1 MGA HARI 7
7
Ang Iban nga mga Balay ni Salomon
1Si Salomon nagpatindug sang iya kaugalingon nga balay sing napulo kag tatlo ka tuig, kag ginhuman niya sing bug-os ang iya balay.
2Ginpatindug niya ang Balay gikan sa Kagulangan sang Libano; isa ka gatus ka maniko ang iya kalabaon, kag kalim-an ka maniko ang iya kasangkaron, kag katloan ka maniko ang iya kataason, sa ibabaw sang apat ka kubay nga mga haligi nga cedro, nga may mga pasagi nga cedro sa ibabaw sang mga haligi. 3Kag nakisamihan ini sing cedro sa ibabaw nga nagatungtung sa kap-atan kag lima ka pasagi nga yara sa ibabaw sang mga haligi, napulo kag lima sa isa ka kubay. 4May tatlo ka kubay nga mga pasagi, kag ang talamwaan nagaatubang sa talamwaan sa tatlo ka kubay. 5Ang tanan nga ganhaan kag ang bakalan kasilo nga mga pasagi, kag ang talamwaan nagaatubang sa talamwaan sa tatlo ka kubay.
6Kag naghimo sia sing Portico sang mga Haligi; kalim-an ka maniko ang kalabaon, kag katloan ka maniko ang kasangkaron; ang portico sa atubangan nila, kag mga haligi kag atangan sa atubangan nila.
7Kag naghimo sia sang Portico sang Trono diin sia magahukom, bisan ang Portico nga Hukmanan; gintaklapan sing cedro kutub sa panalgan tubtub sa panalgan.
8Ang iya balay nga puluy-an niya, ang isa pa ka luwang sa sulud sang portico, kaangay nga buhat. Nagpatindug man si Salomon sing balay nga kaangay sini nga portico nga sa anak ni Faraon nga ginpangasawa ni Salomon.#1 Hari 3:1.
9Ini tanan sa mga bato nga malahalon, bisan sang bato nga binasbasan, sono sa takus, nga ginlagari sang mga lagari, sa gowa kag sa sulud, bisan kutub sa sadsaran tubtub sa angkub, kag subong sini sa gowa tubtub sa daku nga luwang. 10Ang sadsaran mga bato nga malahalon, bisan dalagku nga mga bato, mga bato nga tagnapulo ka maniko, kag mga bato nga tagwalo ka maniko. 11Kag sa ibabaw mga bato nga malahalon, bisan nabasbasan nga bato sono sa takus, kag kahoy nga cedro. 12Ang daku nga luwang palibut may tatlo ka kubay nga bato nga nabasbasan, kag isa ka kubay nga pasagi nga cedro; kaangay sa nasulud nga luwang sang balay sang Ginoo, kag sang portico sang balay.
Si Salomon Nagagamit kay Hiram sang Tiro
(2 Cron. 2:13-14)
13Kag si Hari Salomon nagpadala kag ginpakuha si Hiram gikan sa Tiro. 14Anak sia sang balo nga babayi sang kabikahan ni Neftali, kag ang iya amay tawo nga taga-Tiro, nga panday sa saway; kag puno sia sing kaalam, paghangup, kag pagkasampaton sa paghimo sang tanan nga buluhaton sa saway. Nagkadto sia kay Hari Salomon, kag naghimo sang tanan niya nga buluhaton.
