1 MGA HARI 4
4
1Si Hari Salomon hari sa bug-os nga Israel, 2kag ini sila amo ang iya mga principe: si Azarias nga anak ni Sadoc amo ang sacerdote; 3si Elioref kag si Ahias nga mga anak ni Sisa mga escriba; si Josafat nga anak ni Ahilud manugsulat sang maragtas; 4si Benaya nga anak ni Joiada pangolo sang kasoldadosan; si Sadoc kag si Abiatar mga sacerdote; 5si Azarias nga anak ni Natan pangolo sang mga manugdumala; si Zabud nga anak ni Natan puno nga manug-alagad kag abyan sang hari; 6si Ahisar tulugyanan sang balay; kag si Adoniram nga anak ni Abda pangolo sang mga tawo nga nagapangabudlay sa takay.
7Si Salomon may napulog duha ka manugdumala sa bug-os nga Israel, nga nagaaman sing kalan-on sa hari kag sa iya panimalay; ang tagsa ka tawo nag-aman sing sakdag sa isa ka bulan sa isa ka tuig. 8Amo ini ang mga ngalan nila: si Benhur, sa kabakoloran sang Efraim; 9si Ben-dequer, sa Macaz, sa Saalbim, sa Bet-semes, kag sa Elon-bet-hanan; 10si Ben-hesed, sa Arubot (sa iya naigo ang Soco kag ang bug-os nga duta sang Hafer); 11si Ben-abinadab, sa kataasan sang Dor (asawa niya si Tapat nga anak ni Salomon); 12si Baana nga anak ni Ahilud, sa Taanac, sa Meguido kag sa bug-os nga Bet-sean nga yara sa tambi sang Zaretan sa ubus sang Jezreel, kutub sa Bet-sean tubtub sa Abil-mehola, tubtub sa unhan sang Jocneam; 13si Ben-geber, sa Ramot-galaad (sa iya naigo ang kabanwaanan ni Jair nga anak ni Manases, nga yara sa Galaad, sa iya naigo ang duta sang Argob, nga yara sa Basan, kan-uman ka banwa nga dalagku nga may mga kuta kag mga pintal nga saway); 14si Abinadab nga anak ni Iddo, sa Mahanaim; 15si Ahimaaz, sa Neftali (sia man nagpangasawa kay Batsemat nga anak ni Salomon); 16si Baana nga anak ni Husai, sa Aser kag sa Bealot; 17si Josafat nga anak ni Parua, sa Isacar; 18si Simei nga anak ni Ela, sa Benjamin; 19si Geber nga anak ni Uri, sa duta sang Galaad, ang duta ni Sihon nga hari sa mga Amornon kag ni Og nga hari sang Basan. Kag sia lamang ang manugdumala sa duta.
20Ang Juda kag Israel madamu subong sang balas nga yara sa baybayon sang dagat sa kadamuon; sila nagkaon kag nag-inum kag nagpangalipay. 21Si Salomon naggahum sa tanan nga ginharian kutub sa Suba tubtub sa duta sang mga Filistinhon kag tubtub sa dulunan sang Egipto;#Gen. 15:18; 2 Cron. 9:26. nagdala sila sing buhis kag nag-alagad kay Salomon sa tanan nga adlaw sang iya kabuhi.
22Ang kalan-on ni Salomon sa tagsa ka adlaw katloan ka koro nga harina nga mapino, kag kan-uman ka koro nga ginaling nga uyas, 23napulo ka baka nga matambok, kag duha ka pulo ka baka gikan sa halalban, kag isa ka gatus ka carnero, luwas sang mga usa nga kapon, mga gasela, mga usa nga lalaki, kag mga pispis nga pinatambok. 24Kay sia naggahum sa bug-os nga kadutaan sa tabok sang Suba kutub sa Tifsa tubtub sa Gaza, sa ibabaw sang tanan nga mga hari sa sining tabok sang Suba; kag may paghidait sia sa tanan nga kilid sa palibut niya. 25Kag ang Juda kag Israel nagpuyo sing malig-on, ang tagsa ka tawo sa idalum sang iya uvas kag sa idalum sang iya higuera, kutub sa Dan tubtub sa Beer-seba, sa tanan nga adlaw ni Salomon. 26Si Salomon may kap-atan ka libo ka palasudlan sang mga kabayo nga sa iya mga kangga, kag napulog duha ka libo ka manugkabayo.#1 Hari 10:26; 2 Cron. 1:14; 9:25. 27Kag yadtong mga manugdumala nag-aman sing kalan-on kay Hari Salomon, kag sa tanan nga nagasalo sa latok ni Hari Salomon, ang tagsa ka tawo sa iya bulan; wala nila pagpakulangi sing bisan ano. 28Nagpadala man sila sing sebada kag dagami nga sa mga kabayo kag sa mga kabayo nga madasig sa duug diin ang mga manugdumala, ang tagsa ka tawo sono sa iya katungdanan.
29Kag ginhatagan sang Dios si Salomon sing kaalam kag paghangup nga lakas, kag pagkadaku sing tagiposoon subong sang balas nga yara sa baybayon sang dagat, 30gani ang kaalam ni Salomon naglabaw sa kaalam sang tanan nga katawohan sang sidlangan, kag sa tanan nga kaalam sang Egipto. 31Kay maalam pa sia sa tanan nga tawo, kay Etan nga Ezranhon,#Sal. 89 Titulo. kay Heman, kay Calcol, kag kay Darda, ang mga anak ni Mahol; kag ang iya kabantugan yara sa tanan nga pungsud sa palibut. 32Nagpamolong sia sing tatlo ka libo ka hulubaton;#Hulu. 1:1; 10:1; 25:1. kag ang iya mga ambahanon isa ka libo kag lima.#Amb. 1:1. 33Nagpamolong sia nahanungud sang mga kahoy, kutub sa cedro sang Libano tubtub sa isopo nga nagatubo sa mga dingding; nagpamolong man sia nahanungud sang kasapatan, kag sang kapispisan, kag sang nagasaug nga mga butang, kag sang kaisdaan. 34Kag may nag-abut gikan sa tanan nga mga katawohan sa pagpamati sang kaalam ni Salomon, gikan sa tanan nga hari sang duta, nga nakabati nahanungud sang iya kaalam.
Currently Selected:
1 MGA HARI 4: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
