1 MGA HARI 3
3
Ginapangasawa ni Salomon ang Anak ni Faraon
1Si Salomon nakigtapik kay Faraon nga hari sang Egipto; ginpangasawa niya ang anak ni Faraon, kag gindala sia sa banwa ni David, tubtub nga nakatapus sia sa pagpatindug sang iya kaugalingon nga balay kag sang balay sang Ginoo kag sang mga kuta sang Jerusalem palibut. 2Ang katawohan naghalad lamang sa mataas nga mga duug bangud nga wala sing balay nga pinatindug sa ngalan sang Ginoo tubtub sadtong mga adlaw.
Si Salomon Nagapangamuyo sing Kaalam
(2 Cron. 1:1-13)
3Si Salomon naghigugma sa Ginoo, nga nagalakat sa mga palatukuran sang iya amay nga si David; lamang, naghalad sia kag nagsonog sing incienso sa mataas nga mga duug. 4Kag nagkadto ang hari sa Gabaon sa paghalad didto, kay yadto amo ang dakung duug nga mataas; isa ka libo ka halad-nga-sinonog ang ginhalad ni Salomon sa sadtong halaran. 5Ang Ginoo nagpakita kay Salomon sa Gabaon sa damgo sa kagab-ihon; kag ang Dios nagsiling, “Pangayo ka sang akon ihatag sa imo.” 6Kag si Salomon nagsabat, “Ikaw nagpakita sing dakung malig-on nga paghigugma sa imo alagad nga si David nga akon amay, sono sa paglakat niya sa atubangan mo sa kamatooran, sa pagkamatarung, kag sa katadlongan sang tagiposoon upud sa imo; kag ikaw nagtipig nga sa iya sining dakung malig-on nga paghigugma, kag ginhatagan mo sia sing anak nga lalaki sa paglingkod sa iya trono subong sining adlaw. 7Kag karon, O Ginoong Dios nakon, ginhimo mo nga hari ang imo alagad sa tal-us ni David nga akon amay, bisan ako isa lamang ka diotay nga bata; indi ako makahibalo kon paano ang paggowa ukon ang pagsulud. 8Kag ang imo alagad yara sa tunga sang imo katawohan nga imo ginpili, isa ka katawohan nga daku, nga indi maisip tungud sa kadamuon. 9Busa hatagi ang imo alagad sing tagiposoon nga mahangponon sa paghukom sang imo katawohan, agud nga makahibalo ako sang maayo kag malaut; kay sin-o bala ang sarang makahukom sining imo katawohan nga daku?”
10Ini nagpahamuut sa Ginoo nga si Salomon nagpangayo sining butang. 11Kag ang Dios nagsiling sa iya, “Bangud nga nagpangayo ka sining butang, kag wala magpangayo nga sa imo sing malawig nga kabuhi ukon nagpangayo nga sa imo sing manggad ukon nagpangayo sang kabuhi sang imo mga kaaway, kondi nga nagpangayo nga sa imo sing paghangup sa pagkilala sang katarungan, 12yari karon, nahimo ko sono sa imo polong. Yari karon, nahatagan ko ikaw sing tagiposoon nga maalam kag mahangponon, sa bagay nga wala sing kaangay sa imo sa una nimo kag wala sing bisan sin-o nga magatindug sa olihi nimo kaangay sa imo. 13Ako naghatag man sa imo sang wala mo pagpangayoa, tingub ang manggad kag kadungganan, sa bagay nga sa tunga sang mga hari wala sing bisan sin-o nga kaangay sa imo, sa tanan mo nga adlaw. 14Kag kon maglakat ka sa akon mga dalanon, sa pagbantay sang akon mga palatukuran kag sang akon mga sogo subong sang paglakat ni David nga imo amay, niyan palawigon ko ang imo mga adlaw.”
15Kag nagmata si Salomon, kag yari karon, ini damgo. Niyan nagkadto sia sa Jerusalem, kag nagtindug sa atubangan sang kaban sang katipan sang Ginoo, kag nagdolot sing mga halad-nga-sinonog kag nagdolot sing mga halad-sa-paghidait, kag naghimo sing piesta sa tanan niyang alagad.
Ang Kaalam kag Kabuganaan ni Salomon
16Niyan nag-abut ang duha ka babaying makihilawason sa hari, kag nag-atubang sa iya. 17Nagsiling ang isa ka babayi, “O, ginoo ko, ako kag ining babayi nagapuyo sa isa ka balay; kag ako nag-anak upud sa iya sa balay. 18Niyan sa ikatlong adlaw sa tapus na ako nag-anak, ining babayi nag-anak man; kag nag-upud kami; wala sing dumoloong upud sa amon sa balay, luwas sa amon nga duha sa balay. 19Kag sa kagab-ihon ang anak sining babayi napatay, bangud nga napintalan niya sia. 20Kag nagbangon sia sa tungang gab-i, kag ginkuha ang akon anak nga lalaki sa luyo nakon, sang nagakatolog ang imo ulipon, kag ginbutang ini sa iya sabak, kag ginbutang sa akon sabak ang iya anak nga patay. 21Sang pagbangon ko sa kaagahon sa pagpasoso sang akon anak, yari karon, patay na sia; apang sang gintan-aw ko sia sa pagkaaga, yari karon, indi akon anak, nga gin-anak ko.” 22Apang ang isa ka babayi nagsiling, “Indi, kondi ang buhi akon anak, kag ang patay imo anak.” Kag ini nagsabat, “Indi, kondi imo anak ang patay, kag akon anak ang buhi.” Amo ini ang pagpamolong nila sa atubangan sang hari.
23Niyan ang hari nagsiling, “Ang isa nagasiling, ‘Akon ini anak ang buhi, kag imo anak ang patay’; kag ang isa nagasabat, ‘Indi; kondi imo anak ang patay, kag akon anak ang buhi.’” 24Kag ang hari nagsiling, “Dalhi ako sing espada.” Gani nagdala sila sing espada sa atubangan sang hari. 25Kag ang hari nagsiling, “Pihaka ang bata nga buhi, kag ihatag ang katunga sa isa, kag ang katunga sa isa.” 26Niyan ang babayi nga tag-iya sang bata nga buhi nagpamolong sa hari, kay ang iya tagiposoon naawa sa iya anak, “O, ginoo ko, ihatag sa iya ang bata nga buhi, kag dili sia pagpatya.” Apang ang isa nagsiling, “Indi ini mangin-akon ukon mangin-imo; pihaka sia.” 27Niyan ang hari nagsabat kag nagsiling, “Ihatag sa isa ang anak nga buhi, kag indi sia pagpatya; sia amo ang iya iloy.” 28Kag ang bug-os nga Israel nakabati sang paghukom nga nahukom sang hari; kag nahadluk sila sa hari, kay nakita nila nga yara sa iya ang kaalam sang Dios, sa paghimo sing katarungan.
Currently Selected:
1 MGA HARI 3: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
