Ang Kaalam ni Solomon 1
1
Ang Pagpangita sang Katarungan
1Mga#Klm. Sol. 6:1-11. manuggahom sang kalibutan, higugmaa ninyo ang katarungan. Ibuhos sing tuodtuod ang inyo mga panghunahuna sa Ginoo kag pangitaa ninyo sia nga may katampad. 2Ang mga tawo nga wala magsulay sa Dios makakita sa iya, igapakita niya ang iya kaugalingon sa mga nagasalig sa iya. 3Ang malauton nga mga panghunahuna nagapahilayo sang mga tawo sa Dios, kag kon magbinuang kita sa pagsulay sa iya, ang iya gahom magapakahuya sa aton. 4Ang kaalam indi makit-an sa mga butigon kag sa mga ulipon sang sala. 5Ang tagsatagsa nga balaan makahibalo sa pagpahilayo sa butigon nga mga tawo. Indi sia magpabilin sa grupo sang mga nagahinambal sing walay kapuslanan, indi sia manginmalinong kon iya makita nga ginabuhat ang di-matarong.
Ang Dios Nakahibalo sang Aton Ginapanghambal
6Ang Kaalam amo ang espiritu nga mainabyanon sa tawo, pero indi niya mapatawad ang mga nagahambal batok sa Dios, tungod kay ang Dios makahibalo sang aton mga balatyagon kag mga panghunahuna, kag makabati sang tagsa ka tinaga nga aton ginahambal. 7Tungod kay ang espiritu sang Ginoo nagapuno sang bug-os nga kalibutan kag nagahugpong sang tanan nga mga butang, makahibalo sia sang tagsa ka pulong nga igahambal sang tawo. 8Indi makapanago ang nagahambal sang malain, sa indi madugay ukon sa ulihi magabaton sia sang nagakaigo nga silot. 9Ang mga tinutuyo sang mga di-diosnon pagausisaon sing matul-id, ang ila mga tinaga igasugid sa Ginoo kag dayon mabaton nila ang silot nga takos sa ila pagkamalaut. 10Ang Dios indi magpasugot sa mga pagsulay sa iya, kag tungod kay mabatian niya ang tanan, wala sing may matago nga pagreklamo sa iya. 11Gani maghalong kamo nga indi magkumod kay wala ini sing kapuslanan kag indi kamo maghambal sang masakit nga mga halambalanon. Ang labing tinago nga mga butang nga inyo igasiling may nagakaigo nga mga balos kag ang pagbinutig magalaglag sang inyo kalag.
Ang Dios Wala Nagtuga sang Kamatayon
12Indi ninyo pagdalha ang inyo kaugalingon sa kamatayon paagi sa malaut nga mga buhat. 13Wala#Ezeq. 18:32; 33:11; 2 Ped. 3:9. gintuga sang Dios ang kamatayon, kag wala sia nagakalipay sa kamatayon sang nagakabuhi. 14Ginbuhat niya ang tanan agod nga magpadayon sa pagkabuhi, kag ang tanan nga iya gintuga maayo kag sa maayo nga kahimtangan. Wala sing makamamatay nga hilo sa ila. Ang kamatayon wala nagagahom sining kalibutan, 15kay ang katarungan sang Dios wala nagakamatay.
16Ang#Hulo. 8:36; Isa. 28:15; Sir. 14:12. mga tawo nga di-diosnon nagdala sang kamatayon sa ila kaugalingon paagi sa mga butang nga ila napanghambal kag nabuhat. Nagahandom sila sang kamatayon nga daw kahagugma nila ini. Nagpakig-upod sila sa kamatayon kag gani bagay ini sa ila.
Currently Selected:
Ang Kaalam ni Solomon 1: MBBHIL12
Highlight
Copy
Compare
Share
Want to have your highlights saved across all your devices? Sign up or sign in
Maayong Balita nga Biblia © Philippine Bible Society, 2012