1 MGA HARI 6

Si Salomon Nagapatindug sang Balay sang Ginoo

(2 Cron. 3:1-14)

1Sa ikap-at ka gatus kag kawaloan nga tuig sa tapus nga nakagowa ang katawohan sang Israel gikan sa Egipto, sa ikap-at nga tuig sang paghari ni Salomon sa Israel, sa bulan nga Zif, nga amo ang ikaduhang bulan, nagsugud sia sa pagpatindug sang balay sang Ginoo. 2Ang balay nga ginpatindug ni Hari Salomon sa Ginoo kan-uman ka maniko ang kalabaon, kag duha ka pulo ang kasangkaron, kag katloan ka maniko ang kataason. 3Ang portico sa atubangan sang templo sang balay duha ka pulo ka maniko ang kalabaon, sono sa kasangkad sang balay, kag napulo ka maniko ang iya kasangkad sa atubangan sang balay. 4Kag naghimo sia sa balay sing mga talambuan nga may unay nga balatibat. 5Nagpatindug sia sa kilid sang dingding sang balay sing mga panalgan palibut, sa kilid sang mga dingding sang balay palibut, sang templo kag sang santuario; kag naghimo sia sing mga hulut sa kilid palibut. 6Ang panalgan nga naidalum gid lima ka maniko ang kasangkaron, ang natunga anum ka maniko ang kasangkaron, kag ang ikatlo pito ka maniko ang kasangkaron; kay sa gowa naghimo sia sing mga alintaga sa dingding sang balay palibut agud nga indi magdulot ang mga soleras sa mga dingding sang balay.

7Kag ang balay, sang ginapatindug ini ginhimo gikan sa mga bato nga napamasbasan na sa kuluhaan-bato; gani wala sing palo ukon wasay ukon bisan ano nga galamiton nga salsalon sa balay nga nabatian sang ginapatindug ini.

8Ang ganhaan sang mga hulut nga natunga yara sa natoo nga kilid sang balay; kag nagasaka sila sa mga alintaga nga nagalibut pakadto sa natunga nga panalgan, kag gikan sa natunga pakadto sa ikatlo. 9Gani ginpatindug niya ang balay, kag gintapus ini; kag ginkisamihan niya ang balay sing mga soleras kag mga tapi nga cedro. 10Ginpatindug niya ang mga panalgan nga duut sa bug-os nga balay, ang tagsa lima ka maniko ang kataas, kag nagtungtung sila sa balay sa tablon nga cedro.

11Karon ang polong sang Ginoo nag-abut kay Salomon, 12“Nahanungud sini nga balay nga imo ginapatindug, kon maglakat ka sa akon mga palatukuran kag magtuman sang akon mga pagsolondan kag magbantay sang tanan ko nga sogo sa paglakat sa ila, niyan lig-onon ko sa imo ang akon polong, nga ginpamolong ko kay David nga imo amay. 13Kag magapuyo ako sa tunga sang mga anak sang Israel, kag indi magbiya sang akon katawohan nga Israel.”

14Gani ginpatindug ni Salomon ang balay, kag gintapus ini. 15Ginhimo niya ang mga dingding sang balay sa sulud nga mga tapi nga cedro; kutub sa salog sang balay tubtub sa dingding sang kisami, gintaklapan niya sila sa sulud sing kahoy; kag ginsalogan niya ang balay sing mga tapi nga abeto. 16Gindagpakan niya ang duha ka pulo ka maniko sa nalikod nga bahin sang balay sing mga tapi nga cedro kutub sa salog tubtub sa mga dingding sang kisami, kag gindagpakan niya sila sa nasulud nga sa santuario, bisan sa duug nga labing balaan.#Ex. 26:33-34. 17Ang balay, nga amo, ang templo sa atubangan sang santuario, kap-atan ka maniko ang kalabaon. 18Ang balay sa nasulud may cedro nga nagutiban sing mga atimon nga talonon kag bukad nga mga bulak; ang tanan cedro, wala sing makita nga bato. 19Sa tunga sang balay sa nasulud nag-aman sia sing santuario, sa pagbutang didto sang kaban sang katipan sang Ginoo. 20Sa sulud sang santuario may duha ka pulo ka maniko sa kalabaon, duha ka pulo ka maniko sa kasangkaron, kag duha ka pulo ka maniko sa kataason; kag gintaklapan niya ini sing bulawan nga ulay. Gindagpakan niya ang halaran sing cedro. 21Gani gintaklapan ni Salomon sing bulawan nga ulay ang balay sa nasulud, kag ginbitayan niya pabalabag sing mga talikala nga bulawan sa atubangan sang santuario, kag gintaklapan niya ini sing bulawan. 22Kag gintaklapan niya sing bulawan ang bug-os nga balay, tubtub nga ang bug-os nga balay nahil-ob. Ang bug-os nga halaran man nga naigo sa santuario gintaklapan niya sing bulawan.#Ex. 30:1-3.

