1 MGA CRONICA 27
27
Ang mga Manugdumala ni David
1Karon ang katawohan sang Israel sono sa ila kadamuon, ang mga pangolo sang mga kabaranggayan, ang mga pangolo sang linibo kag sang ginatus, kag ang ila mga manugdumala nga nag-alagad sa hari sa bisan ano nga mga butang sang mga kinabon nga nagsulud kag naggowa, bulanbulan sa bug-os sang tanan nga bulan sang tuig, sa tagsa ka kinabon may duha ka pulo kag apat ka libo.
2Sa ibabaw sang nahauna nga kinabon sa nahauna nga bulan amo si Jasobeam nga anak nga lalaki ni Zabdiel; sa iya kinabon may duha ka pulo kag apat ka libo. 3Sia gikan sa mga anak ni Perez, kag puno sang tanan nga pangolo sang kasoldadosan sa nahauna nga bulan. 4Sa ibabaw sang kinabon sang ikaduha nga bulan amo si Dodai nga Ahohanon kag ang iya kinabon si Miclot nga manugdumala; sa iya kinabon may duha ka pulo kag apat ka libo. 5Ang ikatlo nga pangolo sang kasoldadosan, sa ikatlo nga bulan, amo si Benaya ang puno, ang lalaking anak ni Joiada nga sacerdote; sa iya kinabon may duha ka pulo kag apat ka libo. 6Amo ini yadto nga Benaya nga gamhanan nga lalaki sang katloan kag pangolo sang katloan; gikan sa iya kinabon si Amisabad nga iya anak nga lalaki. 7Ang ikap-at nga pangolo sa ikap-at nga bulan amo si Asael nga utud nga lalaki ni Joab, kag si Zebadias nga iya anak nga lalaki madason sa iya; sa iya kinabon may duha ka pulo kag apat ka libo. 8Ang ikalima nga pangolo nga sa ikalima nga bulan amo si Samhut nga Izharnon; sa iya kinabon may duha ka pulo kag apat ka libo. 9Ang ikan-um nga pangolo nga sa ikan-um nga bulan amo si Ira, nga anak ni Iques nga Tekoanhon; sa iya kinabon duha ka pulo kag apat ka libo. 10Ang ikapito nga pangolo nga sa ikapito nga bulan amo si Helez nga Pelonhon, gikan sa mga lalaking anak ni Efraim; sa iya kinabon duha ka pulo kag apat ka libo. 11Ang ikawalo nga pangolo nga sa ikawalo nga bulan amo si Sibecai nga Husatnon, gikan sa mga Zarhanon; sa iya kinabon may duha ka pulo kag apat ka libo. 12Ang ikasiam nga pangolo nga sa ikasiam nga bulan amo ni Abiezer nga Anatotnon, gikan sa mga Benjaminhon; sa iya kinabon may duha ka pulo kag apat ka libo. 13Ang ikapulo nga pangolo nga sa ikapulo nga bulan amo si Maharai nga Netofanhon, gikan sa mga Zarhanon; sa iya kinabon may duha ka pulo kag apat ka libo. 14Ang ikapulog isa nga pangolo nga sa ikapulog isa nga bulan amo si Benaya nga Piratonhon, gikan sa mga lalaking anak ni Efraim; sa iya kinabon may duha ka pulo kag apat ka libo. 15Ang ikapulog duha nga pangolo nga sa ikapulog duha nga bulan amo si Heldai nga Netofanhon, gikan kay Otniel; sa iya kinabon may duha ka pulo kag apat ka libo.
16Labut pa sa ibabaw sang mga kabikahan sang Israel, gikan sa mga Rubenhon amo si Eliezer nga lalaking anak ni Sicri nga manugdumala; gikan sa mga Simeonhon, si Sepatias nga lalaking anak ni Maaca; 17gikan sa Levi, si Hasabias nga lalaking anak ni Kemuel; gikan kay Aaron, si Sadoc; 18gikan sa Juda, si Eliu, isa sang mga lalaking utud ni David; gikan sa Isacar, si Omri nga lalaking anak ni Micael; 19gikan sa Zabulon, si Ismaias nga lalaking anak ni Obadias; gikan sa Neftali, si Jerimot nga lalaking anak ni Azriel; 20gikan sa mga Efraimnon, si Oseas nga lalaking anak ni Azarias: gikan sa katunga nga kabikahan ni Manases, si Joel nga lalaking anak ni Pedaya; 21gikan sa katunga nga kabikahan ni Manases sa Galaad, si Iddo nga lalaking anak ni Zacarias; gikan sa Benjamin, si Jaasiel nga lalaking anak ni Abner; 22gikan sa Dan, si Azarel nga lalaking anak ni Jeroham. Ini sila mga pangolo sang mga kabikahan sang Israel. 23Si David wala magkuha sang kadamuon nila kutub sa duha ka pulo ka tuig kag pa idalum, bangud nga ang Ginoo nagsiling nga pabuaron niya ang Israel kaangay sa kabitoonan sang langit.#Gen. 15:5; 22:17; 26:4. 24Si Joab nga lalaking anak ni Sarvia nagsugud sa pag-isip, apang wala makatapus; kag tungud sini nag-abut ang kasingkal sa Israel,#2 Sam. 24:1-15; 1 Cron. 21:1-14. kag ang kadamuon wala mabutang sa listahan sa mga maragtas ni Hari David.
25Ang nagatatap sang mga bahandi sang hari amo si Asmavet nga lalaking anak ni Adiel; kag ang nagatatap sang mga bahandi sa mga latagon, sa mga banwa, kag sa mga minoro, kag sa mga castilyo, amo si Jonatan nga lalaking anak ni Uzias; 26kag ang nagatatap sa ila nga mga nagpangabudlay sa uma sa pag-uma sang duta amo si Ezri nga lalaking anak ni Kelub; 27kag ang nagatatap sang mga ulubasan amo si Simei nga Ramanhon; kag ang nagatatap sang patubas sang mga ulubasan sa mga damisag sang alak amo si Zabdi nga Sifhanon. 28Ang nagatatap sang mga kahoy nga olivo kag sang mga kahoy nga sicomoro nga yara sa kapatagan amo si Baal-hanan nga Gederhanon; kag sang mga damisag sang lana amo si Joas. 29Ang nagatatap sang kabakahan nga nagahalab sa Saron amo si Sitrai nga Saronhon; ang nagatatap sang kabakahan nga yara sa mga nalupyakan amo si Safat nga lalaking anak ni Adlai. 30Ang nagatatap sang mga camelyo amo si Obil nga Ismaelnon; kag ang nagatatap sang mga asno amo si Jedeias nga Meronohanon. Ang nagatatap sang mga panong amo si Jaziz nga Hagarnon. 31Ini tanan amo ang manugdumala sang mga pagkabutang ni Hari David.
32Si Jonatan man, nga tiyo ni David, amo ang manuglaygay, tawo nga mahangpanon kag escriba; kag si Jehiel nga lalaking anak ni Hacmoni upud sa mga lalaking anak sang hari. 33Si Ahitofel amo ang manuglaygay sang hari, kag si Husai nga Arquinhon abyan sang hari. 34Madason kay Ahitofel amo si Joiada nga lalaking anak ni Benaya, kag si Abiatar. Ang pangolo sang kasoldadosan sang hari amo si Joab.
Currently Selected:
1 MGA CRONICA 27: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
