1 MGA CRONICA 22
22
1Niyan si David nagsiling, “Amo ini ang balay sang Ginoo nga Dios kag amo ini ang halaran sang halad-nga-sinonog nga sa Israel.”
Ang Pag-aman ni David tungud sa Templo
2Nagsogo si David nga tiponon sing tingub ang mga manlulugayaw nga yara sa duta sang Israel, kag nagbutang sia sing mga cantero sa pagkuha sing balasbasan nga mga bato sa pagpatindug sang balay sang Dios. 3Naghanda man si David sing bugana nga salsalon nga sa mga lansang sa mga takup sang mga gawang kag sa mga bisagra, kag bugana nga saway nga dimatimbang, 4kag mga kahoy nga cedro nga dimaisip; kay ang mga Sidonhon kag ang mga taga-Tiro nagdala kay David sing kahoy nga cedro sing bugana. 5Kay si David nagsiling, “Si Salomon nga akon anak nga lalaki bataon kag linghud pa, kag ang balay nga ipatindug sa Ginoo dapat nga maglakas ka daku, sa himaya sa tanan gid nga kadutaan; busa ako magaaman sa sini.” Gani si David nag-aman sing bugana gid sa wala pa sia mapatay.
6Niyan gintawag niya sa Salomon nga iya anak, kag gintulinan sia sa pagpatindug sing balay sa Ginoo, ang Dios sang Israel. 7Si David nagsiling kay Salomon nga iya anak, “Nahanungud sa akon, yari sa akon tagiposoon ang pagpatindug sing balay sa ngalan sang Ginoo nga akon Dios. 8Apang nag-abut sa akon ang polong sang Ginoo, nga nagasiling, ‘Nakapaagay ka sing bugana nga dugo kag nakahimo sing dalagku nga mga inaway; dili ka magpatindug sing balay sa akon ngalan, bangud nga nakapaagay ka sing madamu nga dugo sa duta sa itololok nakon. 9Yari karon, matawo sa imo ang isa ka anak nga lalaki; nga mangintawo sia sang kapahuwayan. Hatagan ko sia sing kapahuwayan sa tanan niya nga kaaway palibut; kay ang iya ngalan manginsi Salomon, kag ako magahatag sing paghidait kag kalinong sa Israel sa iya kaadlawan. 10Sia magapatindug sing balay nga sa akon ngalan. Sia mangin-akon anak, kag ako mangin-iya amay, kag palig-onon ko ang trono sang iya ginharian sa ibabaw sang Israel sa gihapon.’#2 Sam. 7:1-16; 1 Cron. 17:1-14. 11Karon, anak ko, mag-upud sa imo ang Ginoo, kag mag-uswag ka kag patinduga ang balay sang Ginoo nga imo Dios, subong sang napamolong niya nahanungud sa imo. 12Lamang, ang Ginoo maghatag sa imo sing ihibalo kag paghangup, kag magtulin sa imo nahanungud sa Israel agud nga mabantayan mo ang kasogoan sang Ginoo nga imo Dios. 13Niyan magauswag ka kon magbantay ka sa paghimo sang mga palatukuran kag sang mga pagsolondan nga gintulin sang Ginoo kay Moises nahanungud sa Israel. Magpakabakud ka, kag magpakaisug. Dili magkahadluk; ukon magkahangawa.#Jos. 1:6-9. 14Sa akon kubus nga kahimtangan nakaaman ako nga sa balay sang Ginoo sing isa ka gatus ka libo ka talanton nga bulawan, kag isa ka milyon ka talanton nga pilak, kag dimatimbang nga saway kag salsalon, kay bugana ini; nakaaman ako sing mga tablon kag mga bato. Madugangan mo sila. 15Labut pa may yara upud sa imo nga bugana nga mga manugpangabudlay: mga manugbasbas sang bato, mga cantero, mga panday, kag tanan nga bagay sang mga tawo nga sampaton nga dimaisip, nga sampaton sa buluhaton 16nahanungud sa bulawan, sa pilak, sa saway, kag sa salsalon, dimaisip. Tindug ka kag magbuhat! Ang Ginoo mag-upud sa imo!”
17Nagsogo si David man sa tanan nga principe sang Israel sa pagbulig kay Salomon nga iya anak, nga nagasiling, 18“Wala bala nagaupud sa inyo ang Ginoo nga inyo Dios? Kag wala bala sia maghatag sa inyo sing kapahuwayan sa tagsa ka luyo? Kay sia nagtugyan sa akon kamut sang mga pumuluyo sang duta; kag ang duta nasakup sa atubangan sang Ginoo kag sang iya katawohan. 19Karon ituhoy ang inyo tagiposoon kag ang inyo kalag sa pagpangita sa Ginoo nga inyo Dios. Tindug kag patinduga ninyo ang santuario sang Ginoong Dios, sa pagpasulud sang kaban sang katipan sang Ginoo kag sang mga gamit nga balaan sang Dios sa balay nga palatindugon sa ngalan sang Ginoo.”
Currently Selected:
1 MGA CRONICA 22: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
