1 PEDRO 4
4
Maayong mga Tulugyanan sang Bugay sang Dios
1Niyan sanglit nga nag-antus si Cristo sa unud, magsangkap kamo sa inyo kaugalingon sa amo nga panghunahuna, kay ang nakaantus sa unud nakauntat sa sala, 2agud nga indi na pag-ikabuhi ang nabilin nga tion sa unud sa mga kailigbon sang mga tawo kondi sa kabubut-on sang Dios. 3Ang nagtaliwan nga tion tuman na sa paghimo sang luyag himoon sang mga Gentil, sa paggawi sa mga kaulag, mga kailigbon, pagkapalainum sing alak, mga magansal nga kinalipay, mga paghinobog, kag mangil-ad nga mga diwata. 4Natingala sila nga wala kamo nagaupud sa ila sa amo nga lakas nga pagpatuyang, kag nagapakamalaut sa inyo; 5apang magahatag sila sing husay sa iya nga handa sa paghukom sa mga buhi kag sa mga patay. 6Kay sa sini nga katuyoan ginwali ang maayong balita sa mga patay man, agud nga bisan mahukman sila sono sa mga tawo sa unud, magkabuhi sila sono sa Dios sa espiritu.
7Ang katapusan sang tanan nga butang malapit na; busa magmaayo kamo sing hunahuna kag magbut-anan sa inyo mga pangamuyo. 8Labaw sa tanan magmainit kamo sa inyo paghigugmaanay, kay ang gugma nagatabon sang kadam-an nga mga sala.#Hulu. 10:12. 9Magmasapopohon kamo ang isa sa isa nga walay pagkumud. 10Ang tagsatagsa sono sa hiyas nga nabaton niya, maggamit sini sa tunga ninyo, subong nga maayong mga tulugyanan sang sarisari nga bugay sang Dios: 11kon may nagahambal, maghambal subong sang mga oraculo sang Dios; kon may nagaalagad, mag-alagad subong sang kusug nga ginasangkap sang Dios; agud nga sa tanan nga butang ang Dios mahimaya paagi kay Jesu-Cristo. Iya ang himaya kag ang kagamhanan sa katuigan kag katuigan. Kabay pa.
Pag-antus subong nga Cristohanon
12Mga hinigugma, dili kamo matingala nahanungud sang kalayohon nga pagtilaw sa tunga ninyo nga nagaabut sa pagtilaw sa inyo, subong nga daw ang kalatingalahan nga butang nahanabu sa inyo. 13Apang sa bagay nga mga umalambit kamo sang mga pag-antus ni Cristo magkalipay kamo, agud nga sa pagpahayag sang iya himaya man magkalipay kamo sa lakas nga kalipay. 14Kon ginapakahuy-an kamo tungud sang ngalan ni Cristo, bulahan kamo, kay ang espiritu sang himaya kag sang Dios yara sa inyo. 15Kay walay bisan sin-o sa inyo nga mag-antus subong nga nakapatay, ukon makawat, ukon manugbuhat sing kalautan, ukon subong nga mahilabtonon sa mga butang sang iban; 16apang kon may nagaantus subong nga Cristohanon, dili sia magkahuya kondi paghimayaon niya ang Dios sa sining ngalan. 17Kay ang tion nag-abut nga ang paghukom magsugud sa panimalay sang Dios; kag kon magsugud ini sa aton, ano bala ang katapusan sang mga wala magtuman sang maayong balita sang Dios? 18Kag
“Kon ang matarung halus maluwas,
diin bala magapahayag ang didiosnon kag ang makasasala?”#Hulu. 11:31.
19Busa ang mga nagaantus sono sa kabubut-on sang Dios maghimo sing matarung kag magpanugyan sang ila mga kalag sa matutum nga manunuga.
Currently Selected:
1 PEDRO 4: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
