Ang Kaalam ni Solomon 2
2
Malaut nga Panghunahuna
1Nagsayop ang malaut nga mga tawo kon magsiling sila sa ila kaugalingon, “Malip-ot ang aton kabuhi nga napun-an ini sang kasubo kag kon mag-abot ang katapusan wala kita sing palagyuhan. Wala pa kita sing nahibaluan sang isa nga nagbalik gikan sa mga minatay. 2Natsambahan lamang nga natawo kita kag sa tapos kita mapatay manginsubong kita nga daw wala kita natawo. Ang aton pagginhawa kasubong sang aso, ang aton panumdoman daw kasubong sang isa ka igpat nga nagikan sa pagpitik sang aton tagipusoon. 3Sa pagkadula sina nga igpat, ang aton lawas mahimo nga abo, kag ang aton pagginhawa manginbahin sang hangin. 4Magaabot ang tion nga wala bisan isa nga makadumdom sang aton nabuhat kag bisan pa gani ang aton mga ngalan pagakalipatan. Ang aton kabuhi magaligad kasubong sang panganod kag madula kasubong sang ambon sa kainit sang adlaw. 5Ang aton tion sa kalibutan manginkasubong sang nagaagi nga landong. Indi kita makalikaw sa adlaw sang aton kamatayon; natalana na ini nga daan kag wala sing may makapaisol sini.”
6Ang#Isa. 22:13; 1 Cor. 15:32. malaut nga tawo nagasiling, “Dali kamo, magkalipay kita sa maayo nga mga butang sang kabuhi kag magkabuhi sa sining kalibutan kasubong sang bataon pa kita nga wala sing palaligban! 7Mag-inom kita sang pinakamahal nga bino kag maggamit sang pinakaali nga mga pahumot. Talupangdon naton ang tanan nga mga kabulakan! 8Kuhaon naton ang mga rosas kag ibutang sa aton mga buhok sa wala pa ini malaya! 9Mag-ulopod kita sa pagsabwag sa tanan nga lugar sang aton hilway nga mga pagkinasadya. Ang kabuhi nakautang sa aton sing sobra pa dira!
10“Aton piguson ang mga imol bisan pa nga mga matarong sila. Indi kita magtahod sa mga balo kag sa mga tigulang. 11Kon mabakod kita sa pag-angkon sang aton naluyagan, ti tawgon ta ang aton kaugalingon nga mga matarong. Ang mga maluya wala sing may mabuhat! 12Ang matarong nga tawo mga disturbo sa aton, gani magpangita kita sing paagi sa pagdula sa ila. Nagapamatok sila sa aton mga ginabuhat, ginasumbong nila kita sa paglapas sa mga Kasugoan ni Moises kag sa mga pagsulondan nga ginkamat-an sang aton mga katigulangan. 13Nagasiling sila nga kilala nila ang Dios kag ginatawag nila ang ila kaugalingon nga mga anak sang Ginoo. 14Indi naton mabatas ang pagtulok sa sini nga sari sang mga tawo, ang ila pagkatawo nagapamatok sa kabug-osan sang aton panghunahuna. 15Indi sila kasubong sang iban nga mga tawo kay makatilingala ang ila mga pagginawi. 16Nagahunahuna sila nga ang aton talaksan sang maayo kag malain puro kagarukan kag gani ang tanan naton nga ginabuhat pagalikawan. Nagapabugal sila nga ang Dios amo ang ila Amay kag nagatuo sila nga sa tapos mahambal kag mabuhat ang tanan, ang mga matarong lamang ang manginmalipayon. 17Pero tan-awon naton kon matuod ini! Tan-awon naton kon ano ang mahanabo sa tion nga sila mapatay! 18Kon ang mga matarong matuod nga mga anak sang Dios, ang Dios magaluwas sa ila batok sa ila mga kaaway. 19Gani, tilawan naton sila. Aton sila pintasan kag sakiton, dayon aton mahibaluan kon indi sila magpangakig kag manginmatarong sila! Mahibaluan naton kon tubtob sa diin sila makaantos! 20Pamatbatan naton sila sang isa ka makahuloya nga kamatayon. Kon sa bagay, nagasiling sila nga ang Dios magaapin sa ila.”
21Ang malaut nga mga tawo magahunahuna sing subong sina, pero dira sila magsala. Nabulag sila sang ila kaugalingon nga kalautan. 22Wala nila mahibaloi ang mga tinago sang Dios, wala nagalaom sang padya sa isa ka balaan nga pangabuhi nga wala sing kasawayan. 23Sang#Gen. 1:26-27. pagtuga sang Dios sa aton, wala niya gintuyo nga mapatay kita kay gintuga niya kita kasubong sa iya. 24Ang kaimon sang Yawa amo ang nagdala sang kamatayon sa kalibutan, kag ang mga iya sang Yawa amo ang magakalamatay.
Currently Selected:
Ang Kaalam ni Solomon 2: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012