1 MGA HARI 18

Si Elias Nagabalik kay Acab

1Sang nagligad ang madamung adlaw nag-abut ang polong sang Ginoo kay Elias, sa ikatlong tuig, nga nagasiling, “Lakat, pakita ka kay Acab; kag ako magapaulan sa duta.” 2Gani si Elias naglakat sa pagpakita kay Acab. Karon ang tiggulutum matama sa Samaria. 3Kag gintawag ni Acab si Abdias, nga tulugyanan sang panimalay. (Karon si Abdias nahadluk sing daku sa Ginoo; 4kag sang pagpapas ni Jezabel sang mga manalagna sang Ginoo, ginkuha ni Abdias ang isa ka gatus ka manalagna kag gintago sila sa tagkinalim-an sa lungib, kag ginpakaon sila sing tinapay kag tubig.) 5Kag si Acab nagsiling kay Abdias, “Latasa ang duta tubtub sa tanan nga tuburan sang tubig kag sa tanan nga kasapaan; ayhan makakita kita sing hilamon kag maluwas nga buhi ang mga kabayo kag mga mula, agud nga indi ta madula ang tanan nga kasapatan.” 6Gani ginbahinbahin nila sa ila ang duta sa paglatas sini; si Acab nagkadto sia iya sa isa ka dalan, kag si Abdias nagkadto sia iya sa lain nga dalan.

7Kag sang si Abdias yara sa dalanon, yari karon, si Elias nagsugata sa iya; kag nakilala niya sia, kag naghapa sia, kag nagsiling, “Ikaw bala ina, ginoo kong Elias?” 8Kag sia nagsabat sa iya, “Ako ini. Lakat, sugiri ang imo ginoo, ‘Yari karon, yari si Elias.’” 9Kag nagsiling sia, “Diin bala ako nakasala, nga itugyan mo ang imo alagad sa kamut ni Acab, sa pagpapatay sa akon? 10Sa nagakabuhi ang Ginoo nga imo Dios, wala gid sing pungsud ukon ginharian nga wala mapakadtoi sang akon ginoo sa pagpangita sa imo; kag sang nagsiling sila, ‘Wala sia diri,’ ginpasumpa niya ang ginharian kag ang pungsud, nga wala ka nila makita. 11Kag karon ikaw nagsiling, ‘Lakat, sugiri ang imo ginoo,’ “Yari karon, yari si Elias.”’ 12Kag sa gilayon nga makataliwan ako sa imo, ang Espiritu sang Ginoo magadala sa imo diin wala ko mahibaloi; kag gani, kon mag-abut ako kag magsugid kay Acab kag indi ka niya makita, patyon niya ako, apang ako nga imo alagad nahadluk sa Ginoo kutub sa akon pagkapamatan-on. 13Wala bala masugid sa akon ginoo ang ginhimo ko sang ginpatay ni Jezabel ang mga manalagna sang Ginoo kon paano nga gintago ko ang isa ka gatus ka tawo sang mga manalagna sang Ginoo sa tagkalim-an sa lungib, kag ginpakaon sila sing tinapay kag tubig? 14Kag karon nagasiling ka, ‘Lakat, sugiri ang imo ginoo, “Yari karon, yari si Elias”’; kag patyon niya ako.” 15Kag si Elias nagsiling, “Sa nagakabuhi ang Ginoo sang kasoldadosan, nga sa atubangan niya nagatindug ako, magapakita ako sing totoo sa iya karon nga adlaw.” 16Gani si Abdias naglakat sa pagsugata kay Acab, kag nagsugid sa iya; kag si Acab nagkadto sa pagsugata kay Elias.

