Zacarias 1
1
Ginatawag sang Ginoo ang Iya mga Tawo sa Pagbalik sa Iya
1Sa#Esd. 4:24–5:1; 6:14. ikawalo nga bulan sang ikaduha nga tuig nga si Dario amo ang hari sang Persia, ang Ginoo naghatag sini nga mensahe kay Zacarias nga propeta. Si Zacarias amo ang anak ni Berequias kag apo ni Iddo. 2Ang Ginoo sang mga hangaway nagsiling kay Zacarias nga singganon ang mga tawo, “Ako, ang Ginoo, naakig gid sa inyo mga katigulangan. 3Pero karon nagasiling ako sa inyo, ‘Balik kamo sa akon, kag ako magabalik sa inyo. 4Indi kamo magpareho sang inyo mga katigulangan. Ang mga propeta sang una naghatag sa ila sang akon mensahe nga nagasiling sa ila nga indi na magkabuhi sing malaut ukon makasasala nga kabuhi. Pero indi sila magpamati ukon magtuman sa akon. 5Ang inyo mga katigulangan kag yadto nga mga propeta patay na. 6Paagi sa akon mga alagad nga propeta ginhatagan ko ang inyo mga katigulangan sing mga sugo kag mga paandam. Pero ginpatumbayaan nila ini kag nag-antos sila. Dayon naghinulsol sila kag nagkilala nga ako, ang Ginoo sang mga hangaway, nagsilot sa ila suno sa ila pagginawi, kag suno sa akon ginpat-od nga himuon.’”
Ang Palanan-awon sang Propeta Nahanungod sang mga Kabayo
7Sa ikaduha nga tuig nga si Dario amo ang hari, sa ika-24 nga adlaw sang ika-11 nga bulan nga amo ang bulan sang Sebat, isa sadto ka gab-i, ang Ginoo naghatag sa akon sing isa ka mensahe paagi sa isa ka palanan-awon. 8Nakita#Bug. 6:4; Bug. 6:2. ko ang isa nga nagasakay sa pula nga kabayo. Nagdulog sia sa mga kahoy nga mirto sa kapatagan, kag sa likod niya may iban pa nga mga kabayo nga pula, puti kag kambang. 9Ginpamangkot ko sia, “Sir, ano ang kahulogan sini nga mga kabayo?”
Nagsabat sia, “Ipakita ko sa imo ang ila kahulogan sini. 10Ang Ginoo nagpadala sini nga mga manugkabayo sa pag-usisa sang duta.”
11Nagpanugid sila sa anghel sang Ginoo: “Naglibot kami sa bug-os nga kalibutan, kag nakita namon nga ang kalibutan malinong kag may paghidait.”
12Dayon ang anghel nagsiling, “Ginoo sang mga hangaway, nagkaakig ikaw sa Jerusalem kag sa mga siudad sang Juda sa sulod sang setenta ka tuig na karon. San-o mo pa bala sila kaluoyan?”
13Ang Ginoo nagsabat sa anghel sang mga pulong nga makapahalipay, 14kag ang anghel nagsiling sa akon nga ipahibalo ko ining ginsiling sang Ginoo sang mga hangaway: “May daku ako nga gugma kag kabalaka sa Jerusalem, ang akon balaan nga siudad, 15kag naakig gid ako sa mga pungsod nga may kalinong kag paghidait. Sang ginpunggan ko ang akon kaakig batok sa akon nga mga tawo, ini nga mga kapungsoran nagdugang sang pag-antos sang akon mga tawo. 16Gani, nagbalik ako sa Jerusalem sa pagkaluoy sa siudad. Ang akon Templo kag ang siudad pagapatindugon liwat.”
17Ang anghel nagsiling man sa akon sa pagpahibalo sini: “Ang Ginoo sang mga hangaway nagasiling nga ang iya mga siudad magamainuswagon liwat, kag sa liwat iya lipayon ang mga tawo sang Jerusalem, kag angkunon ang siudad nga iya kaugalingon.”
Ang Palanan-awon Nahanungod sang mga Sungay
18Sa isa pa ka palanan-awon nakita ko ang apat ka mga sungay sang baka. 19Ginpamangkot ko ang anghel nga nagpakighambal sa akon kon ano ang kahulogan sini nga mga sungay.
Nagsabat sia, “Amo ini ang gamhanan nga mga pungsod sang kalibutan nga nagpaalaplaag sang mga tawo sang Juda, Israel, kag Jerusalem.”
20Dayon ang Ginoo nagpakita sa akon sang apat ka mga panday sa salsalon. 21Nagpamangkot ako, “Ano ang tuyo sini nga mga tawo sa ila pag-abot?”
Nagsabat sia, “Nag-abot sila sa pagpahog kag sa pagdaog sang mga pungsod nga naglutos kag nagpaalaplaag sang mga tawo sang Juda.”
Currently Selected:
Zacarias 1: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012
