1 CORINTO 11

1Magmanug-ilog kamo sa akon,#1 Cor. 4:16; Filip. 3:17. subong nga ako manug-ilog ni Cristo.

Ang Takurung sang mga Babayi

2Ginadayaw ko kamo bangud nga ginadumdum ako ninyo sa tanan nga butang kag ginahuptan ninyo ang mga ginpalaton nga pagtolon-an subong nga gintugyan ko sila sa inyo. 3Apang buut ko nga mahibaloan ninyo nga ang olo sang tagsa ka tawo amo si Cristo, ang olo sang babayi amo ang iya bana, kag ang olo ni Cristo amo ang Dios. 4Ang bisan sin-ong tawo nga nagapangamuyo ukon nagapanagna nga may tabon ang iya olo nagapakahuya sang iya olo, 5apang ang sin-ong babayi nga nagapangamuyo ukon nagapanagna nga walay takurung ang iya olo nagapakahuya sang iya olo—ang iya olo subong sang nakiskisan. 6Kay kon ang babayi wala pagtakurung, niyan magpaalot sia; apang kon kahuluy-an sa babayi nga magpaalot ukon magpakiskis, patakurunga sia. 7Kay ang lalaki indi dapat magtakurung sang iya olo, kay larawan kag himaya sia sang Dios;#Gen. 1:26. apang ang babayi himaya sang lalaki. 8(Kay ang lalaki wala ginhimo gikan sa babayi, kondi ang babayi gikan sa lalaki. 9Ang lalaki wala pagtugaha tungud sa babayi, kondi ang babayi tungud sa lalaki.)#Gen. 2:18-23. 10Sa sini nga kabangdanan ang babayi dapat magtakurung sang iya olo, bangud sang mga manugtunda. 11(Walay sapayan, sa Ginoo ang lalaki indi makapadayon sa walay babayi ukon ang babayi sa walay lalaki; 12kay subong nga ang babayi nagikan sa lalaki, gani karon ang lalaki natawo gikan sa babayi. Kag ang tanan nga butang nagagikan sa Dios.) 13Hukmi ninyo sa inyo kaugalingon; nagakaigo bala nga magpangamuyo sa Dios ang babayi nga walay takurung? 14Wala bala ang kinaugali gid nagatudlo sa inyo nga kon ang lalaki may bohok nga malaba, kahuluy-an ini sa iya, 15apang kon ang babayi may bohok nga malaba, himaya ini sa iya? Kay ang iya bohok ginhatag sa iya nga italabon. 16Kon ang bisan sin-o nga tawo daw makisuayon, wala kita nagakilala sing lain nga paagi, bisan ang mga iglesia sang Dios.

Mga Sayup nga Paggamit sang Balaan nga Panihapon

17Apang sa paghatag sa inyo sini nga sogo wala ako nagadayaw sa inyo, bangud nga nagatipon kamo indi sa maayo kondi sa malain. 18Kay, nahauna sa tanan, kon magtipon kamo sa iglesia, ginapamatian ko nga may mga binahinbahin sa inyo; kag sa isa ka bagay nagapati ako, 19kay kinahanglan nga may mga pagbinahinbahin dira sa inyo, agud nga ang mga hanuut magdayag sa tunga ninyo. 20Kon magtingub kamo, indi ang panihapon sang Ginoo ang ginakaon ninyo. 21Kay sa nagakaon, ang tagsatagsa nagakaon sang iya kaugalingon nga pagkaon sing una sa iban, kag ang isa gutum kag ang isa hobog. 22Ano! Wala bala kamo sing inyo mga balay nga kaonan kag imnan? Ukon ginatamay bala ninyo ang iglesia sang Dios kag ginapakahuy-an ang mga wala sing ila? Ano bala ang isiling ko sa inyo? Dayawon ko bala kamo sa sini? Indi gid ako.

Ang Tulumanon sa Balaan nga Panihapon

(Mat. 26:26-29; Mar. 14:22-25; Luc. 22:14-20)

23Kay ginbaton ko sa Ginoo ang ginpalaton ko man sa inyo, nga si Ginoong Jesus sang gab-i nga gintugyan sia nagkuha sing tinapay, 24kag sang nakapasalamat sia, gintipiktipik niya ini, kag nagsiling, “Ini amo ang akon lawas nga ginatipiktipik tungud sa inyo. Himoa ini sa handumanan nakon.” 25Sa amo man nga bagay ang tagayan, sa tapus ang panihapon, nga nagasiling, “Ini nga tagayan amo ang bay-ong katipan#Jer. 31:31-34. sa akon dugo.#Ex. 24:6-8. Himoa ini, sa masunsun nga pag-inum ninyo sini, sa handumanan nakon.” 26Kay sa masunsun nga nagakaon kamo sining tinapay kag nagainum sa tagayan, ginabantala ninyo ang kamatayon sang Ginoo tubtub nga magkari sia.

Ditakus nga Pag-ambit sa Balaan nga Panihapon

27Busa ang bisan sin-o nga magkaon sang tinapay ukon mag-inum sa tagayan sang Ginoo sing indi takus manginmalinapason sang lawas kag sang dugo sang Ginoo. 28Ang tawo mag-usisa sa iya kaugalingon, kag sa sina magkaon sia sang tinapay kag mag-inum sa tagayan. 29Kay ang nagakaon kag nagainum nga wala pagkilala sang lawas sang Ginoo, nagakaon kag nagainum sing paghukom sa iya kaugalingon. 30Sa sini nga kabangdanan madamu sa inyo ang maluya kag masakiton, kag ang iban napatay.#11:30 Sa Griego katolog na. 31Apang kon ginhukman ta sing matarung ang aton kaugalingon, indi kita paghukman. 32Apang kon ginahukman kita ginasilotan kita sang Ginoo, agud nga indi kita matagudilian kaupud sang kalibutan.

33Gani, mga kauturan ko, kon kamo magtingub sa pagkaon, maghinulatay kamo— 34kon ang bisan sin-o ginagutum, magkaon sa iya balay—agud nga ang inyo pagtingub indi manginsa katagudilian. Nahanungud sa iban nga mga butang husayon ko kon mag-abut ako.

Currently Selected:

1 CORINTO 11: ABHIL82

Highlight

Copy

Compare