17Sang nakita ni Acab si Elias, nagsiling sa iya si Acab, “Ikaw bala ina, ikaw nga manugpagamo sang Israel?” 18Kag sia nagsabat, “Wala ako magpagamo sang Israel; kondi ikaw, kag ang panimalay sang imo amay, nga nagbiya kamo sang mga sogo sang Ginoo kag nagsonod sa mga Baal. 19Busa karon padala ka kag tipona sa akon ang bug-os nga Israel sa Bukid nga Carmelo, kag ang apat ka gatus kag kalim-an ka manalagna ni Baal kag apat ka gatus ka manalagna sang Ashera, nga nagakaon sa latok ni Jezabel.”

Ang Paindis-indis sa Bukid nga Carmelo

20Gani si Acab nagpadala sa tanan nga katawohan sang Israel, kag gintipon sing tingub ang mga manalagna sa Bukid nga Carmelo. 21Kag nagpalapit si Elias sa bug-os nga katawohan, kag nagsiling, “Tubtub pa bala san-o magpiniang kamo sa tunga sang duha ka panghunahuna? Kon ang Ginoo among Dios, sonda sia; apang kon si Baal, niyan sonda sia.” Kag ang katawohan wala magsabat bisan isa ka polong. 22Niyan si Elias nagsiling sa katawohan, “Ako, ako gid lamang, ang nabilin nga manalagna sang Ginoo; apang ang mga manalagna ni Baal apat ka gatus kag kalim-an ka tawo. 23Busa pahataga sila sa amon sing duha ka tinday nga baka; kag magpili sila nga sa ila sing isa ka tinday nga baka, kag hiwahiwaon ini kag itungtung ini sa gatong, kag indi pagbutangan sing kalayo sa idalum; kag ako magaaman sang isa ka tinday nga baka kag itungtung ini sa gatong, kag indi pagbutangan sing kalayo sa idalum. 24Kag panawag kamo sa ngalan sang inyo dios kag ako magapanawag sa ngalan sang Ginoo; kag ang Dios nga nagasabat paagi sa kalayo, manginsia ang Dios.” Kag ang bug-os nga katawohan nagsabat, “Maayo nga pinamolong.” 25Niyan si Elias nagsiling sa mga manalagna ni Baal, “Pili kamo nga sa inyo sing isa ka tinday nga baka kag amana ini sing una, kay madamu kamo; kag panawag kamo sa ngalan sang inyo dios, apang dili ninyo pagbutangan sing kalayo sa idalum.” 26Kag ginkuha nila ang tinday nga baka nga ginhatag sa ila, kag gin-aman nila ini, kag nagpanawag sa ngalan ni Baal kutub sa aga tubtub gid sa odto, nga nagasiling, “O Baal, sabta kami!” Apang wala sing tingug, ukon bisan sin-o nga nagsabat. Kag naglumpatlumpat sila palibut sa halaran nga nahimo. 27Kag sa odto si Elias nag-uligyat sa ila, nga nagsiling, “Singgit kamo sing mabaskug, kay dios sia; ayhan nagapamalandong sia, ukon nagdayan sia, ukon sa panlakatan sia, ukon ayhan nagakatolog sia kag dapat pukawon.” 28Kag nagtuaw sila sing mabaskug, kag nagpilas sila sang ila kaugalingon sono sa ila kinabatasan sa mga sundang kag mga bangkaw, tubtub nga nag-agay ang dugo sa ila. 29Kag sang nagligad ang odto, nagpanagna sila tubtub sa tion nga inugdolot sang halad sa kahaponanon, apang wala sing tingug; ukon bisan sin-o nga nagsabat, ukon bisan sin-o nga nagsapak.