Si Hiram Nagabasya sang mga Haligi nga Saway
(2 Cron. 3:15-17)
15Ginhuman niya ang duha ka haligi nga saway. Ang tagsa sa ila may kataason nga napulo kag walo ka maniko, kag ang lubid nga napulo kag duha ka maniko makalikos sa bisan diin sa ila. 16Naghimo sia sing duha ka oloolo nga tinunaw nga saway, nga ibutang sa mga ukbung sang mga haligi; ang kataason sang isa ka oloolo lima ka maniko, kag ang kataason sang isa pa ka oloolo lima ka maniko. 17May mga pinuna sang linala nga buhat kag mga bugway nga tinalikala nga sa mga oloolo sa ukbung sang mga haligi; pito nga sa isa ka oloolo, kag pito nga sa isa pa ka oloolo. 18Gani ginhimo niya ang mga haligi; may duha ka kubay sa palibut sa isa ka pinuna nga buhat, sa pagputus sang mga oloolo nga yara sa ukbung sang mga haligi; kag amo ini ang ginhimo niya sa iban nga oloolo. 19Karon ang mga oloolo nga yara sa ukbung sang mga haligi sa portico mga lirio nga binuhat, apat ka maniko. 20May mga oloolo sa ibabaw man sang duha ka haligi, malapit sa natiyan nga yara sa luyo sang pinuna; ang mga granada duha ka gatus, nga nagakubay palibut sa ibabaw sang iban nga oloolo. 21Ginpatindug niya ang mga haligi sa portico sang templo; ginpatindug niya ang haligi nga natoo kag ginhingalanan ini Jaquin; kag ginpatindug niya ang haligi nga nawala kag ginhingalanan ini Boaz. 22Kag sa ukbung sang mga haligi yara ang binuhat nga lirio. Sa amo natapus ang paghimo sang mga haligi.
Ang mga Gamit sa Templo
(2 Cron. 4:1–5:1)
23Niyan naghimo sia sang dagat nga tinunaw; napulo ka maniko gikan sa bibig pa bibig, nga manipolon palibut, kag ang iya kataason lima ka maniko, kag ang lubid nga katloan ka maniko naglikos sa iya palibut. 24Sa ubus sang iya bibig palibut may mga kolod sa palibut, nga napulo ka maniko, nga nagasapul sa dagat palibut; ang mga kolod duha ka kubay, nga ginbasya upud sang pagbasya sini. 25Nagtungtung ini sa napulog duha ka baka, ang tatlo nagaatubang sa aminhan, ang tatlo nagaatubang sa katundan, ang tatlo nagaatubang sa bagatnan, kag ang tatlo nagaatubang sa sidlangan; ang dagat nagatungtung sa ila, kag ang pangulihi nila tanan nayon sa sulud. 26Ang kadamul sini isa ka dapal; kag ang iya bibig ginhimo subong sang bibig sang tagayan, kaangay sang bukad sang lirio; ini nasudlan sing duha ka libo ka bat.
27Naghimo sia sing napulo ka tulungtungan nga saway; ang kalabaon sang isa ka tulungtungan apat ka maniko, ang kasangkaron apat ka maniko, kag tatlo ka maniko ang kataason sini. 28Ang paghimo sang mga tulungtungan amo ini: may mga dagpak sila, kag may mga dagpak sa ulut sang mga giding 29kag sa mga dagpak nga yara sa ulut sang mga giding may mga leon, mga baka, kag mga querubin. Sa ibabaw sang mga giding may tulungtungan nga natungtung; kag sa ubus sang mga leon kag mga baka may mga palungpung. 30Ang tagsa ka tulungtungan may apat ka rueda nga saway kag mga eje nga saway; kag ang la apat ka tiil may mga palatungan. Sa idalum sang batiya may mga tinunaw nga palatungan, nga may mga palungpung sa kilid sang tagsatagsa. 31Ang baba sini sa sulud sang oloolo kag pa ibabaw isa ka maniko; ang iya baba manipolon nga isa ka maniko kag tunga, sono sa pagbuhat sang tulungtungan. Sa baba sini man may mga gutib; kag ang ila mga dagpak kasilo, indi manipolon. 32Kag ang apat ka rueda sa idalum sang mga dagpak; ang mga eje sang mga rueda yara sa tulungtungan; kag ang kataason sang rueda isa ka maniko kag tunga. 33Ang pagbuhat sang mga rueda kaangay sang pagbuhat sang rueda sang kangga; ang ila mga eje, ang ila mga yanta, ang ila mga tasuk, kag ang ila mga kubo, tinunaw tanan. 34May apat ka palatungan sa apat ka pamusud sang tagsa ka tulungtungan; ang mga palatungan nila unay sa tulungtungan. 35Kag sa ibabaw sang tulungtungan may likin nga manipolon nga tunga sa maniko ang kataason; kag sa ibabaw sang tulungtungan ang iya mga kamkamo kag ang iya mga dagpak unay sila. 36Kag sa mga panid sang mga kamkamo kag sa mga dagpak nila, naggutib sia sing mga querubin, mga leon, kag mga palma, sono sa kalaparon sang tagsatagsa, nga may mga palungpung palibut. 37Sono sa sining bagay naghimo sia sing napulo ka tulungtungan; tanan sila may isa ka horma, isa ka takus, kag isa ka dagway.
