa Efeso agud nga matulinan mo ang pila ka tawo nga dili magpanudlo sing tuhay nga pagtolon-an, 4ukon magsapak sa patopato nga mga sugilanon kag walay katapusan nga mga listahan sang kaliwatan nga nagahikot sing mga kasuayon sa baylo sang pagkatinugyanan sang Dios nga yara sa pagtoo; 5sanglit kay ang katuyoan sang aton tulin amo ang gugma nga gikan sa tagiposoon nga putli kag sa kaisipan nga maayo kag sa pagtoo nga bunayag. 6Ang pila ka mga tawo nga naglipas sa ila sini nagtalang sa walay pulus nga hambalanon, 7nga nagahandum sa pagkamanunudlo sang kasogoan, bisan wala sila makahangup sang ginasiling nila ukon sang mga butang nga ila ginapamatud-an.
8Karon aton nahibaloan nga ang kasogoan maayo, kon gamiton ini sang tawo sing nagakaigo, 9nga nakahibalo sini, nga ang kasogoan wala paghimoa sa matarung nga tawo kondi sa mga malinapason kag dimatinumanon, sa didiosnon kag mga makasasala, sa dibalaan kag dimatinahoron, sa mga manugpatay sang mga amay kag mga manugpatay sang mga iloy, sa mga manugpatay sing tawo, 10mga makihilawason, mga sodomanhon, mga makawat sang tawo, mga butigon, mga nagasaksi sing dimatuud, kag kon may iban pa nga batok sa maayong pagtolon-an, 11sono sa mahimayaon nga maayong balita sang Dios nga bulahan nga gintugyan sa akon.
Ang Pagpangabudlay ni Pablo
12Nagapasalamat ako sa nagpabakud sa akon tungud sini, si Cristo Jesus nga aton Ginoo, bangud nga ginkabig niya ako nga matutum sa pagtangdo sa akon sa iya pag-alagdan, 13bisan ako mapasipalahon anay kag manughingabut#Binu. 8:3; 9:4-5. kag manugtampalas sa iya; walay sapayan nakaagum ako sing kalooy kay ginhimo ko ini sa pagkadimatinoohon nga wala ako makahibalo, 14kag ang bugay sang aton Ginoo nagbugana sing lakas tungud sa akon kaupud sa pagtoo kag paghigugma nga yara kay Cristo Jesus. 15Matuud ang pinamolong kag takus sang bug-os nga pagbaton, nga si Cristo Jesus nag-abut sa kalibutan sa pagluwas sang mga makasasala. Kag ako amo ang labing makasasala; 16apang sa sining kabangdanan nakaagum ako sing kalooy, agud nga sa akon, nga labing makasasala, si Jesu-Cristo makapahayag sang himpit niyang pagkamabinatason nga huwaran sang mga magtoo sa iya tungud sa kabuhi nga walay katapusan. 17Sa Hari sang katuigan, nga dimamalatyon, dimakita, ang isa lamang ka Dios, ang kadungganan kag himaya sa katuigan kag katuigan. Kabay pa.
18Ining tulin ginatugyan ko sa imo, Timoteo, anak ko, sono sa mga tagna nga nagtudlo sa imo, agud nga bangud sa ila magpakig-away ka sang maayong pagpakig-away, 19nga nagahuput sang pagtoo kag maayong kaisipan. Paagi sa pagsikway sang kaisipan, ang pila ka mga tawo naglunud sang ila pagtoo, 20sa ila amo si Himeneo kag si Alejandro, nga gintugyan ko kay Satanas agud nga maton-an sila nga indi magpasipala sa Dios.
Currently Selected:
1 TIMOTEO 1: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
