1 MGA CRONICA 5
5
Ang mga Kaliwatan ni Ruben
1Ang mga lalaking anak ni Ruben nga panganay ni Israel (kay sia amo ang panganay; apang sanglit kay ginpasipalahan niya ang higdaan sang iya amay,#Gen. 35:22; 49:3-4. ang iya katarungan sa pagkapanganay ginhatag sa mga anak nga lalaki ni Jose nga anak ni Israel, sa bagay nga wala ginaisip ang listahan sang kaliwatan sono sa kinamatarung sang pagkapanganay; 2bisan si Juda naggamhanan sa iya mga utud kag nagikan sa iya ang principe,#Gen. 49:8-10. apang ang kinamatarung sang pagkapanganay iya ni Jose), 3ang mga anak nga lalaki ni Ruben nga panganay ni Israel: si Hanoc, si Fallu, si Hezron, kag si Carmi. 4Ang mga anak nga lalaki ni Joel: si Semaya nga iya anak, si Gog nga iya anak, si Simei nga iya anak, 5si Mica nga iya anak, si Reaya nga iya anak, si Baal nga iya anak, 6si Beera nga iya anak, nga gindala nga bihag ni Tiglat-pilneser nga hari sang Asiria;#2 Hari 15:29. sia principe sang mga Rubenhon. 7Kag ang iya mga utud sa ila mga panimalay, sang gin-isip ang listahan sang ila mga kaliwatan: ang puno, si Jeiel, kag si Zacarias, 8kag si Bela nga lalaki nga anak ni Azaz, ang anak nga lalaki ni Sema, ang lalaki nga anak ni Joel, nga nagpuyo sa Aroer, bisan tubtub sa Nebo kag Baal-meon. 9Nayon sa sidlangan nagpuyo sia tubtub gid sa salamputan sang kamingawan kutub sa suba nga Eufrates, bangud nga ang ila kahayupan nagbuad sa duta sang Galaad. 10Kag sa mga adlaw ni Saul nagpakig-away sila sa mga Agarnon, nga napukan tungud sa ila kamut; kag nagpuyo sila sa ila mga layanglayang nga hil-ob sa bug-os nga duta sa sidlangan sang Galaad.
Ang mga Kaliwatan ni Gad
11Ang mga anak nga lalaki ni Gad nagpuyo sa atubang nila sa duta sang Basan tubtub sa Salca: 12ang puno nga si Joel, si Safam nga ikaduha, si Janai, kag si Safat sa Basan. 13Kag ang ila mga utud gikan sa ila mga kabaranggayan: si Micael, si Mesulam, si Zeba, si Jorai, si Jacan, si Zia, kag si Eber, pito. 14Ini sila mga anak nga lalaki ni Abihail, ang anak nga lalaki ni Huri, ang anak nga lalaki ni Jaroa, ang anak nga lalaki ni Galaad, ang anak nga lalaki ni Micael, ang anak nga lalaki ni Jesisai, ang anak nga lalaki ni Jahdo, ang anak nga lalaki ni Buz; 15si Ahi nga anak nga lalaki ni Abdiel, ang anak nga lalaki ni Guni, puno sang ila mga kabaranggayan; 16kag nagpuyo sila sa Galaad, sa Basan kag sa iya mga banwa, kag sa tanan nga minoro sang Saron tubtub sa ila mga dulunan. 17Ini sila tanan naisipan sa listahan sang mga kaliwatan sa mga adlaw ni Jotam nga hari sang Juda, kag sa mga adlaw ni Jeroboam nga hari sang Israel.
Ang Maragtas sang Duha kag Katunga nga Kabikahan
18Ang mga anak nga lalaki ni Ruben, ang mga Gadhanon, kag ang katunga nga kabikahan ni Manases, nga mga lalaki nga isganan, nga mga lalaki nga makasarang magdala sang taming kag espada, nga makapana, kag sampaton sa pag-away, kap-atan kag apat ka libo kag pito ka gatus kag kan-uman, nga makasarang sa pagkadto sa inaway. 19Nagpakig-away sila sa mga Agarnon, kay Jetur, kay Nafis, kag kay Nodab; 20kag ginbuligan sila batok sa ila, kag ang mga Agarnon natugyan sa ila kamut, kag ang tanan nga nag-upud sa ila, kay nagtuaw sila sa Dios sa pag-awayan, kag nalooy sia sa ila, bangud nga nagsalig sila sa iya. 21Gindakup nila ang ila kahayupan: sa ila mga camelyo kalim-an ka libo, sa mga carnero duha ka gatus kag kalim-an ka libo, sa mga asno duha ka libo, kag sa mga tawo isa ka gatus ka libo. 22Kay madamu ang napukan nga napatay, bangud nga ang pag-away iya sang Dios. Kag nagpuyo sila nga tal-us sa ila tubtub sa pagbihag.
23Ang mga anak sang katunga nga kabikahan ni Manases nagpuyo sa duta; nagdugang sila kutub sa Basan tubtub sa Baal-hermon, Senir, kag sa Bukid nga Hermon. 24Ini sila amo ang mga pangolo sang ila mga kabaranggayan: si Efer, si Isi, si Eliel, si Azriel, si Jeremias, si Hodabias, kag si Jadiel, mga lalaki nga gamhanan nga isganan, mga lalaki nga bantug, mga pangolo sang ila mga kabaranggayan. 25Apang naglapas sila batok sa Dios sang ila mga ginikanan, kag nagmakihilawason sa pagsonod sa mga dios sang mga katawohan sang duta, nga ginlaglag sang Dios sa atubangan nila. 26Gani ang Dios sang Israel nagpainit sang espiritu ni Pul#2 Hari 15:19. nga hari sang Asiria kag sang espiritu ni Tiglat-pilneser#2 Hari 15:29. nga hari sang Asiria, kag ginbihag niya sila, bisan ang mga Rubenhon, ang mga Gadhanon, kag ang katunga nga kabikahan ni Manases, kag gindala sila sa Hala, sa Habor, sa Hara, kag sa suba sang Gosan, tubtub sini nga adlaw.#2 Hari 17:6.
Currently Selected:
1 MGA CRONICA 5: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