38Kag naghimo sia sing napulo ka batiya nga saway;#Ex. 30:17-21. ang isa ka batiya nagasulud sing kap-atan ka bat, kag ang tagsa ka batiya apat ka maniko, kag ang isa ka batiya natungtung sa tagsa sang napulo ka tulungtungan. 39Kag ginbutang niya ang mga tulungtungan, lima sa too nga kilid sang balay, kag lima sa wala nga kilid sang balay; kag ginpahamtang niya ang dagat sa too sang balay sa nasidlangan nayon sa bagatnan.
40Naghimo si Hiram sang mga alabohan, sang mga pala, kag mga planggana. Gani gintapus ni Hiram ang paghimo sang tanan nga buluhaton nga ginhimo niya tungud kay Hari Salomon sa balay sang Ginoo: 41ang duha ka haligi, ang duha ka yahong sang mga oloolo nga yadto sa ukbung sang mga haligi, kag ang duha ka pinuna nga nagaputus sang duha ka yahong sang mga oloolo nga yara sa ukbung sang mga haligi; 42kag ang apat ka gatus ka granada nga sa duha ka pinuna, duha ka kubay nga mga granada sa tagsa ka pinuna, sa pagputus sang duha ka yahong sang mga oloolo nga yara sa ukbung sang mga haligi; 43ang napulo ka tulungtungan, kag ang napulo ka batiya sa ibabaw sang mga tulungtungan; 44kag ang dagat nga bugtong, kag ang napulog duha ka baka sa idalum sang dagat.
45Karon ang mga alabohan, ang mga pala, kag ang mga planggana, ini tanan nga gamit, mga pinahining nga saway nga ginhimo ni Hiram kay Hari Salomon, sa balay sang Ginoo. 46Ginhorma sila sang hari sa kapatagan sang Jordan, sa duta nga daga sa ulut sang Sucot kag Zaretan. 47Kag ang tanan nga gamit wala na pagtimbanga ni Salomon, bangud nga lakas sila kadamu; ang kabug-at sang saway indi mausisaan.
48Gani ginhimo ni Salomon ang tanan nga gamit sa balay sang Ginoo: ang halaran nga bulawan,#Ex. 30:1-3. ang latok nga bulawan nga natungtungan sang tinapay nga Pahayag,#Ex. 25:23-30. 49ang mga candelero#Ex. 25:31-40. lima sa too nga kilid kag lima sa wala, sa atubangan sang santuario, nga bug-os nga bulawan; ang mga bulak, ang mga suga, kag ang mga kimpit, sa bulawan; 50ang mga tagayan, ang mga inugpalong, ang mga planggana, ang mga cuchara, kag ang mga balagahan, bulawan nga bug-os; kag ang mga bisagra, nga sa mga ganhaan sang nasulud nga balay, ang duug nga labing balaan, kag sa mga ganhaan sang balay sang templo, sa bulawan.
51Sa sini ang bug-os nga buluhaton nga ginhimo ni Hari Salomon sa balay sang Ginoo nahuman. Kag ginpasulud ni Salomon ang mga butang nga ginhalad ni David nga iya amay,#2 Sam. 8:11; 1 Cron. 18:11. ang pilak, ang bulawan, kag ang mga gamit, kag ginsulud sila sa mga balahandian sang balay sang Ginoo.
Currently Selected:
1 MGA HARI 7: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
