1 MGA CRONICA 10
10
Ang Pagkapatay ni Saul kag sang Iya mga Lalaking Anak
(1 Sam. 31:1-13)
1Karon ang mga Filistinhon nagpakig-away sa Israel; kag ang mga lalaki sang Israel nagpalagyo gikan sa atubangan sang mga Filistinhon, kag napukan nga patay sa Bukid nga Gilboa. 2Kag ang mga Filistinhon naglagas sing suud kay Saul kag sa iya mga anak nga lalaki; kag ang mga Filistinhon nagpatay kay Jonatan kag kay Abinadab kag kay Malqui-sua, ang mga anak ni Saul. 3Matama ang inaway batok kay Saul, kag nalambut sia sang mga manugpana; kag nalisang sia bangud sang mga manugpana. 4Niyan si Saul nagsiling sa iya manugdala sang hinganib, “Gabuta ang imo espada, kag palapsi ako sa iya, basi nga ini nga mga dicircuncidado mag-abut kag pintasan ako.” Apang ang iya manugdala sang hinganib indi buut; kay nahadluk sia sing tama. Busa gingabut ni Saul ang iya espada, kag gindamhagan ini. 5Kag sang nakita sang iya manugdala sang hinganib nga si Saul patay na, sia man nagdamhag sa iya espada, kag napatay. 6Sa amo napatay si Saul; sia kag ang iya tatlo ka anak kag ang bug-os niya nga panimalay nagkalamatay sing tingub. 7Kag sang nakita sang tanan nga lalaki sang Israel sa nalupyakan nga nagpalagyo sila kag nga si Saul kag ang iya mga anak patay na, ginbayaan nila ang ila kabanwaanan kag nagpalagyo; kag nag-abut ang mga Filistinhon kag nagpuyo sa ila.
8Sa madason nga adlaw, sang nag-abut ang mga Filistinhon sa paghublas sang mga pinatay, nakita nila si Saul kag ang iya mga anak nga napukan sa Bukid nga Gilboa. 9Kag ginhublasan nila sia kag ginkuha ang iya olo kag ang iya hinganib, kag ginpadala sang mga manugbalita sa duta sang mga Filistinhon palibut, sa pagdala sang mga balita sa ila mga diosdios kag sa katawohan. 10Kag ginbutang nila ang iya hinganib sa balay sang ila mga dios, kag ginlansang ang iya olo sa balay ni Dagon. 11Apang sang nabatian sang bug-os nga Jabes-galaad ang tanan nga nahimo sang mga Filistinhon kay Saul, 12nagtindug ang tanan nga tawo nga isganan, kag ginkuha ang bangkay ni Saul kag ang mga bangkay sang iya mga anak, kag gindala sila sa Jabes. Kag ginlubong ang ila mga tul-an sa idalum sang terebinto sa Jabes, kag nagpuasa sing pito ka adlaw.
13Gani napatay si Saul tungud sang iya paglapas nga iya ginhimo batok sa Ginoo, bangud sang polong sang Ginoo#1 Sam. 13:8-14; 15:1-24. nga wala niya pagtumana kag tungud nga nagpamangkot man sia sa manugpagowa sang espiritu, sa pagpamangkot sa iya,#Lev. 19:31; 20:6; 1 Sam. 28:7-8. 14kag wala magpamangkot sa Ginoo. Busa ginpatay sia sang Ginoo, kag ginsaylo ang ginharian kay David nga anak ni Jesse.
Currently Selected:
1 MGA CRONICA 10: ABHIL82
Highlight
Copy
Compare
Share
Want to have your highlights saved across all your devices? Sign up or sign in
Ang Biblia ©1982 Philippine Bible Society
