1 PEDRO 5
5
Tatapa ang Panong sang Dios
1Gani ako nga masigkatigulang kag saksi sang mga pag-antus ni Cristo, nga umalambit man sang himaya nga ipahayag, nagalaygay sa mga tigulang sa tunga ninyo. 2Tatapa ninyo ang panong sang Dios#Juan 21:15-17. sa tunga ninyo, [nga magdumala] indi sa pilit kondi sa kinabubut-on [sono sa kabubut-on sang Dios], indi tungud sa didungganon nga daug kondi sa may pagkahanda, 3indi nga nagapakaginoo sa mga gintugyan sa inyo kondi nga nagahimo sang inyo kaugalingon nga mga huwaran sa panong. 4Kag kon magpahayag ang pangolo nga Manugpahalab magabaton kamo sang wala pagkalaya nga purungpurung sang himaya. 5Subong man kamo nga mga bataon magpasakup sa mga tigulang. Tanan kamo magpangwagkus sang pagpaubus, sa pag-alagad sa isa kag isa, kay “Ang Dios nagasumpung sang mga bugalon, apang nagabugay sa mga mapainubuson.”#Hulu. 3:34.
6Busa magpaubus kamo sang inyo kaugalingon sa idalum sang gamhanan nga kamut sang Dios, agud nga bayawon niya kamo sa nagakaigo nga tion.#Mat. 23:12; Luc. 14:11; 18:14. 7Magtugyan sang inyo tanan nga paghimud-os sa iya, kay sia nagakabalaka sa inyo. 8Magbut-anan kamo, magpulaw. Ang inyo kaaway nga yawa subong sang nagangurob nga leon nagaluyung, nga nagapangita sang iya tulukbon. 9Sumpunga sia, nga nagpangalig-on sa inyo pagtoo, nga nakahibalo nga ang amo man nga pag-antus ginakinahanglan sa inyo paghiliutud sa bug-os nga kalibutan. 10Kag ang Dios sang bug-os nga bugay, nga nagtawag sa inyo sa iya himaya nga dayon sa kay Cristo, sa tapus nga naka-antus kamo sa diotay nga tion, sia gid magahimpit, magapalig-on, kag magapabakud sa inyo. 11Sa iya ang kagamhanan sa katuigan kag katuigan. Kabay pa.
Katapusan nga mga Pag-abiabi
12Paagi kay Silvano,#Binu. 15:22, 40. nga aton matutum nga utud subong sa pagkabig ko sa iya, nakasulat ako sa inyo sing halip-ot, nga nagalaygay kag nagapamatuud nga ini amo ang matuud nga bugay sang Dios; magpakalig-on kamo sa sini. 13Sia nga yara sa Babilonia, nga pinili subong man sa inyo, nagaabiabi sa inyo; kag subong man si Marcos#Binu. 12:12, 25; 13:13; 15:37-39; Col. 4:10; Filem. 24. nga akon anak 14Mag-abiabihay kamo nga may haluk sang paghigugma.
Ang paghidait sa inyo tanan nga yara kay Cristo.
Currently Selected:
1 PEDRO 5: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
