Zacarias 6
6
Ang Palanan-awon Nahanungod sang Apat ka mga Karwahi
1Dayon may isa naman ako ka palanan-awon nga nakita. Sa sini nga tion may nakita ako nga apat ka mga karwahi nga nagagwa gikan sa gintung-an sang duha ka mga bukid nga bronsi. 2Ang#Bug. 6:4; Bug. 6:5. nahauna nga karwahi ginaguyod sang pula nga mga kabayo, ang ikaduha ginaguyod sang itom nga mga kabayo, 3ang#Bug. 6:2. ikatlo ginaguyod sang puti nga mga kabayo, kag ang ikap-at ginaguyod sang kambang nga mga kabayo. 4Dayon ginpamangkot ko ang anghel, “Ano bala ang buot silingon sini nga mga karwahi?”
5Nagsabat#Bug. 7:1. sia, “Amo ini ang apat ka mga hangin. Bag-o lang sila mag-abot halin sa atubang sang Ginoo sang bug-os nga duta.”
6Ang karwahi nga ginaguyod sang itom nga mga kabayo nagapadulong sa aminhan pakadto sa Babilonia, ang puti nga mga kabayo nagapadulong sa katundan, kag ang kambang nga mga kabayo nagapadulong sa pungsod sa bagatnan. 7Sang nagapagwa ang kambang nga mga kabayo, daw indi na gid sila mapunggan sa paglakat kag sa pag-usisa sang duta. Ang anghel nagsiling, “Lakat kag usisaa ang duta.” Gani gin-usisa nila ini. 8Dayon ang anghel nagsinggit sa akon, “Ang mga kabayo nga nagpadulong sa aminhan pakadto sa Babilonia nagpaugdaw sang kaakig sang Ginoo.”
Ang Sugo sa Pagkorona kay Josue
9Ang Ginoo naghatag sa akon sini nga mensahe. 10Nagsiling sia, “Kuhaa ang mga dulot nga ginhatag sang mga bihag nga amo sanday Heldai, Tobijas, kag Jedaya kag kadto ka gilayon sa balay ni Josias nga anak ni Sofonias. Ini sila tanan nagbalik halin sa pagkabihag sa Babilonia. 11Himua nga korona ang pilak kag bulawan nga ginhatag nila kag ibutang ini sa ulo sang Pinakamataas nga Pari nga si Josue nga anak ni Josadac. 12Singgana#Jer. 23:5; 33:15; Zac. 3:8. sia nga ang Ginoo sang mga hangaway nagasiling, ‘Amo ini ang tawo nga ginatawag Ang Sanga. Magalambo sia sa iya lugar kag patindugon niya liwat ang Templo sang Ginoo. 13Sia amo ang magapatindog sini, kag pasidunggan sia subong hari, kag magagahom sia sa iya mga tawo. May pari nga magaubay sa iya kag magabuligay sila nga may paghidait kag kalinong.’ 14Ang korona mangintanda sa Templo sang Ginoo sa pagpasidungog kanday Heldai,#6:14 Ang isa ka dumaan nga pagbadbadHeldai; sa HebreoHelem. Tobijas, Jedaya, kag Josias.”#6:14 Ang isa ka dumaan nga pagbadbadJosias; sa HebreoHen.
15Ang mga tawo nga nagaestar sa malayo nga mga lugar magaabot sa pagbulig sa pagpatindog liwat sang Templo sang Ginoo. Kag kon mapatindog na ini liwat, mahibaluan ninyo nga ginpadala ako sa inyo sang Ginoo sang mga hangaway. Matuman ini tanan kon tumanon ninyo sing bug-os ang mga sugo sang Ginoo nga inyo Dios.
Currently Selected:
Zacarias 6: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