30Niyan si Elias nagsiling sa bug-os nga katawohan, “Palapit kamo sa akon”; kag ang bug-os nga katawohan nagpalapit sa iya. Kag ginkaayo niya ang halaran sang Ginoo nga nawagwag; 31nagkuha si Elias sing napulo kag duha ka bato, sono sa kadamuon sang mga kabikahan sang mga anak ni Jacob, nga sa iya nag-abut ang polong sang Ginoo, nga nagasiling, “Si Israel mangin-imo ngalan”;#Gen. 32:28; 35:10. 32kag sa sini nga mga bato nagpatindug sia sing halaran sa ngalan sang Ginoo. Kag naghimo sia sa palibut sang halaran sing kalog, subong kadaku sa masudlan sang duha ka sukub nga binhi. 33Kag ginbangdaybangday niya ang gatong, kag ginhiwahiwa niya ang tinday nga baka kag gintungtung ini sa gatong. Kag nagsiling sia, “Pun-a ninyo ang apat ka banga sing tubig, kag iula ini sa halad-nga-sinonog, kag sa gatong.” 34Kag nagsiling sia, “Himoa ini sa ikaduha”; kag ginhimo nila ini sa ikaduha. Kag nagsiling sia, “Himoa ini sa ikatlo”; kag ginhimo nila ini sa ikatlo. 35Kag ang tubig nag-ilig sa palibut sang halaran, kag ginpuno man niya sing tubig ang kalog.

36Kag sa tion nga inugdolot sang halad sa kahaponon, nagpalapit ang manalagna nga si Elias kag nagsiling, “O Ginoo, ang Dios ni Abraham, ni Isaac, kag ni Israel, ipakilala sini nga adlaw nga ikaw amo ang Dios sang Israel, kag nga ako imo alagad, kag nga tungud sang imo polong ginhimo ko ini tanan nga butang. 37Pamatii ako, O Ginoo, pamatii ako, agud nga ini nga katawohan magkilala nga ikaw, O Ginoo, amo ang Dios, kag nga ikaw nagpabalik liwat sang tagiposoon nila.” 38Niyan ang kalayo sang Ginoo naholog, kag nag-upus sang halad-nga-sinonog, kag sang gatong, kag sang mga bato, kag sang yab-ok, kag nagdilap sang tubig nga yadto sa kalog. 39Kag sang nakita ini sang bug-os nga katawohan, naghapa sila; kag nagsiling sila, “Ang Ginoo, sia amo ang Dios; ang Ginoo, sia amo ang Dios.” 40Kag si Elias nagsiling sa ila, “Dakpa ang mga manalagna ni Baal; dili pagpapalagyoha ang isa sa ila.” Kag gindakup nila sila; kag ginpadulhog sila ni Elias sa sapa nga Cison, kag ginpatay sila didto.

Si Elias Nagapangamuyo nga Mag-ulan

41Kag si Elias nagsiling kay Acab, “Taklad ka, magkaon kag mag-inum; kay may huganas sang bugana nga ulan.” 42Gani si Acab nagtaklad sa pagkaon kag sa pag-inum. Kag si Elias nagtaklad sa putokputokan sang Carmelo; kag nagdunguk sia iya sa duta, kag ginbutang ang iya nawung sa ulut sang iya mga tuhod. 43Kag nagsiling sia sa iya alagad, “Taklad na karon, tolok nayon sa lawud.” Kag sia nagtaklad kag nagtolok, kag nagsiling, “Wala sing ano.” Kag nagsiling sia, “Lakat liwat sing makapito.” 44Kag sa ikapitong tion nagsiling sia, “Yari karon, may nagapaibabaw nga gal-um gikan sa lawud subong kadiotay sang kamut sang tawo.” Kag nagsiling sia, “Taklad ka, isiling kay Acab, ‘Takdi ang imo kangga kag dulhog ka, agud indi ka pag-upangan sang ulan.’” 45Kag sa wala madugay nga tion ang mga langit nagdulum sa mga gal-um kag hangin, kag may daku nga ulan.#Sant. 5:18. Kag si Acab nagsakay kag nagkadto sa Jezreel. 46Kag ang kamut sang Ginoo yara kay Elias; kag nagpanampion sia kag nagdalagan nga nakauna kay Acab sa salamputan sang Jezreel.

Currently Selected:

1 MGA HARI 18: ABHIL82

Highlight

Copy