1 CORINTO 10

Paandam batok sa Diwata

1Ako buut, mga kauturan, nga mahibaloan ninyo nga ang tanan ta nga ginikanan nagpaidalum sa panganud,#Ex. 13:21-22. kag tanan nagtabok sa dagat,#Ex. 14:22-29. 2kag ang tanan kay Moises ginbautisohan sa panganud kag sa dagat, 3kag ang tanan nagkaon sang amo man nga pagkaon nga espirituhanon#Ex. 16:35. 4kag ang tanan nag-inum sang amo man nga ilimnon nga espirituhanon.#Ex. 17:6; Num. 20:11. Kay nag-inum sila sa Igang nga espirituhanon nga nagsonod sa ila, kag ang Igang amo si Cristo. 5Walay sapayan sa kalabanan sa ila ang Dios wala mahamuut; kay ginpanglaglag sila sa kamingawan.#Num. 14:29-30.

6Karon ining mga butang mga paandam sa aton, nga indi magkaibog sang malaut subong sang ila ginhimo.#Num. 11:4. 7Dili kamo magdiwatahan subong sang iban sa ila; subong sang nasulat, “Naglingkod ang katawohan sa pagkaon kag pag-inum kag nagtindug sa pagsaut.”#Ex. 32:6. 8Dili kita magpakighilawas subong sang ginhimo sang iban sa ila, kag sa isa ka adlaw nagkapukan ang duha ka pulo kag tatlo ka libo.#Num. 25:1-18. 9Dili ta pagtilawan ang Ginoo, subong sang pagtilaw sang iban sa ila kag ginlaglag sang mga man-ug;#Num. 21:5-6. 10ukon magkumud, subong sang ginhimo sang iban kag ginlaglag sang Manuglaglag.#Num. 16:41-49. 11Karon ining mga butang nahanabu sa ila subong nga paandam, apang ginsulat sila sa pagtudlo sa aton, nga naabutan sang katapusan sang mga panuigon. 12Busa ang nagahunahuna nga nagatindug sia mag-andam basi kon mapukan sia. 13Walay pagsulay nga nakaabut sa inyo nga indi masarangan sang tawo. Ang Dios matutum, kag indi magtugut nga sulayon kamo labaw sa inyo masarangan, kondi kaupud sang pagsulay magahatag man sing lulutsan, agud nga makasarang kamo sa pagbatas.

14Busa, mga hinigugma ko, likawi ang pagsimba sa mga diosdios. 15Nagahambal ako subong sa mga tawo nga maalam; hukmi ninyo ang akon ginasiling. 16Ang tagayan sang pagpakamaayo nga aton ginapakamaayo, indi bala amo ang pagpakig-ambit sa dugo ni Cristo? Ang tinapay nga aton ginatipiktipik, indi bala amo ang pagpakig-ambit sa lawas ni Cristo?#Mat. 26:26-28; Mar. 14:22-24; Luc. 22:19-20. 17Bangud nga may isa ka tinapay, kita nga madamu isa ka lawas, kay kita tanan nagapakig-ambit sang isa ka tinapay. 18Talupangda ang buluhaton sang Israel; indi bala ang mga nagakaon sang mga halad mga umalambit sa halaran?#Lev. 7:6. 19Niyan ano bala ang buut ko silingon? Nga ang kalan-on nga ginhalad sa mga diosdios may kahologan, ukon ang diosdios may kahologan? 20Indi, ang buut ko silingon nga ang ginahalad sang mga Gentil, ginahalad nila sa mga yawa kag indi sa Dios.#Deut. 32:17. Indi ako buut nga mag-umalambit kamo sa mga yawa. 21Indi kamo makainum sa tagayan sang Ginoo kag sa tagayan sang mga yawa. Indi kamo makaambit sa latok sang Ginoo kag sa latok sang mga yawa. 22Paimonon ta bala ang Ginoo?#Deut. 32:21. Makusug pa bala kita sa iya?

Himoa ang Tanan sa Himaya sang Dios

23“Ang tanan nga butang tugut,” apang indi ang tanan nga butang kaayohan.#1 Cor. 6:12. “Ang tanan nga butang tugut,” apang indi ang tanan nga butang nagapalig-on. 24Walay tawo nga magpangita sang iya kaugalingon nga kaayohan, kondi ang kaayohan sang iya isigkatawo. 25Magkaon kamo sang bisan ano nga ginabaligya sa balaligyaan sang unud, nga wala nagausisa bangud sang kaisipan. 26Kay “ang duta iya sang Ginoo, kag ang tanan sa sini.”#Sal. 24:1. 27Kon ang isa sang mga dimatinoohon nagaagda sa inyo sa pagkaon kag luyag kamo magkadto, kaona ninyo ang bisan ano nga ginabutang sa inyo atubangan nga wala nagausisa bangud sang kaisipan. 28(Apang kon ang iban nagasiling sa inyo, “Ini nahalad,” tungud sa iya nga nagpahayag sini, kag tungud sa kaisipan— 29ang buut ko silingon amo ang iya kaisipan. indi ang inyo— dili kamo magkaon sini.) Kay ngaa bala paghukman ang akon kahilwayan sang kaisipan sang iban nga tawo? 30Kon ako nagaambit nga may pagpasalamat, ngaa bala nga ginapakamalaut ako bangud sang akon ginapasalamatan?

31Gani, bisan nagakaon kamo ukon nagainum, ukon bisan ano ang inyo ginahimo, himoa ang tanan sa kahimayaan sang Dios. 32Dili kamo maghatag sing kahigayonan sa kasandad sa mga Judio ukon sa mga Griego ukon sa iglesia sang Dios, 33subong nga ako nagapahamuut sa tanan nga tawo sa tanan nga butang nga ginahimo ko, nga wala nagapangita sang akon kaugalingon nga kapuslanan, kondi sang madamu, agud nga maluwas sila.

Currently Selected:

1 CORINTO 10: ABHIL82

Highlight

Copy

Compare