23Sa santuario naghimo sia sing duha ka querubin#Ex. 25:18-20. nga kahoy nga olivo, ang tagsa napulo ka maniko ang kataason. 24Ang isa ka pakpak sang querubin lima ka maniko, kag ang ikaduha nga pakpak sang querubin lima ka maniko; napulo ka maniko kutub sa ukbung sang isa ka pakpak tubtub sa ukbung sang isa. 25Ang ikaduha nga querubin napulo ka maniko; ang duha ka querubin isa sing takus kag isa sing dagway. 26Ang kataason sang isa ka querubin napulo ka maniko, kag amo ini sa ikaduha nga querubin. 27Ginbutang niya ang mga querubin sa sulud sang balay nga nasulud; kag ang mga pakpak sang mga querubin nahumlad sa bagay nga ang pakpak sang isa nagduut sa isa ka dingding, kag ang pakpak sang isa pa ka querubin nagduut sa isa pa ka dingding; ang ila mga pakpak nagduutay sa tunga sang balay. 28Kag gintaklapan niya sing bulawan ang mga querubin.

29Gingutiban niya ang tanan nga dingding sang balay palibut sing ginutib nga mga dagway sang mga querubin kag sang mga palma kag nagabukad nga mga bulak, sa sulud kag sa gowa. 30Gintaklapan niya sing bulawan ang salog sang balay sa sulud kag sa gowa.

31Naghimo sia sa salamputan sang santuario sing mga ganhaan nga kahoy nga olivo; ang olohan sang ganhaan kag ang mga bakalan ikalima nga bahin sang dingding. 32Gani ginhimo niya ang duha ka takup sang ganhaan nga kahoy nga olivo kag naggutib sia sa ila sing mga querubin nga mga ginutib, mga palma, kag bukad nga mga bulak; gintaklapan sila sing bulawan, kag ginhil-ob niya sing bulawan ang mga querubin kag ang mga palma.

33Subong man naghimo sia sa salamputan sang templo sing mga bakalan nga kahoy nga olivo, sa ikap-at nga bahin sang dingding, 34kag sang duha ka takup sang ganhaan nga kahoy nga abeto; ang duha ka panid sang isa ka takup mapilopilo, kag ang duha ka panid sang isa pa ka takup mapilopilo. 35Naggutib sia sa ila sing mga querubin kag mga palma kag bukad nga mga bulak; kag gintaklapan niya sila sing bulawan nga ginpasibo niya sa ginutib. 36Ginhimo niya ang luwang nga nasulud sa tatlo ka kubay nga mga bato nga binasbasan kag isa ka kubay nga mga pasagi nga cedro.

37Sa ikap-at nga tuig napahamtang ang sadsaran sang balay sang Ginoo, sa bulan nga Zif. 38Kag sa ikapulog isa nga tuig, sa bulan nga Bul, nga amo ang bulan nga ikawalo, nahuman ang balay sa tanan niyang bahin, kag sono sa bug-os nga padugi sini. Gani ginpatindug niya ini sa pito ka tuig.

Currently Selected:

1 MGA HARI 6: ABHIL82

Highlight

Copy

Compare