Zacarias 2
2
Ang Palanan-awon Nahanungod sang Lubid nga Inugtakos
1Sa isa naman ka palanan-awon nakita ko ang isa ka tawo nga may lubid nga inugtakos sa iya kamot. 2Nagpamangkot ako, “Diin ka makadto?”
Nagsabat sia, “Takson ko ang Jerusalem agod mahibal-an ko kon daw ano ini kalaba kag kasangkad.”
3Dayon nakita ko nga ang anghel nga nagpakighambal sa akon naglakat, kag ang isa pa gid ka anghel nagsugata sa iya. 4Ang nahauna nagsiling sa ikaduha, “Dalagan ka kag singgana inang pamatan-on nga lalaki nga may lubid nga inugtakos nga magadamo ang mga tawo kag mga kabakahan sa Jerusalem nga indi na sila makaigo sa sulod sang pader. 5Ang Ginoo nagsaad nga sia mismo ang manginpader nga kalayo sa palibot sang siudad sa pag-apin sini, kag magaestar sia didto sa bug-os niya nga himaya.”
Ang mga Bihag Ginpapauli
6-7Ang Ginoo nagsiling sa iya mga tawo, “Ginpaalaplaag ko kamo sa bug-os nga kalibutan. Pero karon, kamo nga mga bihag, magpalagyo halin sa Babilonia kag magbalik sa Jerusalem. 8Ang bisan sin-o nga nagasakit sa inyo nagasakit sang akon pinalangga.”
Gani ang Ginoo sang mga hangaway nagpadala sini nga mensahe sa mga kapungsoran nga nag-agaw sang mga pakabutang sang iya mga tawo: 9“Ang Ginoo mismo magapakig-away batok sa inyo, kag ang mga tawo nga inyo sang una mga suloguon magaagaw sang inyo mga pagkabutang.”
Kon matabo ini, ang tagsatagsa magakilala nga ang Ginoo sang mga hangaway nagpadala sa akon.
10Ang Ginoo nagsiling, “Magkanta sa kalipay, mga tawo sang Jerusalem! Magaabot ako kag magaestar upod sa inyo!”
11Sa sadto nga tion madamo nga mga kapungsoran ang magadangop sa Ginoo kag mangin-iya mga tawo. Magaestar sia upod sa inyo, kag makilala ninyo nga ginpadala niya ako sa inyo. 12Sa liwat ang Juda manginpinasahi nga pagkabutang sang Ginoo sa balaan nga duta, kag ang Jerusalem manginsiudad nga iya ginahigugma labaw sa tanan.
13Ang tagsatagsa maghipos sa atubang sang Ginoo, magaabot sia gikan sa iya balaan nga balay.
Currently Selected:
Zacarias 2: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
